【20160529 東方日報】黃嘉樂 林子善 鹹濕聯盟
情同兄弟的林子善及黃嘉樂因劇集《鐵馬尋橋》結緣，二人與同劇的鄭嘉穎、馬國明及唐詩詠夾到爆，五人因此成為密不可分的摯友，直言希望以同一班底再拍劇集！林子善更形容四兄弟好簡單，就是四個都係鹹濕佬，更自爆大家的關係好到可以「由面衫面褲講到乜都除晒」！
初見嚇窒
林：林子善 黃：黃嘉樂
講到兄弟情的開始，二人即回想初「邂逅」的一幕，嘉樂更自爆當初嚇怕子善，後來開劇時才一拍即合。
林：除咗我哋兩個，仲包括其他三個「鐵馬兄弟」嘅，由2008年開始friend到依家！
黃：就嚟拎到十年金牌！其實我同嘉穎都比較慢熱，我第一次知道同子善一齊開工，去見監製嗰時，我一見到佢，我就拍佢：「喂！嚟緊同你開工呀！」點知佢藐我，唔好以為佢好nice！
林：咁當時都驚㗎嘛，條友又唔識，又無啦啦拍你！
黃：當時我都呆咗呆，覺得好似嚇親佢，其實我好少咁主動！只係因為知道嚟緊要做兄弟，想個關係好啲。點知一開工啲關係就已經好到不得了，佢仲打到我隻腳紅晒！當中其實我哋兩個熟得快啲，因為一開頭嘅戲係我哋兩個開工先，好快就熟咗，而子善本身就係氣氛製造者，好快就渲染到其他嗰三個，都未試過開劇開到咁開心，係開心到唔想收工。大家夾得好好，所以我哋成日都講，不如原班人馬開番套《同一屋簷下》，夠晒腳開啦，再唔開就老㗎喇！
肉帛相見
兄弟性格各有不同，卻有一個共通點，都係「硬頸」之人！
林：其實我哋幾兄弟條頸都好硬，呢個係共通點，同埋大家講嘢都好直，之後相處落發現嘉樂係一個暴躁王。好似傾佢生日去邊度食飯，我就會講啲point出嚟，提議大家去邊度食，佢就即刻問我：「你會唔會將件事搞複雜咗呢？」佢就係一個好直接嘅人，我哋都慣咗，大家都係有心為大家好，我哋幾兄弟姊妹啲感情係咁累積番嚟。一開始其實藝人都會有個保護罩，但係經過咗咁多年成日見面、食飯、傾偈，大家都已經開始冇咗個保護罩。
林：我哋一齊已經好開心，乜都講一餐。朋友有好多種，底衫底褲又有，面衫面褲又有，或者除晒都有，我哋幾個就係由面衫面褲講到乜都除晒。我同佢哋講，佢哋喺我林子善心目中，第日touch wood百年歸老嘅時候扶靈就係佢哋幾個，咁就知道佢哋咩地位！
黃：我自己冇乜朋友，比較孤僻，但係唔知點解對住佢哋我就好多嘢講，呢個圈入面，佢哋幾個一定係我最好嘅朋友！
林：我個人好簡單同直接，係呢班就係呢班，佢鬧我同其他人鬧我係好大分別！如果佢鬧我，我會唔OK，因為我愈愛、愈緊張嘅人鬧我，我會愈忟，所以我對住佢哋好易着。我哋四兄弟真係好簡單，四個都係鹹濕佬，哈哈！
為兄平反
兩位「細佬」大膽在背後講大哥及二哥說話，但轉頭又為常被誤會黑面的嘉穎平反。
黃：我哋其實係被外冷內熱嘅嘉穎成日要group埋一齊食飯，慢慢我哋養成咗呢個習慣，定期約出嚟。就算佢成日返大陸拍嘢都會keep住傳短訊畀我哋，問住我哋嘅近況，佢好緊張我哋。
林：佢仲會叫我哋影啲相畀佢睇吓，有陣時喺屋企無啦啦點影相畀佢，咁咪影啲古靈精怪嘅相畀佢囉，試過影啲腳趾畀佢！我哋四個加埋阿妹（指唐詩詠），佢比較文靜少啲出聲，所以（暗示洪永城）唔好蝦佢呀！最緊要阿妹開心，佢開心就OK！同埋好多人話大哥（鄭嘉穎）成日黑面呀點點點，其實佢唔係咁嘅人，佢對住我哋都係咁樣，因為佢個人好認真，好用腦諗嘢同埋諗好多嘢。而二哥（馬國明），即係「灰足三萬六小時」嗰位，我成日將佢啲改圖傳去個group度笑佢，佢都完全冇嘢，因為佢個人胸襟好大！
後記：任玩唔嬲
「鐵馬兄弟」鄭嘉穎、馬國明、林子善、黃嘉樂及唐詩詠，五人關係親如家人，訪問開始時，子善與嘉樂向讀者打招呼，即拿嘉穎及馬明開玩笑，由子善扮嘉穎、嘉樂扮「灰足三萬六小時」馬明，更以「橡膠穎」及「馬灰明」來形容兩人，相當搞笑，他們之間的深厚感情亦顯而易見！
文：專案組
攝：劉斌
場地：龍鳳冰室＠大坑
http://orientaldaily.on.cc/…/entert…/20160529/00282_037.html
唐詩詠近況 在 Tvb戏剧网络讨论区- 唐詩詠到沙田出席慈善跑活動，即場與一 ... 的推薦與評價
唐詩詠 到沙田出席慈善跑活動，即場與一眾運動跑手做熱身。 ... 52歲「靚絕TVB」李婉華近況罕曝光，素顔出鏡身材逆天，17嵗女兒像爸爸，11嵗雙胞胎仔仔圓臉嘟嘟超可愛， ... ... <看更多>