【勿賣我「地」】
每年財政預算案，財政司和發展局長都會公布未來一年賣地計劃。那些地，有今天的樹林、今天的公園、今天的社區設施，或者今天的海。將地賣了給地產商，起出來的樓我們買不起，收回來的錢用來幹什麼，我們也不曉得。但過去，我們對賣地冇感覺，因為我們不為意，賣的都是我「地」。
最近的民情有點變化，粉嶺高爾夫球場，政府說要收番富豪三分一地價，市民就不以為然，我們要地，不要錢。將土地還給香港人，建設令我們安身立命的房子，令我們重得自由，不做地產商和銀行的奴隸。
青衣島民發出反賣我「地」的先聲，本人舉手舉腳支持！
【長文 · 慎入】～震驚長宏長亨的故事！
【青衣監察】～青衣島變賣綠化用地！
2018年4月6日之後，小編將要預咗永遠見唔返畫中嘅景色！全因為面前寮肚路塊蚊型地皮即將以估價8億賣去起私樓。對昨日嘅小編黎講，望見眼前嘅風景，最多只會覺得可惜；但喺今日，望向窗外，心入面係恐懼、不憤，同埋無助，皆因小編唔小心問咗自己幾條問題，而答案係令人費解 ...
究竟呢塊地皮係咩嚟？
依家望落去，係409小巴總站。當年未開呢個位嘅時候，居民係要由何澤芸小學對出綠色避雨亭排到去小學門口。即使喺依家朝早繁忙時間，隔籬巴士站都亂到唔知想點。相信每個住喺長亨同長宏嘅島民都有共同疑問：交通問題都未解決，仲要再加多啲壓力落去，點解決呀？但喺諗解決交通困局之前，應該先問一樣嘢 …
點解會出現呢個困局？
最大包圍嘅答法，梗係話佢規劃得唔好啦。但係為咗負責任啲，不如睇返少少背景先。千禧前，呢塊地喺地圖上只不過同座山一樣，被劃為綠化用地 (GB)；千禧初期，政府以短期租約方式租俾小巴公司，平整工程亦隨即完成；幾年後，佢更加變身成為臨時政府撥地；2014年，地皮突然喺分區大綱圖 (OZP: 顯示規劃地區經常准許的土地用途) 上由GB改劃為私人住宅用途 (RA)。好！第二個問題未搞掂，就要插入第三條問題啦 ...
短期租約/臨時政府撥地係咩嚟㗎？
根據發展局嘅口徑，呢類土地批出嘅原意係一種過渡性安排，同時唔可以阻礙已落實嘅長遠發展用途，屆滿後工地多成為基建一部份。所以返番嚟長亨嘅個案，係咪代表地皮一早已經納入咗我哋無從得知嘅長遠發展用途呢？而所謂嘅長遠發展用途，就係即將起嘅插針式私人樓？而如此迫切嘅交通困局只不過係起樓前嘅過渡性安排？
咁又點？需要令你心情咁差嗎？
成件事令小編諗到三方面嘅隱憂︰
1. 綠化用地 (喺OZP上，GB嘅原意喺抑制市區範圍嘅擴展及提供更多靜態康樂地) 揸正牌以短期租約/臨時政府撥地用途被整平己不再綠，再而改劃為私人住宅地，都已成事實。但問題在於就短期租約/臨時政府撥地嘅審批過程喺欠缺透明度，幾時開始有興建私樓嘅發展動機？無從得知！無助～好似遇上扑頭黨咁！
2. 青衣島上嘅山野，即喺小編成日行嘅青衣自然徑，喺地圖上都屬於GB。以上面政府任意改劃發展GB嘅情況黎講，要全面變賣青衣島嘅郊野，其實都只係時間嘅問題。莫講話青衣島，我相信全香港仲有大大小小嘅GB，喺未知嘅情況下正在以唔同嘅方式 (例如：先破壞後發展/短期租約/臨時政府撥地) 被變賣，呢個係令人最擔心同恐懼！
3. 成個土地變身過程入面，直到出OZP階段先有相關嘅公眾咨詢紀錄。而有趣嘅係，當時出任區議員嘅申訴人林立志，走訪附近居民做咗二百份問卷，調查結果同埋各種論證方法都清楚提出咗反對嘅意見！
反之，當小編睇到兩年前有關葵青區運輸及交通嘅會議紀錄，區議員盧婉婷就小巴賣地後之安排只有「促請路政署交代通知方法及運輸署交代小巴線上落安排」，小編心諗，憑你呢兩句，究竟可以為我哋爭取啲咩？唔通到時見到你掛起「成功爭取409小巴線有上落安排」嘅Banner都要覺得感恩？
長宏長亨嘅區議員咁岩又係黨友，係咁啱大家都視而不見交通問題？定係黨策原來係覓地賣地起私樓緊要d?
不憤，就係嚟自望住自己區嘅議員係咁樣樣，姑勿論你咩派系，除非你根本無研究無深思無料到，否則，對準焦點做實事啦！唔該！！
#可憐嘅長宏同長亨
#記得登記做選民
#有票可以唔投
#但無票就諗都唔使諗
#最新消息指未來私樓樓高喺二百米以下
#頭三層係小巴站同商店
#唔通又係連鎖店？
#未知佢想塞我哋去邊度排隊
#美景個邊都有塊GB地喺幾年前被賣咗
#成日話做實事喎！？
#香港第一大黨黨策究竟係咩呢？
