［滑板股金牌受惠股嘅嘢］咪玩啦。都係睇熊貓扑嘢開心啲
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
1. 日本股其實幾好玩。利申，冇玩，但我都知好好玩。正如我冇去過東莞都知好好玩。BTW，勞蘇基金都會買日本股，甚至得閒去考察下。「實情我成世人第一次去日本都係日本公司請我去」，但，夜晚帶你行Donki咋，住四五舊水港紙嘅酒店咋。夜晚見到有日本仔撿屍返嚟的。
2. 舊年寫過日本口罩三寶，上次寫過上野動物園熊貓扑嘢受惠股（https://fbook.cc/3XKd）。今次就係……滑板金牌受惠股。
3. 實情係有英文報價，但我特登貼日本，扮晒Exotic，其實唔識睇。但，要識睇日文架咩？畢菲特買住友商事嗰時，識唔識睇日文？（https://fbook.cc/3XKb）（好似結果瀨瀨地嘢，但錢太多，主要係啲yen用唔使，零錢布施肥牛牛布施咁）。「定識睇片假名平假名五十音就識日文？」「咁你識1,2,3係咪識阿拉伯文？」（＊）
4. 左上間MORITO（9837），賣滑板裝備嘛，都仲合理，留意一度升停板，唔使識日本都識睇。右上間Mixi（2121）已經夠神化，贊助選手啫。不過呢間係幾隻之中最大，日本社交網，「怪物彈珠」喎。左下呢間TSI（3608），原來在美國有個賣滑板嘅電商網，OK
5. 最唔啦更？右下呢間Hohsui（1382），賣急凍海鮮的。關乜事？冇，因為間廠在滑板賽場側邊，直播一路見到大大個logo．在邊？豊洲市場！（呢個堪稱最搵笨嘅日本景點），滑板場就在對面。
6. 共通點係乜？都係啲十幾廿億港紙市值，平時冇成交嘅股票。唯獨係隻Mixi叫做百幾億港紙市值，「大家樂咁上下」
7. 其實日本股仲有好多故事寫，例如之前Panasonic賣Tesla（股票啦）好過自己賣十年電芯。或者有間公司要求員工唔好打疫苗否則就減人工炒魷，搞到股價大跌 — 你冇睇錯，唔係要求員工打疫苗。係要求員工唔可以打！嗰位仁兄話打咗疫苗後，五年會死喎（咁準？），仲叫大家唔好用5G電話，會死。嗯，人總有一死。
8. 點解我知呢啲嘢？就真係唔使識日文的。當然理論上好似有第一手更好，但，你夠識中文，炒港股有冇好好搵？
9. 講真，如果我識日文呢……可能搬咗去日本。不過聽講搬去台灣可能仲好，扮皇民。都怪自己大學時太頹，只係掛住補習搵錢溝女，德文就由半桶水變到零，法文更加係今晚打老虎，根本上英文又屎，普通話又屎，完全係不學無術，個學位在馮平山拎的（再講一次，馮平山唔係一座山，正如林在山唔係一座山）。至 於我個Maseter，「就在德國拎嘅」（當然唔係真係德國大學，正如我個學位唔係真係馮平山畀我，死咗成百年啦）
10. 不過講真的，件事就係我在台北隔離時（當時仲未被炒，好似係被炒前幾日），睇誠品創辦人吳清友嘅兩本書，《誠品時光》同埋《之間》，深受打動。當然我冇佢咁有錢（吳清友係好Q有錢！唔係普通有錢）。
11. 咁但，買贖罪券又好，搵人傳承又好，咩都好，就決定搞「馬蘭頭獎學金」。對象？我中學嘅師弟師妹，窮嗰啲。當然最要係係我覺得順超，即係盡得我真傳嗰啲，我話知佢僅僅好夠入大學—我又唔係要畀成績最好嗰個。
12. 我後悔嘅嘢，真係唔多。「當年冇買Tesla」呢啲唔算，我指係真係畀你揀多次，你會合理地改變選擇嘅決定。其中一樣後悔，就係大學時用太多時間賺錢 —好笨的，嗰時搵得幾錢？而家但願買返晒當年啲時間—唔係用嚟今日用，我冇咁貪心。而係，當年應該做多啲其他嘢。至於溝女？女當然要溝。但，溝女係唔使點用錢的，特別係當年（實情咁多年我都冇乜點用錢，我用嘅係大數據，不如出本書講？）。潘驢鄧小閒，真係人間大智慧。
13. 所以，「馬蘭頭獎學金」嘅目的，就係等個小朋友唔使走去做兼職唔使走去補習。佢唔一定要讀好佢本科，甚至佢唔一定要去馮平山，去富士山（香港都有個）都可以。
14. 總之，就係千奇千奇唔好走去搵錢。唔係金錢萬惡，錯，金錢是好東西。但唔好用咁低嘅兌換率換。
（＊）舊文都寫過，阿拉伯數字當然唔係嚟自阿拉伯。係印度數字。古語有云，「印度對數學嘅貢獻係零」
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
![Jarvis Weiwei [ 韦韦 ] Channel](https://img.mediatagtw.com/api/image/webp?source=https%3A%2F%2Fyt3.ggpht.com%2Fytc%2FAKedOLSnimGz58tPfn7oKQqoDGZpZ0eXu4Upr0T2n6rU6MQ%3Ds800-c-k-c0x00ffffff-no-rj)
