【on.cc 東網專訊】05.11.2016 歌手泳兒到電台宣傳新碟，透露新歌《四不像》於上周六得到電台冠軍歌：「成7年冇喺過呢個榜攞冠軍歌，好開心，其實慢慢開始冇留意，因為唔想自己太失望，但最近落街大家都知我派歌，路人會行埋嚟讚我首歌好聽，茶餐廳食飯啲姐姐又會話聽過我首歌，所以好感動、開心，同埋本身以為首歌上到第二位就唔會再上，點知仲有得上，所以嗰日都特登玩live同大家分享心情。」
講到鄭欣宜最近新歌《女神》成績亦很好，對此泳兒說：「佢個隻再勁啲，我都鍾意首歌，因為寫中好多被忽略嘅人嘅感受，好難得。（有信心佢咁好成績？）依家呢個成績都開心，我嚟緊都會有其他新歌，希望成績愈嚟愈好。」
差啲「中頭獎」
泳兒又自爆買了今期六合彩，但沒有中獎：「嗰日行過，聽到咁多錢即刻衝入去買，我仲已經幻想定中獎會畀自己放假一個月、買樓，點知頭先叫助手同我對，係冇中獎，所以都係努力做野賺錢算。」她又自爆來電台時差點「中頭獎」：「頭先上車，差啲被桶水兜頭淋落嚟，應該樓上嘅人裝修，如果我架車前少少泊位，我行前一步就中咗。（咁係咪好彩。）中咗先係好彩，但呢啲運氣不是我的。（六合彩買得多唔多錢？）唔算太多，等下期啦。」
