《永遠記得那一年》
好多人食車仔麵都覺得「車仔麵之家」或者深水埗嘅「文記」係全港最好，但我自己比較偏心「永年」，仲要係尖沙咀嗰間。
好食嘅嘢唔難搵，有錢有時間就食到，但係「好故事」就一定唔係成日都食得到。
記得某年其月嘅4號，我哋一行五人去咗「永年」度快食，排緊隊叫餸嘅時候，A君女友一臉自信地問：「你有冇食過呢間？」喺A君還未畀反應我之前，我已經醒目地話：「有啊，咪A君帶我嚟食過囉。」
事關A從來都唔會自己試新餐廳，應該話係從來唔會試新嘢，即係慣性好自私地去一啲自己最方便嘅地方做自己想做嘅嘢；所以每次我帶完佢去食一啲嘢，佢就會扮自己發掘，然後帶女友去，呢個已經係佢哋關係間make過最大嘅effort。從佢女友嘅眼神，你睇到一個咁小嘅舉動已經咁冧，其實都唔知係可喜定可悲。
出門口之際，A君煞有介事話要去7-11增值。已經講過佢好多次都唔聽，其實每日揸車出出入入，每個停車場都要用八達通，偏偏佢就永遠唔轉自動增值，搞到好幾次我哋去到停車場個閘先發現冇錢，要退車去便利店增值，我話佢咁樣做人你一世都冇可能會發達。
正正係嗰一刻，我先醒起原來嗰日係A君正日生日，因為嗰年我預備俾佢嘅生日禮物，就係我上網print咗一份申請自動增值嘅表格，仲幫佢填晒所有嘢，連埋回郵信封同郵票，佢只需要簽名寄出就可以。
不過低調嘅佢從來冇開口，所以我根本唔記得嗰日係佢生日，根本冇帶出嚟，但我就趁佢去增值嘅時候同咗佢女友講我預備咗呢份禮物。
佢只係微笑回應。
係嗰餐車仔麵之後，冇幾耐佢哋就進入分手復合、分手復合、分手又復合嘅階段，經歷咗幾耐我諗連佢哋自己都未必記得。
我只係記得嗰一年係我哋最後一次「慶祝生日」，所以我每次返嚟永年，我都總會覺得其實「永年」嘅意思係永遠記住那一年。
今年A君又就嚟生日，佢都依舊冇增值過張八達通，相信我畀佢嗰份表格佢都唔見咗好耐，但係唯一唔同咗嘅係佢已經發咗達，每日都係代客泊車同司機接佢，根本冇需要八達通。
而前女友已經同B君一齊，但我相信就算佢哋兩個再經過呢間永年，都未必會記得呢個曾經喺我生命留過烙印嘅一個小故事，但係我永遠都會記得嗰一年同埋嗰位女生嘅微笑回應，如果A君那年見得到，唔知結局又會否被改寫？
