夢想實現器（下）
上集：http://bit.do/fqitx
「X先生，你呢排點啊？你之前話想做漫畫家喎，依加你做緊盛行？」
X先生答：「無啊，我咪繼續返原本嗰份工囉。」
「......咁你係咪認為『夢想器』喺你身上失敗咗，有咩反饋畀我哋呢？」
「唔係，好成功，我好滿足啊！做乜嘢漫畫家啫，依加咪幾好。」X先生咁樣講。
我黑人問號。
X先生明明就係因為想實現夢想，先畀錢去使用「夢想器」。
但錢又畀咗，夢想又無實現，X先生居然完全無不滿，仲過得幾開心？
當然，有人寫出嚟嘅「夢想」，同佢心底真實嘅夢想唔一樣，
可能X先生聲稱想做漫畫家，但佢真正想做嘅其實唔係漫畫家。
但係，我陸續發現更多使用者，都有同樣情況：夢想無實現，使用者亦唔再實現夢現。
佢哋嘅夢想，被「夢想器」消滅咗！
我將呢件事上報畀上司知，上司都好重視，
如果「夢想器」實現唔到夢想，必定會引來大量投訴，甚至令公司倒閉。
但等咗一輪，我哋依然無收到類似嘅投訴。
因為，失去夢想嘅使用者非常滿足，甚至對自己之前嘅夢想不以為然：「無做作家咪好囉，作家邊搵到食㗎？有咩意義啫？」
既然不以為然，自然唔會為「實現唔到夢想」而投訴。
到咗呢個時候，專家終於發現到「夢想器」嘅真正缺陷。
「夢想器」需要大量能量，能量唔可以無中生有，
所以能量耗盡後，「夢想器」就開始吸食某啲使用者嘅夢想，獲得能量。
被吸食嘅人，就會完全失去夢想，雖然知道自己曾經有過某啲夢想，
但感情上，已經唔會再有期待，唔會再為接近夢想而欣喜。
與此同時，有能量嘅「夢想器」，又會去實現某啲人嘅夢想。
所以，用咗「夢想器」後，你嘅夢想係被實現，定被吸食，似乎完全靠運。
咁梗係唔掂啦，公司急忙將「夢想器」下架，再作調節。
經過專家不眠不休嘅奮鬥後，「夢想器」成功分為兩部份：「夢想吸食器」同「夢想實現器」。
顧名思義，用「夢想吸食器」去吸食足夠嘅夢想能源，再輸入「夢想實現器」去實現夢想。
當然，事情搞到咁複雜，「夢想實現器」嘅使用價大幅提升，遠高於舊版「夢想器」。
我覺得好奇怪，邊個會用「夢想吸食器」？
唔通公司要畀錢請啲貧困地區嘅人，令佢哋為「夢想吸食器」提供能源？咁會引發人道問題喎。
點知，「夢想吸食器」面世後，大受歡迎。
唔少家長都願意畀錢，將子女嘅夢想消滅。
「我問個仔嘅夢想係咩，我都想畀自由佢㗎，諗住佢揀做律師定做醫生。點知佢想揸巴士，揸巴士邊有出息㗎？」
「阿囡鍾意跳舞，又唔係攞到咩獎，根本無意義，專心讀書好過啦。」
「我個仔嘅夢想係咩？我唔知啊，不過夢想呢啲亂七八糟嘅嘢，無好過有啦。好好讀書，搵份好工，先係正路㗎嘛。」
隨住時間過去，開始有老闆用升職加薪，鼓勵員工使用「夢想吸食器」。
因為有啲老闆認為，無咗夢想嘅員工，會一門心思為薪金奮鬥，更專心工作，更樂意加班。
「夢想吸食器」由「鼓勵員工使用」，到「唔用就扣人工」，再成為「招聘嘅必要條件」。
無錯，的確有少部份老闆鍾意有夢想嘅員工，唔鼓勵佢哋用「夢想吸食器」，
但喺時代嘅洪流下，佢哋嘅堅持毫無意義......因為大部份人，細個嗰陣已經被父母消滅過夢想。
至於我，仍然係夢想公司嘅一個小員工。
你可能會問，咁多人用「夢想吸食器」，能量就夠啦，咁邊個用「夢想實現器」？
答案係：有錢人。
因為「夢想實現器」價格高昂，有錢人先用得起，好似買豪宅一樣。
唔係，應該話，比買豪宅更難。
因為「夢想器」一生只可用一次，只要用過「夢想吸食器」，就唔可以再用「夢想實現器」。
所以，你必須要自細無被父母強逼用過「夢想吸食器」，
長大後又無入過強制要用「夢想吸食器」嘅公司，再加埋有錢，先有得用「夢想實現器」。
所以更準確嘅答案係：自細就有錢嘅有錢人。
夢想，點解只可以喺夢中先敢「想」？
因為現實中，夢想，永遠係奢侈品。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #夢想實現器
地府我開的漫畫 在 國語有聲善書【禪修的重要】道濟禪師著第廿三章四念處四段十 ... 的推薦與評價
... <看更多>