【龔成問答信箱】(Q20121-Q20140)
Q20121:
啊sir,幾年前剛大學畢業上你的股票班,當時用40蚊左右買比亞迪,$240時放左一半,賺左我人生第一桶金
由於我係文科生,一直以為股票要數學人先玩到,多謝你用簡單易明的理論教懂我價值投資
另外,我想分享我的夢想係做一個可以融合心理學、輔導學、專業塔羅諮詢師。因為我興趣係神秘學、身心靈,所以我好明白吸引力發則、秘密、財富金鑰呢幾本書係幾有用,好多謝啊sir你向我地推介呢幾本書,比更多人明白改變潛意識的威力
啊sir你係我心目中唔止係理財專家,都係發放正能量,叫人了解自己追夢的KOL!現在網絡負能量好多,KOL質素參差,呢幾年當我對自己有懷疑時,我睇你Facebook會鼓勵自己,心諗龔成做到自我實現,我都做到!
現在我正職做XXX,兼職做駐場塔羅師/線上塔羅諮詢,正職志在儲錢及吸收經驗,都在實現夢想的路途中,希望幾年後再inbox你,可以用一個非常專業的諮詢師身份與你分享!
龔成老師:
加油!
比亞迪(1211)呢個回報,你應得的!
現時你做好塔羅師/線上塔羅諮詢,我相信長遠有發展的,你要試不同的宣傳手法,要有人認識先產生更高價值。
加油!你已經行對了方向!
我要記住一點,你要幫人,要產生自己的價值,不要為講而講,為賣而賣。我一向的方向都是幫人,希望有正能量,我不會為宣傳而講一些誇張的野,這是大方向。
我都希望你明白這點,以「真心幫人」為中心。
------------------------------------------------
Q20122:
老師
感謝你的分享!
我都想跟你分享一下
原本我對投資幾乎完全沒有概念
最多只懂得跟風 月供股票
而我男朋友曾是「賭仔」
常期望一夜致富
以致常常「輸身家」
但自從他上過你的投資班
我發覺他的心態平實了很多
由以前「有錢就身痕」
到現在願意跟我一起慢慢累積財富
而我
亦透過他每次上完你的堂後的分享
對理財、投資概念提升了不少
以往,我常常很短視
會用生活費作投資
以致股價跌了一點點就會恐慌
最後手續費都蝕了
但現在
我聽你的話
投資應看公司的長遠發展
所以現在投資時
心裏踏實了很多
實在非常感謝你!
我在過去的一年
終於儲到人生的第一個六位數
由以往月月清
到現在變了儲錢是我其中一個主要嗜好
龔成老師:
太好了!
我地最好要學「理財」,不是「炒賣」,只要我地有正確的理財知識,知識與財富一定成正比的。
其實我自己,過往都有行錯路,之後就是輸得多,所以先慢慢學翻正確投資。
加上,我過往做銀行同證券行,都見到唔少人炒賣輸錢,與家人不和,所以我都想你地學正確的投資。
見到你財富增長,反映你已行在正確的路,理財是長期戰,加油!
------------------------------------------------
Q20123:
我現時的投資組合如下,有一些策略請龔sir比一點意見:
持有平穩增值股:
0066 有一手@$43.75
持有潛力股:
3067 有兩手@$18.19
1177 有一手@$6.99
1833 有兩手@$93
9988 有一手@$271
本人30歲,有家庭,一個小朋友,一直供緊樓,同埋有其他開支,不過可以儲到錢,打算之後嘅投資策略是:
1. 現金儲蓄有30萬會留4成現金不動用,咁有18萬分別是9萬在平穩增值、9萬在潛力股。
2. 0066 會每一季買一手(係用3個月出糧儲起的錢來買)
3. 加入0027 銀娛或其他平穩增值股,但我9萬在平穩增值股裡,如果買左0027銀娛之後我只剩下3萬左右,咁可以買咩入場費較低的平穩增值股好?或有其他建議?
4. 我持有的潛力股,打算3067是每三個月固定入幾手,慳返手續費,之後不斷儲貨長線持有
5.1177 再待跌8%就分注買(用金字塔式)
6. 1833 和9988 不知往後的策略如何?
7.其實我應唔應該買一些收息股如778/435、因我見有6%息率?點樣將啲錢再滾大啲,同平穩增長類一齊持有?不過我見股票勝經教嘅水桶投資法建議收息類都不適合我年紀。
謝謝。問題較長。
另外, 我自己&小朋友都有供緊3份保險.. 其實好想斷供….以前未識投資股票, 以為買保險一定好過放銀行, 但我由幾個月前認識龔SIR同埋睇你的書後, 我唔想再供以下3份保險了..每年開支都幾和味..同埋諗返個回報其實好少。
自己有一份人壽儲蓄保險,年供約$18,000,要供18年,已供5年,剩13年要供,
小朋友兩份: 一份年供約$18,000人壽儲蓄,要供18年,已供5年,剩13年要供,另一份是年供約$16,000,要供5年的純儲蓄,供左2年,剩3年要供,
8. 以上3份保險開支約$52,000/年, 龔SIR我想請教你的建議, 我現在斷供好嗎? (當然問過保險經紀人是一定沒可能攞返之前供的錢架啦), 如果我決心斷供,雖然會蝕左之前幾年的錢,但如果我用未來15年-20年時間將買保險的錢,用黎投資優質股更好吧?亦可幫財富增值, 建立平衡的財富組合, 請問我的方向咁樣正唔正確?
9. 接上題,敢問龔SIR如果我上述方向正確,真的斷供保險, 我用15年-20年時間投資優質股, 回報應該更加大,如果選股成功預計回報都想有10%-15%或以上,如果是, 我的方向應該投資哪幾隻平穩增值股是有這個回報?
我分注儲貨買入優質股既話,例如0066﹑0027這些優質股可以做到呢個回報嗎? 扣除供樓同其他開支可以每個月可到1萬蚊(但澳門月供手續費問題,我打算會分注投資,不會做月供股票)。
你是一個良師, 好希望獲得你的正確指導和意見支持, 感謝
龔成老師:
1)方向可以,你30歲,無問題。
2)可以。
3)如果可以,當然月供較好。你可以考慮領展(0823)。
4)可以,這是一個好方法。
5)得,但注意總投資金額不能過多。每入股上限15%好了。
6)最好月供,或慢慢分注入,潛力度是有的,但股價都波動,要慢慢分注投資,控制好總金額。
7)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
所以,你唔買收息股都無問題。
8)其實保險在理財中,都有一定的作用,我地理財最重要是「攻守兼備」,你要有防守(即是保險類),同時有增增值。
除非你現時的財富比例,過多在保險,否則,不用斷供。但之後要加強翻股票,保險比例不用太多。
股票增長力較強,但風險度都會較高,你要平衡。
9)其實你照之前的方向已得。
平穩增長股你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177),但就要明白波動性比上述會高左,同時風險大左,你要自己平衡。
如果你不月供,就分注買入。你單靠平穩增長股是較難有15%回報,同時要加入潛力股票。
------------------------------------------------
Q20124:
龔sir您好,我最近有需要套現大概HK$1m,正在煩惱應該賣出那些股份,希望你可以比d意見。如果係以下股票裡面賣出(全部有幾手),以股票質素同現價黎講
龔sir有無想法可以考慮先賣出邊d?
1)移卡(9923)
2)五礦資源(1208)
3)HKTV(1137)
4)Sands (1928)
5)1548
謝謝!
龔成老師:
最重要不是睇「賺蝕」,不是睇「買入價」,而是睇質素。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
五礦資源(1208)質素未算好強,金斯瑞生物科技(1548)近年業務增長力不算高。這兩股可以考慮較先賣出。
另外,你要分析你想建往後的組合,如果想增長,金沙(1928)就未算好適合。如果穩陣,移步(9923)、香港電視(1137)就未必適合。
------------------------------------------------
Q20125:
龔sir, 好想請教您,我對保費融資很有興趣,但我本身係穩陣派,見到介紹話係以槓桿形式進行保費融資的,有點怕……請問您覺得可取嗎?謝謝您!
龔成老師:
我講當中的風險。
如果保單的派息,唔能夠與你借貸部分的利息同步上升,你得到的息差就會減。
原理是你借錢,要比息,現時借錢利息低,你有著數,賺息差,但當利率向上,你就有機會蝕息,這是你最大的風險。
------------------------------------------------
Q20126:
老師,想再次謝謝你,我得到人生第1個60萬了!我朋友常常說買美股賺錢,講到好叻咁,知道佢原來放晒美股後先賺左幾千蚊
我想講我三年前follow左老師你fb同上你堂後,暫時賺左20萬了!我相信未來繼續保持這種投資方法會賺更多~
但我因為年尾想買大約400萬樓,所以現在暫停月供(2018 年2月開始友邦,比亞迪,銀娛,中電,中銀香港,領展,港鐵各$1000)同有3手吉利(均價$14.5)2手中生製藥(均價$7.61)。
因年尾要用錢同怕市波動,現在每月淨儲現金約17000蚊無作投資,再慢慢放以上股票(但其實捨不得放晒,全部有質素)到時應有78-80萬
買樓後希望留返約20萬股票,再努力月供同儲現金等機會買潛力股,想問呢個方向有無問題呀?謝謝
龔成老師:
恭喜你!
如果你一年內要買樓,要資金,就要開始準備,如果這刻現金不足,要賣股票,就要開始過程,在一年內賣出股票套出相對應資金,不要等到時先賣,因為無人知到市大市升跌。
所以,你停供,賣股,是需要的。
最好當然是留翻部分優質股,但就要睇你的實際情況。
到你買樓後,完成按揭,到時有資金再慢慢買翻股票。
------------------------------------------------
Q20127:
龔sir,可以點樣了解一隻股適合持有?
龔成老師:
我地買股票就是買企業,因此,一定要優質企業。
另外,偵要睇翻是否適合自己的風險度,潛力股/收息股?
要睇翻這股在財富組合的角色。因為你現時是建立一個組合,長期持有的。
------------------------------------------------
Q20128:
咁其實對潛力股的分析,係咪好靠自己眼光對佢企業前景點睇?
如果想買股票,可以上完基礎班已經慢慢買,定上完7月進階班先?(手上有12萬可投資)
龔成老師:
潛力股有佢的指標的,例如產品、行業、大環境的特點,同時,有些財務數據都能睇到。當然,眼光都是其蠱一個因素。
你要有延伸分析的能力,唔好只集中在當刻的市場消息,要推斷到將來,以及尋找企業本質較好的企業。
股票基礎班,你上完後,已經可以買股票,足夠的。只是進階班會更深入去研究企業。
------------------------------------------------
Q20129:
你好呀 龔sir, 2129 我係0.45買,甘我應賣定長揸?
龔成老師:
LEGION CONSO(2129)質素只是一般般。佢主要在新加坡從事提供以下物流服務:
(一)貨車運輸服務:指港口與指定提貨/交貨地點的貨物(主要為集裝箱)拖運;另亦聘請獨立分包商提供
若干貨車運輸服務。
(二)貨運代理服務:乃一站式解決方案,集團擔當代理並為客戶安排和協調運輸,最終客戶通常來自零售和
製造業等行業,其裝運的起點或目的地通常在國外。
(三)增值運輸服務:包括露天倉儲服務、裝箱與卸貨服務,以及物流堆場與指定提貨或交貨地點的集裝箱拖
運。
其實規模不算大,加上賺錢能力不算強,整體只是一般。
如果你多貨,宜減。如果貨不多,可守下,上翻較多先賣,不過長線投資價值唔算高。
------------------------------------------------
Q20130:
龔sir您好,我岩岩睇財務自由行其中一part(放棄現時現金流,獲取將來更大現金流)
其中有提及「而投資科技股的策略應投資在潛力企業身上,即是要發掘下一隻騰訊、下一隻阿里巴巴,而不是購買現時的騰訊或阿里巴巴」
但是我見龔sir係潛力股推介list有包含呢倆隻,何解呢?係咪因為當時佢哋重未程現真正潛力呢?可以了解一下嗎?感謝
龔成老師:
簡單來說,700、9988是不差的股票,適合大部分投資者,所以對「一般」的投資者,我建議
但如果有知識,有實力,就應該尋找「未被市場發現」的潛力股,這樣才可以更高回報,這是我書希望投資者能到達的境界。
------------------------------------------------
Q20131:
你好呀 龔老師 本人30頭 現在有10萬左右流動資金 早排買左0799升到頂位放左 之後33蚊入左吉利0175 3手
想問下新能源汽車中的吉利 還有在上升趨勢嗎
我還仲想投資多一隻潛力股 京東 美團 阿里巴巴 請問三隻 中邊隻最大潛力推薦入手?
龔成老師:
我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。要平衡,建立後長期持有,不是買賣賺差價,而是成為你財富組合一部分。
你這年齡,可投資平穩增長股+潛力股。
你可以考慮阿里(9988),吉利(0175)可長線,另外應同時加入一些平穩增長股到組合。建立一個平衡的組合。
當然,同時要留有一定的現金在手。
------------------------------------------------
Q20132:
你好,老師,我只係新手,近月開始睇你既書同網頁,看到同樣出生基層的你有今天的成就,令我十分鼓舞,加上我真係學到好多野,後悔無早早向你學習,希望老師現時可以指點一下我既儲蓄同選股方向,萬分感激!
年約30歲,已婚,家庭月入6萬8-7萬,供緊一層自住物業,現時每月淨儲蓄現金$15000,想於未來三年內換樓和生小朋友,長遠希望財務自由(不過好難!)
現時已買股約50萬,全都是平均少注:20萬舊經濟股(1373、1113、823、778、11)、30萬新經濟股(1211、1177、1833、9988、1448、1810、2382、3088),未知老師對以上組合分配和選股睇法如何呢?
謝謝老師的無私分享和教導
龔成老師:
換樓,最重要是供款方面問題,你可以定這個為計劃,但就不用急。你可以好好把握這幾年,努力儲蓄投資,到時最好有足夠資金換樓,同時不要賣晒所有股票,令你可以有股樓平衡的配置
現時你持有的,基本上都是有質素的,比例方面亦可以,由於現時新經濟股開始貴,因此你加新經濟股的力度,宜減慢。舊經濟股則無問題。
我見你所選的都是有質素的,都問題,方向已經正確。
但都要由有一定的現金,去等機會入市。
------------------------------------------------
Q20133:
Hello 龔成,本人正是80後,今年36歲,係一位單親媽媽。
由2020年開始,平均月入48000左右,月儲20000左右。
有個已購入既公屋單位與爸媽及仔仔同住,要供養父母。
目前有55萬積蓄,另外有兩手匯豐股票由64蚊持有至今
之前有兩手騰訊敵不過你所講既長線同信心,得到薄利就放左,當時仲係420蚊咁上下。
(本人對股票全不在行,只靠自己直覺同電視走勢分析去做判斷,所以我已報名你初階課程,希望可以學習到正確既理念,再重新出發)
我係一個月前開始留意到你既分享,真心令到我都好熱血,我自問本身都係一個極不認命既人,相信自己去改變命運。
我買左你幾本書去睇,睇完都令我有重新思考,過往既自己有想改善命運既心態,但無行動既勇氣。
我係2020年有留意賣盤,心態係樓價只會一直升值,能夠買完收租,係我其一既長遠打算,為將來收入做好準備。
但之後留意你話「乘法」,我就希望策略應該先用股票買賣,令本金推高才作其他工具投資。
畢竟首期本身都係預一成,其實能夠選擇到優質單位可以話無乜可能,純粹係覺得要快D入市。
我知道最近市況都開始有點熱哄哄既情況出現,所以股票方面,我無諗住宜家哩個情況下入市,你話要睇準時機,咁我寧願等撈底,好過宜家去衝。
故此都特意來郵問下閣下對我哩種情況,有咩建議
本人的確唔知應該從何入手好....
另外好多謝你寫書去分享你既經歷,我會繼續支持..仲有三本寄梗黎,你本百萬富翁仲等左成個星期先有,你都要繼續打不死。只要有目標,就算最後唔成功,過程都好重要。我一定會記住。謝謝!
龔成老師:
不如我講少少香港樓市分析,你可以睇下點配合。相信中短期有可能向下(但不會大跌),長遠會向上。
首先要睇經濟基本面,如果經濟持續地差,失業率上升,樓市終會向下,這會對樓市有中期性的影響,不過,就算跌,都不會大跌,最多只是小跌,如果經濟差的情況不是太大,甚至不跌,這是由於背後的需求大。
在長遠計,我仍相信樓市在長遠計,因供求關係,仍是向上多。因為現時香港買樓的需求仍大,而長期供應不足,加上政府往後施政只會更加困難,好多所謂的大計劃都未必能夠實行,又或最後規模細左。
另一方面,需求大,我見唔少適婚年齡的朋友,都正等機會買樓,但未買樓,這些是「潛在需求」,過往每年不斷累積,只要樓市跌少少,就會有需求走出來,這令樓市不能大跌。
另外,樓市另一作用是「投資」,現時的租金無大跌情況,以投資回報率的角度分析,樓價都不會大跌,因此樓市平穩。
長遠計,租金及樓價會平穩,有少少向上,但不是倍升,不會好似過往般倍升,而是平穩向上。
買樓最重要是睇「供得起」原則,如果這方面無問題,你已經可以開始慢慢睇下樓。
最理想就是「股樓平衡」,即是你買完樓後,仍有股票及現金在手,這是最理想的。加上現時新經濟股有點熱,你投資舊經濟股較好。
如果你打算中短期買樓,投資股票的資金不要太多,等你買完樓先正式買更多股票。
而股票方面,你長遠應建立一個平衡的財富組合,優質股要長線。
股票班見!
------------------------------------------------
Q20134:
龔sir, 想問下內房股基本都有負債,如果要選擇內房股投資應該選擇少負債既投資,但我有發現有d股佢負債唔高,現金流足夠,但股票既價值唔高係咩原因?
同樣3333恆大佢既負債極高,仲要成日用折賣樓,但佢又有咁多人投資?
如果股東權益大於負債,咁該股是否暫時沒有負債或債務危機,但是公司的發展與潛力就未知,只是知道沒有財務問題? 是否這樣理解 ?
想問下你對新能源股有咩睇法? 其實睇呢d版塊洗唔洗了解下國策或者拜登對能源政策既方向?
如果現價將2333既股票賣出再轉去175會唔會建議? 因為現狀感覺175既發展潛力比2333大,但不知道為何2333會比炒得如此高。相對2333,175現價是否較平?
Thx
龔成老師:
中國恒大(3333)這是一個高負債的例子,其實佢業務本身不算差,但負債太高。負債高其實有好有壞,當好景時,佢只是少少資金就可以賺好多錢,股價的上升可以好勁。
不過,當樓市逆轉,又或中央有時會出打擊樓市政策,加上佢本身負債極高,對佢有一定的影響。如果樓市有大少少的逆轉,可以對佢造成巨大影響,只是過往中國,多年來樓市整體向上,因此無事,但我地作為投資者,都不能無風險概念。
相反,一些低負債的內房,賺錢能力就會相對較低,不過在樓市逆轉時,佢地會較強。
所以,你要平衡風險與企業的賺錢能力。恆大不是不可投資,而是要明白風險,控制注碼。
至於吉利(0175),我相信長遠潛力度較長城(2333)好。吉利本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
長遠來講,佢的品牌與發展在中國仍理想,2018年,吉利透過旗下海外企業,動用超過$500億人民幣收購戴姆勒股份公司9.69%股份。由于戴姆勒股權結構分散,所以吉利已經成為了戴姆勒集團最大單一股東。這不單有利佢有中國發展,同時長遠,可能加快了海外發展速度。
現時價位在合理區頂,甚至有少少貴,股價波動,有貨可長線。最好回少少,或這刻小注等跌再加。
------------------------------------------------
Q20135:
老師, 你好。以往年少無知,成日聽人講號碼就買,以至蟹貨好多年。
可以請老師就以下的股俾啲意見嗎?
繼續持有/止蝕? 謝謝
338 上海石油化工股份 $5 X 20000
939 建設銀行 $6.54 X 15000
945 宏利金融 $151.5 X 300
2628 中國人壽 $30 X 2000
484 雲遊$44.2 X 600
1359 中國信達 $4.08 X 7000
6 電能 $67 X 1000
1826 旭通控股 $2.2 X10000
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
上海石油化工(0338)、建行(0939)、中人壽(2628)、電能(0006)質素是有的,但增長力就唔算強,你要睇翻自己的投資目標,去決定這些股持有多少。
宏利金融(0945)有質素,可持有。
雲遊控股(0484)中國信達(1359)質素只是一般,增長力不強,宜減持。
旭通控股(1826)業務不太好,賣出較好。
------------------------------------------------
Q20136:
老師 想同你請教下
最近思考緊個問題
現時越來越多人知道價值投資 同時都越來越多人使用價值投資
咁嘅情況下 其實係唔係價值投資越來越難實現?
龔成老師:
如果愈來愈多人用價值投資法,的確我地賺錢會難左,因為好散再因為市場的無知而能夠買到平野。
不過,就算多人用,始終都是有限的,香港仍是短炒為主的市場,所以我地仍有一定的獲利機會。
睇翻巴菲特,同價值投資法70年,成為全球投資最賺錢人已經好多年,已經話比全世界聽,價值投資法最賺錢,不過,仍有好多人仍然是短炒,多年都是這樣,你打開電視就知,因此,只要仍有人短炒,我地憑價值投資法賺大錢的機會仍在。
------------------------------------------------
Q20137:
龔sir你覺得這樣的組合怎樣?
係潛力股中我想係組合樣樣有D,但銀碼唔會好大,這樣會不會散得滯,唔夠集中呢?
港鐵:$2000
領展:$2000
盈富:$2000(我見龔sir FB都經常比較建議月供呢隻)
安碩恒生科技:$1000
中生製藥:$1000
港交所:$1000
福壽園:$1000
月供總供1萬元
龔sir你覺得這樣的組合會唔會更好D嗎?感謝指點,非常感激,另外我已經報讀左基礎班, 期待期待
龔成老師:
你現時的股票,都是有質素的,投入金額及配置比例都適合,你可以進行。
由於ETF是一個組合,因此就算佔你股票組合比例較多,都無問題,例如盈富(2800)、恆生科技ETF(3067),當然,如果你有選股能力,就不用太多ETF。
現時你的組合無問題,配置正確,你保持進行就得,當然要同時留有一定的現金,等你在大跌市時可以把握到機會。
股票班見!
------------------------------------------------
Q20138:
Hello, 老師你好!本人43歳, 月入$33000, 單身, 與家人同住, 現持有以下股票:
0003 2000
0005 2000
823 500
1038 2500
2388 1000
2800 4000
1299 800
1177 10000
939 5000
現月供 0003 $1000, 1038 $1000, 2800 $2500, 2382 $2500
儲蓄互助社, 現月儲$7800
現持有30萬現金
1) 想問現在持有的股票和月供股票有需要調整嗎?有需要考慮其他類別的股票嗎
2)我本身沒有買保險及基金, 現考慮要不要參加自願性供款, 或自願醫保? 想問一問意見, 應該減少月供股票/月儲現金, 投放在自願性供款/醫保?
之前曾月供比亞迪, 在90元已經全部放了, 之後已經不能在低價買入, 很可惜!
感謝老師幫忙
龔成老師:
1)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你現時較多在收息類股。
其實以你的年齡,並不是無增長力的,因此,你應該加強翻少少增長力(當然不是太進取)。
你可以考慮加入每月月供安碩恒生科技(3067),$1000-$1500。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂至略貴,因此,這刻不能大注投資。最好的策略,就是月供,或自行分注小注慢慢收貨(例如每月買一次、或2個月買可次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
2)我地理財,最重要是攻守兼備,你保險,是理財其中一部分,因此,是需要的。
不過,「足夠」就得,唔需要過多。所以,當你分析想買那些保險時,最重要是自己的需要,那些風險你不想承受,想轉嫁比保險公司?這就是你的思考方向。一般來說,危疾、人壽保險是需要的,而儲蓄成份,就不一定要。
------------------------------------------------
Q20139:
老師,因為股市高己放左手頭上大部新科技股, 現想買地產16,1997,1972 同14 請問如何選擇其一?
謝謝你
龔成老師:
其實幾隻都可考慮,都是有質素的,不過中短期未必強,但長遠會慢慢好轉。
如果較平穩,就新地(0016),如果增長力高少少,可考慮,希慎(0014),因為佢銅鑼灣較受影響,疫情過後好轉情況會較大。
------------------------------------------------
Q20140:
你好!想請問1971買唔買得過,見佢發盈喜 全年純利同比增長唔少過6成,又冇跌穿招股價,行緊三底上升軌
睇見公司兩位大股東12月以平均價4.8增持四次,可以嗎?
龔成老師:
無跌穿招股價、行緊三底上升軌,都不是分析因素,唔好信這些分析。
兩位大股東增持,只能說是一些加分位。
我地最重要是分析「企業的業務本質,長期發展」。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
「大學畢業 感謝老師 的話 50 字」的推薦目錄:
大學畢業 感謝老師 的話 50 字 在 龔成 Facebook 的最佳貼文
【龔成問答信箱】(Q17201-Q17220)
Q17201:
龔sir,追咗你個page幾年時間,因為你我由一個從來唔儲蓄嘅人,改變成謹慎用錢,每月都有儲蓄嘅人,好多謝你。
最近我經歷緊人生一個好大嘅困難。之前打算結婚,所以合資買樓,而名只係寫我。
但最後分左手,物業我已俾返哂佢出過嘅錢佢,宜家我只有少量現金,每月人工都應付到供樓、俾家用,同仲儲到幾千蚊。
我宜家好無安全感覺得好驚,一個人頂住層樓真係好大壓力,日日都無教好瞓。
龔sir,可以贈我幾句鼓勵嘅說話嘛。
龔成老師:
凡事都有兩面的,你現時其實處於有利位置,如果不是過去的經歷,你就未必會買樓,這刻你起碼是「擁有物業資產」,比起好多人已經是好。
你有資產,根本唔需要驚,要好好利用,這是你的財富。
最好就是將物業出租,提高你的現金流,這是可以更有效運用資產。如果你現時是自住的話,可考慮搬返家人裡;如果唔想搬,可以考慮找一些在外面租樓的朋友,搬入你這裡,然後交租比你,這樣你就能更有效運用物業,同時提高現金流。
另一方面,要盡力儲多少少現金,你現時是心理壓力問題,並不是資產有問題,如果有一定的現金在手,你會較有安全感。
另外,試下同你家人分享自己的情況,減少家用數目,等你儲到多少少現金先加翻,我相信家人是你的後盾,你唔好覺得所有野都要一個人面對。
------------------------------------------------
Q17202:
龔Sir,我係你舊生,我而家太沉迷計個估值
忽略左個企業增長力
想問下咩地方可以睇到隻股票既增長力係點?
例如你上堂講過金沙起新野既速度慢左;銀娛既發展例如買左新地皮;上次問過你既楓葉教育 你話個增長力冇以前咁勁
以上資訊我係可以係邊度得到?除左係第7堂教既年報上半部文字
龔成老師:
我地進行企業估值,是重要的,但你都要明白,估值是一個概念,並無絕對的答案,同時,估值有不同的方法,對於較高增長的企業,我地在分析計算時,「將來」的因素都會較多。
我地買股票就是買企業,企業之後的業務發展,行業處於那個階段,就是我地的分析點。例如賭業,你先要理解這行業的發展模式,那些因素決定行業的發展,其實我在第二堂都有講述過。建睹場、買土地、土地的位置、佢地投資的力度,之後,再配合大環境情況,例如旅客因素。
你會見到,金沙(1928)發展的力度慢左,而銀娛(0027)仍保持增長,這就是長遠我地的分析點,你要睇多年的年報,佢的網站,以及財經資訊而得到這些資料的。
------------------------------------------------
Q17203:
龔成老師,幾年前睇過你既書,pm過你問理財
最後因為誤信其他股評人既分析而買錯股票
30歲前賺既第一桶金一錯再錯後跌淨40%以下
呢一年全新黎過企番穩過人
開始重新檢視自己理財
依然追逐財務自由
由於事業金錢友情愛情大打擊
成個人停頓左1-2年
而家想pick up 番財務自由呢個目標
老師覺得可以點樣起手?
龔成老師:
每做人都會犯錯,這是好正常,最重要是唔好再犯相同的錯誤,同時檢討之前的問題,令自己進步。
你可以從新完一些目標,例如5年目標,保持積極,停留於過去是無意思,只會浪費時間,你要盡快開始計劃。
首先,定立每月儲蓄的目標,例如$5000、$10000等。
另外,要加強自己的投資知識,學習正確的投資知識,唔好只懂炒炒賣賣。如果自己真正想利用投資,去達至財務自由,就要大量增加知識,例如每星期要自己花3小時去增加投資知識,每星期要研究一間企業等。
同時,你可以定5年計劃,例如5年要有多少財富等。加油啦!
------------------------------------------------
Q17204:
龔成老師,想請教一下關於複息滾存的算式,我每次看你的書或文章的時候都會算一下 ,但每次都不明白那個複息算出來的數是怎樣計算出來。可以提供一下算式嗎?
例: 每年$5,424,以4%回報滾存,30年滾存出30萬。這個的算式是甚麼? 謝謝您!
我用excel 能計算出來,但不知道有沒有更快捷的算式呢? 謝謝
龔成老師:
這要用專用的計算計,或在excel設定一些程式先計到。
因為現時不是一筆資金滾存,而是每更一年都投資一定的金額,所以如果自己計算就較複雜,你可以上網找一些「複利息表」。你會有答案的。
------------------------------------------------
Q17205:
老師你好, 我同我先生都係36歲, 未有小朋友, 手上現金大約50萬, 另有12萬股票, 想係2年內可以買樓(2房單位)。
兩人每月可以儲現金20K左右, 另外會用6K月供股票($3000 盈富, $3000煤氣)
想問下現階段應該加大投資, 還是保留現金?
如果股價好, 應該賣掉一些股票以準備買樓嗎?
謝謝老師!
龔成老師:
如果你地打算2年內買樓,就要多留現金,要考慮首期的金額數目,如果首期是$100萬,就最好現時持有$60萬-$80萬的現金。同時慢慢增加現金,到買樓時有足夠現金。
這刻不用立刻賣股票,因為你有時間準備。但就要在這兩年內準備。
至於月供股票,如果這些資金到買樓也不需動用,就可以一直進行,但如果買樓的一刻,有可能要用這些資金,就要慢慢減月供金額,甚至停。
------------------------------------------------
Q17206:
你好龔老師,本人今年25歲,月入8.3萬,現有150萬現金
希望之後開始穩健投資,有意1-2年內買樓收租。
現有月供股票5000 盈富,2500 煤氣,2500 領展
請問買樓收租現在是否時機(目標500萬的樓)應如何進行資產配置準備買樓
每個月能儲4萬
龔成老師:
你可以開始月供股票,原理就是儲股。
其實我地要累積財富,就是一個配置的過程,你長遠應建立一個優質的資產組合,物業、優質股都是典型的資產。
你可以開始留意樓價,如果樓價調整少少,已經可以入,中短期香港經濟不穩,樓價可能會波動,但長遠仍是向上,你可以把握這機會。
同時,由於你現金足夠,可以同時進行股票投資,一邊月供,一邊當見到大市回落時,買入優質股。但首先要考慮,你打算買樓的目標金額及首期。
------------------------------------------------
Q17207:
Hello龔成. 我上年大學畢業 對買賣股票零知識. 我銀行都有儲蓄,唔想就咁放係到。
對於我呢d新手 係依家呢個時勢係咪買盈富基金最保險?
同埋有冇d入門資訊岩新手睇下?我想呢段唔洗返工時間搵下少少錢。
龔成老師:
你要做三樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。你可以睇《股票勝經》。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平。你可以先了解下不同的收費。
第三,將每月的部分資金,去做月供股票,供盈富(2800)。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過半年,有知識及少少經驗後,就可以利用你手上的資金,其中一部分,去投資股票。
------------------------------------------------
Q17208:
龔sir,你好!
1.我現時月供2800,1211 各$2000 及 66,388各$1000,由於我9月開始可加大月供金額至$9500,請問我該如何分配?應加大現有股票的供款額,還是加多一隻股票?
2.我見部分股息可選現金/實物,請問實物的意思是甚麼?
謝謝!
龔成老師:
1)如果你這刻現金不多,其實應該留有現金,因為現金在我地投資有一定作用,如果大市回落,你有現金就可以把握到機會。
如果你本身現金已有一定數量,就可以加大月供,你可以首先加大盈富(2800),之後再加大港鐵(0066)、港交所(0388)至$2000。
2)即是「現金」或「股票」的選擇。這就是「以股代息」。
例如佢派息$1000,如果股價是$20,你就可以選擇要$1000現金,或50股股票。
如果想以股代息,就要考慮3個因素:
首先,你一定要長線投資的,因為佢會派碎股比你,所以你最好以不斷儲股,每次都收息的模式進行。如果你不怕有碎股,基本上可以進行的。
第二,只有優質股才可進行。這股可以的。
第三,換股價合理,這股現價合理,可以進行。
------------------------------------------------
Q17209:
老師你好!想問下點睇00775 長江生命科技嘅潛力。
另外想供股的話,舜宇與阿里巴巴二選一哪一
Thank you
龔成老師:
長江生命科技(0775)從事產品之研發、製造、商品化、推廣、銷售及投資,涉及的項目和資產涵蓋保健、醫藥及農業相關業務三大範疇。
農業相關業務和人類健康分別佔總收入約4成和6成,農業相關和保健產品業務這2個範疇,相信未來會平穏發展。而集團主要潛力,來自醫藥研發部份。
這部份成功會有好高回報,失敗就變得好差。這部份會係潛力所在,同時也是風險所在。投資只要控制注碼,都可以投資。
至於舜宇(2382)同阿里巴巴(9988)兩隻都是有質素的股票,都可以投資,如果以現時的平貴度,去考慮投資值博率,舜宇會略好。
------------------------------------------------
Q17210:
你好龔sir,之前上左5月的股票班令我獲益良多,多謝你!
其中改變左一個既觀念係買入一隻股票希望佢第二日升,而家真係好希望佢跌多啲,再入多啲貨先升。
但眼見而家個市況已經升翻唔少,有啲後悔當初無入多啲貨,雖然都係岩岩出黎做野無乜本錢。
而家有做下功課,填左幾份企業評估表,個心好希望啲優質股可以跌番落去合理價錢入貨。
呢排升市feel到自己無乜耐性,每日都睇幾次股票報價,心思思想入下貨,但又未去到平既水平,但又驚錯過左機會。你岩岩開始買股票有無遇過呢種情況?
而家唯有keep住月供先,同埋小注左必瘦站,領展同阿里巴巴
龔成老師:
你已經行在正確的方向,只要在心理上,仍未完全做到價值投資及長線投資的重點。
心理因素影響好多散戶,這要長時間訓練,耐性都是投資其中之一的關鍵位。
現時大市處合理區,我地唔會知識之後股市的升跌,而我地就可以利用平貴水平,去作出投資,睇下點樣可以做好配置。
你現時保持月供先,如果現金過多,的確可以入翻少少貨,因為整體大市是合理。你現時持有及月供的,都是有質素的股票,可以長期進行。
------------------------------------------------
Q17211:
老師,本人30歲,因之前買左美容plan每月要還數千元卡數,之前買股票蝕左10萬,公務員,月入2萬,要交租金5000,手上只有13萬流動資金,無咩其他資金,應該如何好好運用僅有嘅資金?謝謝你
有朋友推介我買認購證,你覺得如何
龔成老師:
我相信你未有正確的理財及投資概念,你之前買股票,可能是由於炒賣,令你出現虧損,而你應該從投資基本功做起,至於認購證,這是一些衍生工具,我20年前都有玩過,當時輸好多,之後唔再玩。
首先,你要增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。
另外,投資是一個長期累積財富的過程,你可以將每月的部分資金,去做月供股票,供盈富(2800)$3000一個月。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
------------------------------------------------
Q17212:
你好龔Sir,本人今年53歲現在有5號大約10000股,原本用來收息退休用!
如果可以每月供7-8k作供股退休用.有什麼股票建議。另外如5號轉去1號/1038,可以嗎?
龔成老師:
如果你組合只集中在匯豐(0005),這就會出現集中風險,因此,你要做適當的調整,長遠慢慢減少匯豐,建立一個平衡的組合。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、置富(0778)、陽光(0435)都可以。至於長建(1038),都是另一隻適合的收息股。
如果你每月有$7000月供股,可以$3000供盈富(2800),$4000供收息股,上述的都可以。
投資收息股,可以作為財富分配的一部分,但不建議將全部資金都投資,因為一定要留有一定的現金作防守,以備不時之需,以及若大市下跌,可以買平貨之用。
------------------------------------------------
Q17213:
老師你好,月供股票左4個月,現31歲,每月儲到約10000蚊, 4000保留現金。其如6000蚊月供。
見到你多推介 1211,2800多。所以選月供組合如下
1211 比亞迪 $3000
2800 盈富 $2000
2822 南方A50 $1000
1. 請問組合/比倒上 可以嗎?
2. 政府派1萬,打算都係投資用。 建議分拆 10個1千/5個2千 咁繼續月供 定 留後備1手買? 如1手買 1211 合理價 大約係幾多錢?
3. 年尾可能會多約2000蚊 做月供, 建議直接現有組合加比例 定供多隻新既?
龔成老師:
1)比亞迪(1211)是潛力股,你可以月供,但你都要明白這類股,風險會較大,你要衡量翻自己的風險承受能力,這股如果佔你供的一半,其實有點多,你睇下是否要調整到$2000。
2)其實$1萬唔算多,不如留現金,等機會入市,月供就可以保持進行。
比亞迪$5x是合理價,可這價可分注投資,但就唔好過多,去到$40以下就開始平。
3)你可以加盈富(2800),當然如果有心水股,都可以加入。
------------------------------------------------
Q17214:
你好,我接近完全冇投資經驗,多年前跟人買過一次股票,有輕輕留意下自己個mpf
三十幾歲,而家收入約15000,想睇你d書學投資或理財,請問應該由邊本開始睇呢?
龔成老師:
你要盡快開始理財,因為你現時仍處於一個財富增值的好黃金年齡。你要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先。
你可首先睇:
《80後百萬富翁》
《股票勝經》
《財務自由行》
之後再睇其他。
------------------------------------------------
Q17215:
龔成你好,我是一名新人。很感激第一個遇到的股票資深人士是你,喜歡你的說話方式和分析技巧。令我更容易了解股票的資訊。
想請問你如何看00981 中芯國際的前景?
龔成老師:
你要保持進步,投資是一個長期學習過程,多增加自己的知識。
中芯國際(0981)這股的確有增長力,但股價上升得有點誇張,這刻唔建議進取投資。前景雖然正面,但現價已貴,如果有貨可持有,無貨的話,最好回翻D先。
------------------------------------------------
Q17216:
你好,龔成老師
我有問題想請教一下。
現在我有幾個投資在做
1.兩隻收息基金在做。
總投資10萬 (每月$500利息)
2. 股票有3988 10手,823 2手,3號煤氣 1手。 每月有$2500可作投資。想請問我拎黎投資823 定 3140 好(長遠投資) ? 謝謝
龔成老師:
1)基金有好多類別的,你要緊要睇翻這基金的資金策略,所投資的項目是否有質素,以及你看好,另外,過往長期的表現如果。
如果有質素,就可以長線持有。
2)你持有的都是有質素的,但中行(3988)只是收息股,增長力不強,你要明白這點。
如果長線投資你可以考慮領航標普五百(3140),這是追蹤美股的基金,可以助你組合有平衡的作用,同時有平穩增長的效果。
------------------------------------------------
Q17217:
Hi 我係今年fresh grad,而家月入21k
想每個月$3000供金沙,中銀香港同SHK, 各供一千,另外有$3000比我自己去買美股,冇固定選擇
主要想係每次掉既時候買入美股增值,你覺得呢個plan會唔會有風險呢?
龔成老師:
上述所月供的,都是有質素的股票,你可以進行月供,長線投資,不過,這幾隻的增長力不強,而你這個年齡,可以同時配置一些較有增長力的項目。
至於美股,都可以投資,只要是優質,你熟識,就可以。
但你要記住,長線投資才有真正的增值效果,唔好做中短期買賣。另外,適當地持有現金,等機會,都是好重要的策略。
------------------------------------------------
Q17218:
老師您好,我是30出頭的主婦,胡亂買左啲股票後就冇理會到。
2011年:一手騰訊,8000股3888
約5年前入了:397,717,816,1428,1788,2309,459,1428,呢啲都係少量。
535:20000
1668:14000
8083:16000
1313:2000
1918:3000
2007:2000(送6098:229股)
3333:2000
請問老師以上邊啲應該放,邊啲應該留?
另外有2m定期即將到期,如果想進取增值財富,應該一半買債券一半股票嗎?
有小朋友,現樓已供完,現樓有意之後收租再另買三房單位。(因現樓係祖傳唔換得樓)
我先生現收入只有28000,再加不固定收入幾千,另外之前借左1m俾人,有機會呢一兩年會收返。請問老師可推介方法增進財富嗎?如果買股應該點樣買邊隻。十分感謝你。
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
所以,你唔好太大比「買入價」這個因素影響,反而要睇翻企業的質素,以及佢在你組合中的比例,如果較優質的,持有比例可較高。
你現時的組合好散,同時部分的質素一般,要處理。
權威金融(0397)、英皇證券(0717)、伯明翰體育(2309)、美聯工商舖(0459)。賣出較好。
另外,唔好太集中在內房股。
你定期的$200萬,建議你大部分做定期,只將$30萬-$50萬投資股票好了。因為你現時的投資知識不足,唔建議你太進取。
可分注或月供盈富(2800),這是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
另外:銀娛(0027)、恆基(0012)、中銀(2388)、港鐵(0066)、煤氣(0003)、粵海(0270)、領展(0823)、港交所(0388)、希慎(0014)、太古地產(1972)等,你可以了解下這些股票,然後從中選股。
同時,你要多增加股票知識,等你有知識後,之後先增加金額投資。
------------------------------------------------
Q17219:
龔Sir你好,我系新手,之前從來冇買過股票,近排經朋友介紹買左15000股中國銀行#03988等收息+50股京東#09618,見中銀股價升幅都好少
我可以再加碼入多d賺息後賣出,投資其他股票?
加上可投資資金也不多,還是你有什麼建議?
盼覆,謝謝~
龔成老師:
首先你要明白,買股票就是買企業,另外,唔好著重中短期股價,要睇長線。
同時,買股票不是炒賣,是長期的財富配置過程。
中行(3988)有質素的,不過只是收息股,唔好對股價有太大期望。
京東集團(9618)都有質素的,是潛力類別,不過風險就略高,唔建議持有過多。
你應該思考下,自己想的財富組合如何,現金的比例多少,應該投資那些股票,盈富(2800)對初階者來講,是很好的選擇。
------------------------------------------------
Q17220:
老師您好!本人是新手 我剛買入三隻股票
1)2388 $24.15
2)2628 $15.74
3)939 $6.13
每隻各買咗5000股 想請問老師 呢三隻股票派息後可以長揸嗎?有升值潛力嗎?
同埋止蝕價應該定幾錢?
非常感謝老師指導
龔成老師:
這3隻都是有質素的股票,但你要留意,都是銀行及保險,同金融類有關,其實會有集中風險,你要明白這點。
另外,派息前後其實是一樣的,因為除淨後股價會調整,所以派息前後不是影響持有與否的因素。中銀香港(2388)的獨特性較強。而建行(0939)只是收息股。
至於止蝕,最重要是睇企業的質素,如果質素轉差,就會立刻止蝕。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。