提起昂坪360纜車 Ngong Ping 360 Cable Car，大家可能會諗起幾年前嘅一句歌詞：「郁郁吓會停咗。」不過呢句歌詞相信已經成為歷史，因為昂坪纜車響舊年全年嘅平均可靠度，原來有成99.93%咁高，相等於每日八個鐘頭嘅營運時間𥚃面，平均只有唔夠一分鐘嘅延誤。相比於一D故障仲密過六合彩派彩嘅公共交通機構嚟講，呢個成績確實係值得大家俾D掌聲嘅。
唔少朋友以往去搭昂坪纜車，往往一去到東涌，就會被站頭果條超長嘅人龍，嚇到要調頭走。為此昂坪360將會由下個月一號開始，每逢週末同埋公眾假期，推出專為本港居民而設嘅實名制預約購票，務求縮短排隊買車飛嘅時間。另外，除咗原有嘅本港居民生日免費搭車優惠之外，昂坪360亦會響每年嘅3月同6月，為身份證號碼分別有「3、6、0」其中兩個數字嘅本港居民，提供免費來回乘搭標準纜車車廂嘅優惠。隨行嘅最多三位朋友，亦可以有八折票價優惠。身份證號碼有齊「3、6、0」三個數目字嘅本港居民，仲可以額外拎到一張昂坪360禮品店嘅現金券𠻹！
嚟緊昂坪360將會響復活節期間，推出一系列嘅主題活動。遲D仲會邀請一D網絡紅人，新晉藝術家同埋展能藝術家，為昂坪市集設計一系列嘅打卡牆。唔知佢哋最終揀嘅人選，到時會為昂坪市集帶嚟乜嘢新色彩呢？
#See生活
#昂坪360
#香港人優先
#真係好耐無聽過昂坪纜車有故障
#做得好嘅地方應該得到讚賞同埋肯定
#唔知佢哋會揾邊D網絡紅人呢
#大家嘅身份證號碼有無360呀
