Search
唔好意思，我又去咗APT.。
因為前日無論入去或者出嚟嘅時候，我都俾門口嗰啲鬆餅同埋士工吸引到眼都定埋。於是尋日我又去買個鬆餅嚟食。
魔鬼呀，真係非常魔鬼。
正常嚟講，我係唔會隨便食啲咁肥膩咁甜嘅嘢嘅！因為我嘅衫着到加大碼咁滯，但係真係控制唔到。
一口咬落去，我竟然容許啲介乎於溶咗與未溶之間嘅朱古力，癡喺我塊面嗰度，而我又寧願食完先至抹面！呢個行為，應該係五十幾年前，即係我幾歲嘅時候先至做嘅！呢個鬆餅真巴閉，竟然令我尋回童真！
$22一個，比Starbucks貴小小，但係食落去你就知， Starbucks個鬆餅好似食空氣咁，當然我哋都需要空氣，但係空氣只係生存，美味先至係生活。
#何嘉麗callmegaga #何嘉麗 #為食路上
#堅道徘徊 #閣麟街 #AptCafe #小店有情
#朱古力鬆餅 #空氣只係生存美味至係生活
#大家都係年青人梗要支持
中環搵食艱難，想搵啲好似深水埗嘅鋪頭，比較難。一係就貼地到係大排檔，一係就嗰啲又貴又唔平嘅。但係如果你鍾意飲咖啡，就真係一街都有。
今期大力推薦係呢間APT Cafe。就喺閣麟街34號，即係斜路行落小小。食晏時分，人多嘅。但係排隊都係值得嘅，因為好食。
簡單可以要杯咖啡，加件scone或牛角包，有時間，又想坐下嘅，佢樓上樓下加埋都唔少位喎。我就梗係坐低慢慢歎啦。
叫咗份蟹肉三文魚包，食物嚟到嘅時候，真係歡樂喜慶，顏色鮮艷，睇見已經開心，食落去就更加心花怒放。真係好味，無論係個醬汁定係啲材料，都好好味。唔平，但係俾得順氣。
幾個年青人夾手夾腳搞嘅生意，支持。如果你喺附近返工，可以去試吓喎；如果唔係，咁岩路過中環，都可以去飲杯啡，食個包。
#何嘉麗callmegaga #何嘉麗 #為食路上 #堅道徘徊 #閣麟街 #AptCafe #小店有情
#大家都係年青人梗要支持
