［今日寫呢啲］呢兩日多咗好多Patreon，多謝大家先。相信都同隻理文化工746有關。你即使Facebook Page都見有啲人留言話多謝，歡迎你去驗證下我有冇做媒。我其實都幾意外有咁多人買。BTW，我從來冇買賣過呢隻嘢，除咗收Patreon訂閱費，亦冇任何人畀物質或非物質利益，我至少5年都冇見過管理層（公開記者會唔計啦大佬）。
TLDR：有冇聽過個故事？有條友買咗隻龜返屋企，諗住煲湯。點知嗰隻係神龜，叫條友放佢一馬。條友於是在煲水上面放對筷子，然後同神龜講：好啦，你爬到過對面，就唔煮你。神龜心諗你即係耍我啫？但反正唔爬都係煲湯，唯有照爬。點知又畀佢爬到喎。條友就拍手，好嘢，神龜即係神龜。「不過，你可唔可以試下爬返過起點？」
＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1700人訂！ 畀年費仲有85折
＝＝＝＝＝＝＝＝＝＝＝＝＝＝
理文化工真係交足貨，由3月出全年業績開始寫（$3.8），4000字文都寫過，6月頭話你知7月出盈喜（$4.3），早兩日就出埋，兩日升兩成幾，而家$5.78。仲要話明今年純利至少有7億，半年就做咗5.6-5.9億。仲有講埋我最怕畀嘅目標價，$5.2-$5.6，都到埋。仲要平時有時得一萬幾千股成交，早兩日過百萬股，你有得走（咪講笑，買得十幾廿萬嘅，平時都唔係咁易走）。
點睇，都係神級表現，回報未必最勁（你可以去買場波），但成個過程，時間，啲數字都畀晒。等於好似我估場波中波膽仲估埋入波先後次序中埋邊個入咁。
講呢啲做乜？唔係攞威，昨日攞咗啦。而係調低大家期望。新讀者當然係諗：幾時有下一隻？大佬，場場有世界波咩。我都想，但真係唔到你決定。咁你真係想下個月又有一隻咁嘅嘢，我估未必做到，咁你覺得好失望嘅，都冇計。你即係叫我爬返過起點啫！
咁到底係追渣定沽？未買好唔好買？幾時買？買咗嘅使唔使沽？幾時沽？呢啲問題，文入面都會講。
至於維他奶345，冇乜補充，要寫嘅寫咗。睇Patreon嘅知道點處理了。都係嗰句，你可以思考下，佢同Nike嘅case嘅種種異同。
仲有滴滴打車，早就唔睇好，但當然我唔會預到上市兩日就畀大陸政府大力咁打。「不過打破唔到螞蟻未出世就畀人流產嘅記錄」
政治嘅嘢，個個專家，個個都直通中南海 識晒Deep State 住美國幾百年研究咗中國人幾千年，任你講。但，都可以留意幾樣嘢。
首先，有話無鬼聊，將個App下架之嘛，要用嘅一早單撈咗啦，而家都未單撈嘅，永世都唔會用啦，零影響。表面係咁，但，背後嘅姿態同訊息先重要嘛。
滴滴罪名係乜？我知係徐懷鈺其罪，但都總要作個不浪漫罪名嘛。罪名係乜？好似係冇的。不過，呢啲亦係表面。根據我理解，應該係因為滴滴先斬後奏，明明叫佢延遲上市，但佢都照樣夾硬去馬。（但不能證實，所以政治嘢就最煩，好多嘢永遠都不能驗證，只係鬥噴口水）
更好玩係，而家直頭話搞新法律，用意都係唔想啲公司去美國上市咁。原因？又係唔知，有人話數據，但我估唔止，你可以睇下之後係咪其他冇咁多數據嘅公司就放行？背後諗乜？文入面講
而成件事最好笑係，明明之前係美國想將啲中概股除牌，而家就到中國唔想啲公司去上。即係大家情投意合？定會抱拗頸，到拜登年代又要保住呢啲公司唔好離開美國？好玩。
唔講政治，真係金融嘅implication：兩個。第一，字節跳動ByteDance，唔使講都係香港上市啦。然後就係第二：港交所388就肥了。不過留意，第二呢回事，只係other things equal嘅情況。咁你政府咁打壓科企，對佢地盈利有影響，當然亦都對股價對股市有影響啦。至於點解美國嘅打壓又冇咁落力？就文入面講了。
總之，高難度動作呢啲嘢，你估話出就出咩。
＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1700人訂！ 畀年費仲有85折
＝＝＝＝＝＝＝＝＝＝＝＝＝＝
