《屯門工廠區內超級隱世鵝煲火鍋。YKK建榮》
呢排多咗約朋友返屯門食飯，以前成日覺得屯門冇乜好嘢食，但係最近真係覺得原來屯門都幾多隱世美食，要靠朋友帶我去食。
呢間大排檔其實又係響工廠區，唔知係咪工廠區嘅鋪租平？不過今次就係近屯門西鐵站另一邊，即係近天后路附近嗰邊嘅工廠區多啲，重點係入到去有d隔攝，如果唔係朋友帶我我真係唔識路🤣
既然咁難搵但係朋友都一定要帶我嚟食一定有啲嘢，原來佢係要帶我去食鵝煲打火鍋！雞煲打火鍋我就食得多，鵝煲我真係未食過😅我哋搵咗一輪最終都去到！
等上菜期間見老闆幾好傾，我就同老闆傾幾句，原來個老闆就係之前橋底雞煲嘅老闆之一，拆夥之後有朋友搵佢出山，於是嚟咗屯門工廠區呢度開！
老闆仲話佢哋的鵝係每日新鮮响大陸即日劏運送落嚟香港，$248有半隻鵝在成個煲內簡直抵到爛！搞到我都幾期待🤣燒鵝就食得多，鮮鵝煲真係第一次。等緊期間我地點左啲小食，尖椒皮蛋正過譚仔的N倍，炸韭菜餃大大粒超足料，Wasabi青瓜有創意得來又幾好食喎！估唔到係大排檔可以食到咁特別嘅前菜😝👍
.
話咁快煲鵝就到啦！其實同普通雞煲做法一樣都係已經煮好放過入去，一熱返即刻食得，原來就係同雞煲同一個道理，食完佢鵝煲之後，一陣仲可以落湯再打邊爐，講真我都幾期待！嘩，佢d鵝真係半隻足，大大煲都擔心我哋會食唔晒，係食極都仲有咁😂，鵝肉醃得非常出色，令到肉質非常鮮嫩和入味，又有咬口，一啲都唔會柴，鵝皮連肉一齊吃，只會覺得佢好香唔會覺得肥膩，而且好明顯係新鮮嘅鵝，一啲雪味都冇！👍我哋點左小辣，醬汁好惹味令我哋忍唔住一舊接一舊，食下食下啲鵝油咇哂出嚟，超級香呀！😋
.
其實食完鵝煲我哋都飽得7788，但一場黎到冇理由唔打埋邊爐掛，於是我哋就響充滿鵝油嘅煲加湯再打邊爐，佢啲火鍋料又係靚料而且都算好抵食，好似日本巨型廣島蠔$68有八隻，隻隻都有我半隻手掌咁大，而且好鮮甜冇喳一啲都唔腥。仲有佢新鮮本地手切牛頸脊（$198）牛味超濃！手打墨魚滑（$58）正正常常，很彈牙！估唔到佢呢度連脆肉鯇（$68）都有！😱超級新鮮和爽口😍重點推介係佢嘅自家製響鈴（$32），呢個一定要食！👍，我從來冇食過咁正的響鈴😱👍，係可以用「鬆化」去形容，係好似曲奇或者酥餅嗰隻鬆化喎！而且一啲都唔油，出面好多自家製響鈴炸完係會有好多油，我問老闆點樣做到？佢笑笑口話係商業秘密㊙️
.
食完我哋真係捧住個肚走，呢餐最大嘅感受係老闆對食物非常用心和認真，對自己嘅出品都好有信心，食材好新鮮，而且食物好得，尤其是係嗰個鵝煲，食完真係念念不忘！😋感覺好難喺香港食到咁有水準的鵝煲，唯一美中不足真係交通問題，因為佢嘅地點比較隔攝和難找，我身為屯門人自己入到去屯門工廠區都要搵左一搵，令到佢真係成為屯門嘅隱世美食了，不過老闆話佢會諗辦法解決呢個交通問題，讓更多人可以吃到佢嘅美食！👍😋
—————————————————
店名:YKK建榮鵝煲火鍋
環境🏝：5/10
服務💁🏼♀️：8/10
價錢💰：8/10
食物質素🍝： 9/10
整體🙆🏻♂️：7.5/10
地址:屯門新力街3號地下
