愛情模擬器（上）
「點解無論我幾畀心機、幾努力，玲玲都係對我不冷不熱？」我一路飲酒，一路問班兄弟。
有個兄弟問：「係咪佢有鍾意嘅人啊？收你做兵咋？」
我答：「唔會囉，玲玲都冇要求我做過乜嘢，而且佢有時都對我幾滿意，但有時我又唔知點解激嬲佢……」
「係咁㗎啦，女人心，海底針。」兄弟拍吓我膊頭。
呢個時候，其中一個兄弟阿聰突然話：「唔一定喎，要了解女人心，都唔係好難啫。」
阿聰成日搞埋啲古怪發明，係我哋之中最聰明嘅一個。
佢拎出一部手機型嘅物體：「呢個係我最新發明嘅『愛情模擬器』測試版，係一個人工智能，你輸入玲玲嘅資料，例如社交媒體、聊天記錄，愈多愈好。模擬器就可以模擬玲玲嘅反應，令你測試出最適合嘅相處方法。」
有個兄弟大叫：「嘩，我拎嚟模擬我老闆，我咪升薪加薪？」
「商業嘢太複雜啦，大家都講利益，模擬器暫時只可以用喺愛情方面。」阿聰答。
我有啲猶豫：「人工智能喎，我咁蠢，佢會唔會呃我㗎？」
阿聰笑一笑：「我已經設定咗，人類問任何問題，佢只可以如實回答，唔可以講大話。」
喺我嘅哀求下，阿聰將模擬器借畀我。
「你好，我叫小模，主人希望我模擬邊個？」
我輸入玲玲嘅資料，小模就講：「模擬成功，你可以設置唔同嘅場景，同我講嘢，我會模擬出玲玲嘅反應。」
我就問：「玲玲，最近XX街新開咗間西餐廳，要唔要去試吓？」
模擬玲玲答：「萬事萬物都要講緣份，我同嗰間餐廳，冇咩緣份。」
我心中狂喜，冇錯啦，玲玲自命文青，講嘢都文藝啲，而且唔鍾意食西餐。
我咁樣講，只係試探吓個模擬器準唔準。
睇嚟模擬器準確度唔錯，然後我講：「你有冇去過『飛鳥餐廳』？可以睇雀仔同睇日落，畫面幾靚㗎，嘢食都唔錯。」
飛鳥餐廳就係我真正準備約玲玲去嘅地方，無論景色同食物，我都覺得玲玲會鍾意。
模擬玲玲答：「聽落都唔錯，不過好似……唉，差一絲絲嘅緣份。」
我難以置信咁問：「喂，玲玲唔鍾意呢間餐廳咩？」
小模解釋：「根據模擬結果，玲玲鍾意呢個餐廳。不過呢啲小事，人嘅好多時都係根據即時感覺去反應，玲玲嘅即時感覺唔夠好，可能你要換一個表達方法。」
我試咗二十個問法，直到我講：「落霞與孤鶩齊飛，秋水共長天一色，我哋有冇緣份，一齊喺落霞之下，感悟人生嘅真諦？」
玲玲終於答：「好啊，幾時去？」
搵到開始下一次約會嘅方法，我鬆一口氣。
我呢種平凡男人追女仔就係咁，女仔講Feel，Feel有時好唔實際，同一個意思，用唔同方法表達，可能導致佢突然好有Feel，或者突然冇Feel。
玲玲作為文藝少女，性情更加飄忽，有時我講錯一句嘢，佢就冇晒Feel。
不過，我就係鍾意佢呢種不食人間煙火嘅態度，唔拜金、唔貪靚仔，同一般女仔好唔同。
跟住落嚟，我繼續同小模排練約會嘅流程，只要一句話令玲玲唔滿意，我就重新構思過。
試咗幾十次，我終於搵到完美嘅答案，將「正確」嘅台詞寫落本簿仔度。
好快去到約會嗰日，玲玲出現，我努力做出迷人嘅眼神：「夕陽，落下，但我哋今日嘅緣份，又再開始。」
玲玲雙眼一亮：「你有啲唔同咗。」
嘩，佢嘅反應，同小模嘅模擬結果一模一樣。
我信心大增，根據簿仔上嘅答案，將台詞講晒出嚟。
食完飯之後，玲玲話：「我覺得，你好似好了解我，好似同以前唔同，好似……有前世今生嘅緣份。」
我個心跳得好快，一手拖住玲玲隻手：「因為我鍾意你。」
呢句之前冇模擬過，純粹衝口而出，點知玲玲面色一冷：「緣份唔係呢個意思。」
唉，我都係太衝動。
呢次約會後，我更加努力用小模，每次約會前，都同模擬玲玲排練好晒所有台詞。
約會咗幾次，玲玲對我嘅好感大增，仲開始主動約我。
我嘗試同模擬玲玲表白，模擬玲玲居然應承咗我！
咁即係話，我可以同真正嘅玲玲表白啦。
「玲玲終於會做我女朋友啦。」我捉住小模高聲歡呼：「我大概都捉摸到玲玲嘅心思，之後就唔駛再靠你啦。」
下集：https://bit.ly/2CMUPRa
將專頁設定為「搶先看」/ "See first"，最新故仔馬上睇！
獎善罰惡手錶：https://goo.gl/19dgzV
兩個只能活一個：http://bit.do/feKot
#短故 #短篇 #小說 #陳美濤 #廣東話 #粵語 #tomatochan #愛情模擬器
