每晚自肥tv之前，還有一個叫《擊戰》的節目，佬編一直有睇。
《擊戰》是一個關於女鼓手比賽的真人騷。簡單來說，就是女鼓手的全民造星，低budget版本。由最初的十個參賽者，到現在foul剩六個。
兩個星期先foul都得四個，以真人騷的標準而言，劇情進展實在太慢。但作為一個純樂器演奏的比賽，每晚一刀不剪地播兩、三首歌，是對參賽者及觀眾的尊重。
睇得呢個節目，唔係鼓佬，就係夾開band，最想睇的，其實就係其他人點玩，玩成點。導師、主持、旁白、評判客客氣氣，或者不夠juicy，但對於玩開樂器的人來說，卻很親切與窩心。
玩樂器，大部分時間都是孤獨的旅程。人越大，越難搵到一班人得閒玩。當興趣玩，賺唔到大錢，但一樣要花時間練。打鼓仲衰，件樂器太大件，屋企練pad又嘈，有時表演慾上頭，想show下俾其他人睇都難。
難得電視有打鼓節目，對於鼓佬而言，其實就是難得「演下嘢」的機會。同人一齊睇，解釋下術語，表達下評價，又講下自己會點打，算是滿足了些少表演慾。
說起來，細個有個夢想，是在某個角落開間live music bar，類似以灣仔The Wanch的，但賣多啲好飲嘅手工啤。開放俾人表演，只要有人缺鼓手時，就自己落去jam。雖然應該冇乜人鍾意聽啲亂jam嘅嘢，就當係另類自肥吧。
