罪犯要考牌（上）
「喂，你爭我嗰三千蚊，仲唔還？」
「呢個月我仲未出糧，寬限多幾日。」我嘗試用最誠懇嘅語氣講。
「你個死飛仔爭落周身街數，出糧都無用啦。我唔理，總之聽日你唔還，我就上你公司嘈。」
我頭都大埋，我都搞唔清楚自己點解爭人錢，咪用吓用吓、借吓借吓.......總之就一塌糊塗。
我渾渾噩噩咁行，見到前面有個著高踭鞋嘅女人，拎住個手袋。
天已經黑晒，周圍無咩人，我個袋度咁啱有把鎅刀.......我諗佢身上應該有幾千蚊？
我用頸巾包一包自己塊臉，用鎅刀指住個女人條頸，惡聲惡氣咁講：「拎晒你啲錢出嚟。」
女人花容失色，張開口諗住尖叫，我即刻將把刀移近：「唔准出聲！」
呢個時候，我隻手腕突然一痛，把刀俾人搶咗，個女人即刻閃開，有咁遠跑咁遠。
我回頭一望，見到有個鬍鬚男，一手拎住我把鎅刀，一手拎住一張證件，喺我面前揚一揚。
我萬念俱灰，人生第一次打劫，唔止失敗，仲要遇到警察。
點知鬍鬚男問我：「你張證呢？」
「我.......我無證啊。」我點解會有證？你係警察啫，我又唔係警察。
「哦，無證行劫，怪唔知得手法錯晒啦。」
鬍鬚男捉住我隻手臂：「跟我返去啦。」
我完全聽唔明，我以為自己俾人拉咗，垂頭喪氣咁繼續行。
點知，鬍鬚男無帶我去警署，而係帶咗我去一棟大廈。
鬍鬚男同我講：「你係咪想做一個劫匪啊？呢個城市唔可以隨便打劫。」
「我知錯啦。」邊有城市可以隨便打劫啫？
「想做劫匪，你要先修讀劫匪課程，然後考牌，考到牌先可以做劫匪。」
鬍鬚男再拎張證件出嚟，我先望清楚，證件上面有一個卡通樣嘅賊？
鬍鬚男沾沾自喜：「劫匪牌好難考㗎，千裡挑一。如果你無牌犯罪，會成為全城罪犯嘅公敵。」
我愈聽愈糊塗：「罪犯嘅公敵？」
鬍鬚男解釋：「如果全城嘅賊、殺人犯都要對付你.......你自己想像吓啦。」
我忍唔住問：「你啱啱點知我無牌行劫？」
「一睇就知啦，劫匪班第一堂就有教，唔好用利刃貼住對方條頸，否則好易唔小心割喉，打劫變殺人。」
鬍鬚男循循善誘：「一次打劫最多一萬幾千，為一萬幾千而殺人，上報紙好樣衰㗎。」
我呆一呆：「咁應該點做？」
「好似你啱啱打劫後生女，應該用把刀對住佢塊面，保證佢咩都聽晒你話。」
鬍鬚男拍吓我膊頭：「仲有好多嘢，你都係上吓堂啦。」
呢個時候，我哋已經去到接待處。
職員微笑：「先生，有咩幫到你？要登記上堂，定報名考試？」
職員指住身邊嘅廣告牌，上面有各種各樣嘅堂，包括街頭盜竊、街頭搶劫、入屋爆竊，甚至係.......殺人。
我完全唔敢相信我嘅眼睛，明明前幾日先睇完新聞，話呢個城市嘅犯罪率好低。
「咁明目張膽，唔會俾人拉咩？」我忍唔住問鬍鬚男。
鬍鬚男細細聲答：「聽講，老闆同上面有啲關係㗎。」
我都山窮水盡，諗諗吓，打劫都唔錯。
而且，鬍鬚男制伏我嘅身手咁俐落，我都好想學。
不過我好快諗到一個問題：「我無錢上堂。」
「呢排我哋做緊優惠，免費登記，出席率達到80%就半價，通過考試費用全免，學費可以借Grant Loan。」
職員遞咗張宣傳單張畀我：「好多時想做罪犯，都有財政困難。我哋仲有低息貸款服務，成績愈好，利息愈低。」
我半信半疑，但都登記咗成為一個「劫匪學徒」，當然都借咗少少錢啦。
第一堂就係「劫匪的原則」，唔准打劫細路、孕婦同殘疾人士。
本來我覺得好好笑，都做得劫匪，邊度仲講良心。
但係老師話，呢啲人身體較弱，好易出意外，萬一出咗人命，就麻煩啦。
我忍唔住問：「隔離仲有殺人教學班哩。」
老師解釋，殺人，一定喺私人地方殺，可以清理痕跡；但打劫好多時係街頭，萬一死咗人，邊有機會打理？
老師總結：「殺人還殺人，打劫還打劫，就好似你明明煮主菜，結果整咗甜品，就唔係一個成功嘅廚師啦。」
下集：http://bit.do/e3D7D
我係一隻溝唔到女嘅吸血鬼：https://goo.gl/AuCDeQ
我隻狗係吸血狗：https://goo.gl/FnsHnW
#短故 #短篇 #小說 #陳美濤 #廣東話 #粵語 #tomatochan #罪犯要考牌
