【Moomin Cafe】 姆明一族陪你開餐！
姆明相信係好多人嘅回憶，雖然我未睇過亦都曾經誤以為姆明係河馬（Sor），但係由佢哋呢班咁得意嘅公仔陪住我進餐，又真係幾特別。
Moomin Cafe係日本引入，其後進駐到唔同地方（包括香港），我今次去嘅呢間係最谷嘅分店，老實講我係經過望比佢吸引咗入去，除咗姆明其他我都唔知佢地叫咩名。
餐廳門口好大個個Moomin Logo同埋姆明一族嘅紙牌，非常搶眼，餐廳內外嘅用色都好童話式（應該叫姆明色？），紅紅藍藍粉粉，而且整個設計佈置都跟足姆明嘅屋企，呢種故事還原式嘅餐廳真係令人無法抗拒，充滿童真。
Moomin Cafe 最大嘅特色係每張枱都有姆明一族嘅公仔陪你進餐，就算一個人食都唔會覺得孤單寂寞（啱晒我），而且每隔一段時間就會有店員走過嚟更換姆明成員，你仲可以挑選邊個陪你坐，正呀！
今次試咗姆明Latte、史力奇Mocha同埋姆明Pancake！雖然呢到有供應西餐，但係先入為主嘅我係覺得童話式餐廳應該係食甜品，所以就無試到。如無意外，Latte同Mocha都有灑上朱古力粉及咖啡粉嘅姆明同史力奇，而姆明Pancake有驚喜，鬆軟煙韌有口感，配料豐富，有果仁、水果、雪糕，忌廉等等！淋上嘅楓蜜糖漿凍熱衝擊，再配返啖咖啡，再同姆明傾下心事影下相（呵呵）。
食完都唔好急住走，餐廳隔離有間精品店，專賣姆明嘅紀念品，下至文具上至公仔音樂盒乜都有，如果我係姆明Fans應該會被吸乾，好彩啫！
雖然曼谷同香港都有Moonie Cafe，但係相比之下，曼谷嘅分店係香港分店嘅一半，但係香港嘅分店係全球最大，各有可取之處，鐘意姆明嘅你唔好錯過啦！
曼谷地址:
Moomin Cafe - Siam Center
240 Rama I Rd, Pathum Wan, Bangkok 10330, Thailand
香港地址:
Moomin Cafe - 尖沙咀
尖沙咀廣東道17號海港城海運大廈LCX 3樓32號舖
