《法羅婚禮-擺酒篇》
前日講完註冊之後，陸續有大地之友同我講想了解更多，今日就同大家講下喺法羅擺酒。我就以我自己擺酒間酒店做例子，等大家約略知道流程同價錢。
上年我喺Hotel Foroyar 擺酒，一共有50個賓客。當時我睇左幾個場地，最後被Hotel Foroyar 嘅草屋頂吸引住，一直幻想喺個草屋頂上行禮（呢樣一陣再同大家分享，如何將不可能變成可能），同埋個宴會廳有塊好大嘅玻璃，望住成個海景，最後就決定Hotel Foroyar。
決定左場地之後，就同酒店嘅event manager 聯絡。hotel foroyar 有好多大大少少嘅房可以book。少至十幾個賓客到多至600人都可以安排。場地租用費由2000kr至10000kr不等。（1kr=1.15hkd)。我當時就卜左兩間活動房相連，費用為5000kr。如果你決定喺個度擺酒仲會送一晚住宿畀對新人。
決定好場地之後，最關心嘅當然係餐牌啦。晚餐有三個course，前菜配白酒，主菜配紅酒同埋甜品配咖啡茶加cognac /baileys。開飯前仲有sparkling wine。所有嘅飲品包括酒精飲品都係無限添飲。價錢方面就係675kr一個人。酒店仲有另一個plan，就係晚餐後設有酒吧同bartender，酒精任飲，再喺半夜會有熱湯同麵包。每位賓客加多160kr，即係總共835kr。當時我選左835kr個plan，等賓客食完飯仲可以跳下舞狂歡狂飲，再到半夜餓有宵夜食，最後個party去到半夜2，3點先完。另外，仲可以喺晚飯開始前，預備d餐前小食畀賓客，一種小食每位賓客加20kr。我當時選左兩款小食、所以就每位賓客加40kr。如果你唔想要酒店嘅野食，可以就咁租個場地再叫到會。
而行禮地點，好似我上一篇所講，你可以選擇喺市政廳行禮。我註冊嘅時候都喺市政廳，不過當時就咁同大地之子簽紙，我父母都無出席，於是上年補辦婚禮嘅時候，我喺Hotel foroyar 補辦左行禮。當時我大膽咁問event manager 可唔可以喺草屋頂上行禮。佢話未有人試過，但應該可行。但喺草屋頂行禮有幾個問題，第一就係驚落雨（法羅群島全年三分二時間落雨），第二就係草屋頂係斜嘅，放唔到櫈，第三就係音響問題。落雨嘅問題係解決唔到，只可以祈禱🤣最後當日好好彩無落雨。至於屋頂斜嘅問題，最後唯有所有賓客都企🤣同埋大地之子親手幫我整左個可以放喺斜屋頂上嘅婚禮拱門。而音響問題，我就加左2000kr畀酒店幫我首喺屋頂set up音響。
至於場地佈置都幾頭痛。因為個酒店場地未佈置之前係似學校活動室。其實當地都有d場地佈置公司，不過就唔係幾靚。所以當時我係自己諗好想點佈置，再喺香港買d佈置物品帶返黎法羅自己做佈置。如果房間前一日無畀人book，你可以預早一日去做佈置。我好多謝我一班姊妹同屋企人，幫我佈置晒成個場嘅燈飾同backdrop。
其實法羅仲有好多唔同嘅場地可供擺酒，又或者如果你只有十幾個賓客，想簡簡單單食餐便飯，亦有d好有情調嘅餐廳可供選擇。
至於婚禮需要嘅化妝師、攝影師、花球、樂隊等等我都有去問過價或者有識人。化一個妝唔跟全日大概600kr，攝影師由15000-25000不等。花球大概800kr，3人樂隊大概19000kr 4個鐘，one man band 就8500kr。結婚蛋糕視乎人數而定，一個人約50kr。以上價格只供參考，唔同舖頭有唔同價錢。
好啦，講住咁多先：）如果你地真係有興趣黎法羅搞婚禮，可以再搵我，我再介紹d舖頭畀你地😊如果你想舉行一個不一樣嘅婚禮，我覺得法羅群島係一個唔錯嘅選擇❤️大家考慮下😉
婚禮backdrop價錢 在 潮擺Chill Decor. - Facebook 的推薦與評價
一對完美的新人，一場完美的婚宴，新人完全知道自己想要一個怎樣的婚禮佈置，我地 ... 準新人，可以佈署吓心怡的婚禮，一個經濟的價錢我們有28款backdrop可供選擇， ... ... <看更多>