作為一個好怕好女仔嘅女仔嘅麻甩仔,我要講幾句說話。首先佢响rest in piece事件後明明有一條流利英文專訪片段出過,令大家讚佢英文好。真英文好同扮ABC兩回事,我諗我識分嘅,佢條宣傳片剪晒所有講英文嘢出嚟,梗係滯啦!但properly讀得好好聽,Italy個解釋我第一次聽,覺得幾喜歡。
連詩雅係傻嘅。我有見過好多扮傻嘅女仔,係勁討厭勁反眼,但連詩雅唔係呢種,佢係真係好心直口快反應大。去外國,有鏡頭,啲反應再放大幾倍好正常吖,冇料到又話冇嘢拍。聽過有歌手本身好安靜、好專心音樂,有人想拍真人show,好,你拍呀。一個月後拍攝團隊發現冇嘢拍,要求佢同人鬧交!痴線咩!所以睇呢啲節目,仲唔調整下自己個觀感點可能呢。連詩雅份人又冇機心,又善良,又有同理心。係好貪靚,但咪玩啦,我唔認為人前素顏證實到啲乜價值。打理自己身體係愛自己方法一種,你唔打理就話人好花時間裝扮係咩道理?
係,佢係反應彈、好高音、講嘢有靚女音,咁又唔係死罪嘛?帶公仔去旅行呢啲,我認我會藐㗎,但我都有朋友帶playmobil 去周遊列國,你唔會,不等於人哋做就要批評吖~如果你知拍嘅對手係點,你自然知自己係乜嘢角色。平時如果我身邊有呢啲女仔出現,我都好可能即刻入咗一個位變到勁木獨勁冷漠,人嘅互動係咁,你咁女,我只有man少少,唔係一齊wee wee wa wa我自己都受不了。我都係近年先冇咁驚昆蟲,我咁大個人試過俾蜻蜓嚇到喊。乜都有人驚啦,你點知人哋做乜畏高啫?Shiga 係一個好人,又勤力,佢拍得都知自己係入咗個白痴位,平日嘅佢都真係咁傻,但以我呢啲咁易藐人扮嘢嘅人,我鐘意Shiga,佢個腦冇過濾講嘢係真係好好笑。扮晒嘢嘅人呢行大把,連詩雅其實就係真,所以俾人誤會,誤會都算啦,唔使鬧到飛天嘛,佢講多句英文你少咗條毛咩~「拍得就預咗」,係㗎!期待大家發掘到佢真好笑嘅一面😏鬧人嘅人好易寫千字文嚟發洩,我諗住將我嘅理解寫出嚟平衡下啫,一面倒俾人插不太公平。
戴頭盔:唔會捲入辯論,唔使留言話我知你憎佢,因為你憎佢不會令我憎佢😁
《原來我也是港女》
如果港女話題可以發電,人類便擁有一個可靠的永續性能源。
香港的精神污染指數偏高至極高,因此本土網絡文化,就是不斷尋找新的公敵,讓網民盡情批鬥或恥笑,藉此排解爆煲的壓力,逃避生活上的深層次矛盾。
最新的公敵,就是《野狼與瑪莉》女星連詩雅。
連詩雅與《力王》女星葉蘊儀拍攝旅遊節目《跟住矛盾去旅行》,行為表現被指為港女典範。
那如何才是港女?一篇傳媒專題《連詩雅十四大港女性格,你中幾多樣?》便列出十四項特質,我也忍不住替自己做一個檢查。
一,「永遠見唔到佢素顏」。化妝示人就是港女的話,等同開地圖炮轟散一整街的女人嘛,何況那是藝人在談自己拍攝節目的情況呢。在日本,女性出門化妝是禮儀,難道她們才是港女?至於我,的確不會化妝,不中。
二,「鍾意攬公仔」。毛公仔其實是人類嬰兒的符號延伸,所以卡哇依的樣子,通常帶有嬰兒臉孔的元素。女人特別喜歡毛公仔,是先天基因以及後天教化造成。不過我一歲時收到姨媽所送的兔仔毛公仔,建立了心理學上所謂的依附(attachment),白天拖著走,晚上抱著睡。小時候旅行坐飛機,還會將兔仔放在手提行李,起飛後放他出來,讓他看窗外的雲。係咪好低B呢?我先中一項。
三,「機不離手」。笑話,現代男女都自願接受幅射洗禮。再中。
四,「鍾意Shopping」。選購心頭好這點,男人女人一樣,分別只是買的東西不同。高富帥會逛車行,柒窮撚如我只會行唱片店與書店。中。
五,「一見到昆蟲就大叫」。一般香港人缺乏生物學常識,文中記者將蜘蛛歸類為昆蟲,錯得離譜。昆蟲有六足,身體分為頭胸腹三段;蜘蛛屬於螯肢亞門節肢動物,有八足,身體分為頭腹兩段。坦白說,我在家見到曱甴是會慘叫的。中。
六,「洗人唔使本」。對人頤指氣使,終致兒子戲屎,不分男女,皆有報應。不過我不會洗人,主要是沒有洗人的條件。
七,「為買名牌捱肚餓」。讀書時我為儲錢買唱片,會吃麵包做午餐。像U2呀,Radiohead呀等等,這些可是音樂界中的「名牌」哦。中。
八,「見到鍾意嘅嘢會高八度尖叫」。我也會這樣,不過聲音如大海般深沉的我,即使高八度,也像低吼。中。
九,「經常性遲到」。我承認遲到是自己其中一個壞習慣,但我已經相當克制。我身邊的遲到王,是位男性友人。有次我在尖沙咀地鐵站等他,他在電話說自己地鐵到了金鐘,結果半小時也未見人。原來他在金鐘下車去了Shopping。看,正正是「鍾意Shopping」的男人。中。
十,「經常性自拍」。基本上我不會自拍,非必要時我也不會照鏡,免得作嘔。然而,我見到的自拍專家中,男女比例差不多,而且很多也很醜。
十一,「說話非常嬌嗲,夾雜偽ABC腔」。Well,你知嘛,雖然我喺英國讀完University返嚟,但我好dislike人哋講嘢一半Chinese一半English咁囉,我覺得個flow好唔自然,一啲都唔consistent呀。仆你個street,都中呀!
十二,「對社會大事不關心」。差點忘記澄清一下,我在第二項提到的手提行李,是由本人親自帶去做保安檢查的。
十三,「唔識自己搵路,人哋行錯路淨係識埋怨」。正如東星耀揚所說:「屯門出嚟蕩失路唔奇啊,不過喺人生事業上,千祈就唔好迷失方向。」像我這種人生上的活遊魂,沒有資格評論別人。中。
十四,「嬌生慣養,少少事就頭暈身興」。東亞病夫不就是包括所有人嘛?要分男女嗎?財多身子弱,我財困自然龍精虎猛。
屈指一算,我中了九項,屬於「嚴重港女症後群」。這種借港女話題發揮的文章,不過得啖笑,正如鬧連詩雅港女的人,也未能解釋甚麼是港女。「總之佢就係港女啦」是不能說服人的啦。
順便奉勸一句,有些女士一邊鬧港女,一邊卻鬧港男就是愛港女,自己不港女但沒人要。除了「你的樣子如何」這種殘酷的老生常談外,其實凶相畢露,怨氣外洩,是最趕客的地方。
文:謝天下
Search