報復性消費，真係有嗎？台灣經濟有想像中咁差嗎？
5月份之前成日都聽到有人一直覺得在疫情過後，一定會有「報復性消費」因為好多人好耐冇得出街，所以點都要出嚟洗錢紓壓一下，
就呢個說法，到底報復性有幾強呢？
今日係2020年8月28日，係過往三個月裡面，如果以自己既零售生意嚟計，真係可以證實到好強勁既報復性消費，而且消費力係7月既時候再因為政府推出振興消費卷而再加強，簡單嚟講就係呢三個月同事忙到嗌曬救命，7月份台北、台中店長都要求加人手，呢幾個月真係辛苦曬大家，直到呢個星期大家先開始比較可以回復正常運作，之前幾個月真的忙到癲。
生意咁好有咩好分享呢？里奧叔叔想曬命係咪？🤔
里奧既辛苦命就冇咩好曬啦，不過係呢幾個月裡面里奧有好唔一樣既感受想同大家分享一下。
台灣經濟和消費力
有人會話台灣經濟好差，好多人搵唔到錢，一個月要搵超過5萬蚊（台幣）既人唔多，中南部既平均收入就更加少，人口又老化，消費力就越嚟越弱，要做生意就越嚟越難，台灣做生意好難賺錢，事實真係咁嗎？
收入中位數、人口老化等既數據資料相信一定係真既，里奧最近都睇過幾個幾條片介紹台灣營商環境，用數據分析得都好全面，但係如果以里奧呢幾年既實戰經驗既感受，又唔覺得係咁，呢幾個月就更加覺得消費力好強，我地用呢三個月既人均消費額與去年同期作比較，升咗差不多10% , 生意好咗同事收入自然高，呢幾個月同事出糧時大家都心情愉快，出盡力再跑數，希望業續再有突破。
台灣人消費重點在CP值？
難道只有台灣人先講CP值？其實有咩人消費唔講CP值？🤷♂️ 成日都聽到有人話台灣人買咩都睇CP值，唔扺既野唔買，所以做生意既利潤好低好難做，其實真係咁嗎？我又真係唔完全認同。
里奧認為各行各業都有被客戶認同既一群，而做生意往往要考慮既重點應該係要點樣得到大多數客戶認同，社會經濟環境當然對做生意有影響，但對於經營小型經濟既里奧嚟講，我就覺得取得認同比較重要。
台灣奧客
奧客係咩？呢個係台語嚟，係形容好爛既客，如果你做生意以「客人永遠是對的」為原則，當遇到奧客出現時，你會幾辛苦，但台灣奧客真係好多嗎？因為奧客而令你生意好難做嗎？
唉……世界之大，奧客又點會得台灣有，全世界既奧客反正都係一樣，就係唔講道理，呢次報復性消費我地收到既投訴好搞笑，投訴我地鋪頭客人太多比錢要等好耐，投訴同事太忙冇辦法淨係服務佢一個，投訴我地某個款式賣曬又唔補貨，仲搞笑到限我地一個星期之內補貨賣比佢，如果唔係就唱衰我地既都有，總之奧客問題無奇不有，最終都係好彩有一班工作好認真既同事。
台灣聘請員工既質素好參次？
成日都聽到有啲香港朋友既朋友講，話係台灣請員工既質素好參次，又話唔夠醒唔夠投入，下下用香港人作比較。
如果你有做開生意，又或者曾做過老闆既你，係請員工既時候有邊個未遇過問題？有邊過未遇過一啲令你好頭痛又好嬲既員工？當然亦會遇到好出眾既同事，人事管理真的一門大學問。
但如果單方面話台灣請員工質素參次，又認為台灣員工呢樣唔夠好，嗰樣又唔夠醒目等等，里奧就真係要為佢地平反，下次同大家分享一下台灣同事既相處。
