《過幾年，你都係老屎忽。》
上一篇文《你唔會做樓奴，點解你咁貼市？》出街之後反應一如預期，在年輕的一群都會瀰漫住一種「睇人仆街最開心」既氣氛，尤其有３個字不絕於耳，就係「老屎忽」。如果樓市一跌６—７成班「老屎忽」一定仆街喇，真係諗起都心涼！呢種想法我明白，但我唔會支持，因為當中既謬誤極大，呢篇文係幫大家對世代之爭作少少解毒。
首先咩叫「老屎忽」先？係早過你出世叫做老屎忽？定係做左某Ｄ野之後就可以叫佢做「老屎忽」？其實呢個係同８０—９０後一樣係個標籤黎，窮生都講過好多次，當你唔鍾意聽到Ｄ人話Ｄ９０後乜乜乜既時候，就最好唔好用「老屎忽」呢類比８０—９０後更唔科學既名詞去標籤人，因為８０後、９０後我起碼知道佢一定講緊８０／９０年代出生既人，好似窮生咁８０年代末期出世，咪似９０後既８０後囉！但係「老屎忽」係咩呢？窮生都俾人叫過做「老屎忽」喎！呢Ｄ咁虛既形容事實就係方便大家搬龍門，呢Ｄ咁唔健康既野都係少做為妙啦！
而有個好值得講既問題就係，樓市跌等於「老屎忽」一定仆街。咁係唔係姐係「業主」等於「老屎忽」？事實上就係，老屎忽一般都比你做多十幾廿年人，佢打多你十幾廿年工，自然就會有錢買樓，咁你問廿歲既人有樓多Ｄ，定５０歲既人有樓比例多Ｄ，咁一定係後者啦！但係事實如果樓市一跌６—７成，仆街既係唔係「老屎忽」呢？非也！仆街既一定係剛上車既８０後，姐係後生仔。咁廿歲左右既大學生就會話，呢班都係「老屎忽」！SEE？過幾年就變左老屎忽！點解呀？因為你買得起樓。
咁姐係點呀？所以毛澤東真係害死人，佢當年話：「世界是你們的，也是我們的，但是歸根結底是你們的。」姐係話過幾年，個世界已經唔係你，甚至好多人會覺得你阻住個地球轉。今日你話班「老屎忽」，幾年後，你就係「老屎忽」了！原因？因為你阻住Ｄ後生仔發展，事實班baby boomer最大問題而家都講緊係佢地坐住左D位之嘛,話幾年你升左做中層，你咪就係果Ｄ人囉！仲要喎，你唔好買樓喎，你一買樓你就係資產階級，你係業主。只要個樓市升，你就俾後生仔咒你仆街嫁喎！你換返個角度諗下，我供緊層樓自住，班後生仔日日咒你俾人Call Loan，之後問你點解唔企係後生仔果邊，你係佢你會點？
所以我雖然成日都笑ｄ左膠大愛離地，但係佢地起碼係忠於自己，佢地唔玩呢個遊戲，過返ｄ冇咁物質既生活。做人對自己就坦白ｄ，你一係就完全唔好跟上一代果套行，搵一個屬於自己既世界出黎，唔好口講炒樓炒到冇人買得起，自己一有錢都係諗買層樓投資。如果大家有記性，你會發現冇耐之前煥然壹居就係好好既照妖鏡，個市仆一仆，幾多人縮沙，所謂既住屋需要「突然」解決左，唔知今日果班人有冇後悔呢？所以都係果句啦，做人，簡單ｄ，想做資產階級，咪講囉！（＃學下人用多ｄ逗號可能會多ｄ女讀者）
窮生係好Open Mind既人，其實買唔買樓真係無咩所謂，後生仔輸得起，儲２—３年錢去闖下仲好！但講到尾你唔買樓你都要用錢，唔想做你地口中既「老屎忽」，更加要儲錢累積資產。到你４０歲之後，咪唔洗怕冇左份工做埋ｄ仆街野去保住自己個位囉！如果今日你同我講後生仔一個月洗６—７ｋ都唔夠，唔習慣過簡單ｄ既生活，活係消費主義既陰影當中，呢ｄ人幾年後一定變「老屎忽」，我窮生話既！職場上點對付「老屎忽」，大把page教到你，窮生唔敢班門弄斧。但係搞清楚對象黎對付，係緊要的。
