打完針，好開心（上）
我啱啱打完針，好開心。
我從診所行出嚟，秋日嘅陽光灑喺我身上，特別溫暖，路邊嘅花花草草都特別靚。
世界咁美好，因為我打咗快樂針。
人會感受到快樂，係因為大腦釋放正向嘅荷爾蒙，包括安多酚、多巴胺等等。
比如同心儀嘅對象接觸嗰陣，大腦會分沁多巴胺，令你有甜蜜幸福嘅感覺。
隨住科技發展，科學家研發出快樂針，直接刺激腦部，釋放正向荷爾蒙。
而且，同一般嘅抗抑鬱藥相比，快樂針冇副作用，可以長期倚靠快樂針嚟得到快樂。
如果一定要講有咩缺點，就係貴。
呢個服務啱啱推出嗰陣，我冇諗住試㗎。
一支可以快樂一個星期嘅快樂針，就係我一個星期嘅人工，唔洗交租食飯咩？
直到有一次，我同女朋友瑤瑤冷戰，我悶悶不樂。
呢個時候，我見到快樂針嘅廣告，咪諗住試一次，當體驗吓。
打針後，我神清氣爽，生命中嘅每一件事都變得無比美好，開OT都充滿幹勁，連挑剔嘅客戶都變得可愛。
心情好好嘅我，唔止工作效率高咗，仲好快就哄番瑤瑤。
一個星期過去，快樂針嘅藥效消失，我冇變得抑鬱，但我總係會回憶起有快樂針嘅日子。
嗰種美好，就同你遇到心愛嘅人一樣，連空氣都係甜嘅。
但快樂針比愛情更美好，愛上一個人，可能會嘈交，可能會分手，愛有幾深，痛就有幾深。
就算唔分手，愛情帶來嘅正向荷爾蒙，平均只會維持到兩、三年。
之後對住同一個人，即使你依然愛佢，都唔會有一種見到佢就心跳嘅感覺。
我同瑤瑤提起呢段經歷，描述打針後嘅美好感覺，好想再打多幾次。
瑤瑤成個彈起：「你記唔記得你應承過我啲乜嘢？」
應承過乜嘢？我應承過佢好多嘢，咩永遠愛佢、唔會呃佢、其他女人喺我眼中都係屎……但冇一樣同快樂針有關喎。
「你話你會同我一齊儲錢結婚，為我哋嘅將來而努力！」瑤瑤大叫。
我唔明：「所以呢？」
「一支針就係你一個星期嘅人工，每個月打一支，就少咗1/4人工，幾乎唔洗儲錢啦。」瑤瑤好嬲。
「我打咗針之後，工作效率高咗，可以處理嘅客戶都多咗……」我愈講愈細聲，無論點講都好，我增加嘅收入，都比唔上快樂針嘅價格。
於是，我應承瑤瑤，只會喺每年生日嗰陣，打一支快樂針開心吓。
對我呢種小市民嚟講，快樂針係奢侈品，唔係日用品。
但自此之後，我成日回憶起打針嘅美好。
我同瑤瑤Kiss嗰陣，佢一臉陶醉，但我腦裡面諗起嘅，係打針後嗰種身心愉悅嘅感覺。
瑤瑤好快察覺到我嘅分心，佢馬上意識到：「你想打針？」
我呆一呆。
瑤瑤好懊惱：「你已經上咗癮啦，好似吸毒咁，成日都諗住，最後就吸到傾家蕩產，吸到死啊。」
「點會啫？快樂針唔係毒品，經過科學研究證實，對人體係冇副作用㗎。」我反駁。
瑤瑤冷笑一聲：「咁你有錢咩？份糧用晒嚟打針，唔洗生活啦？」
我無話可說。
嗰一刻，我意識到，快樂針係可以令人快樂，係冇副作用。
但作為普通上班族嘅我，根本冇快樂嘅權利。
窮，就冇資格開心。
下集：https://bit.ly/3ixMYta
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #打完針好開心
安多酚愛情 在 愛情如安多酚Fabel：快樂其實要止癮- 叱咤樂壇 - Facebook 的推薦與評價
「有憾事便無憾繼續餘生」，真係可以繼續？其實麻醉太多，「 安多酚 」都會變成毒品。人需要止癮。 #叱咤樂壇 謝茜嘉Tse Sai ... ... <看更多>