《有屋村味道的麪包舖》
尋晚深夜靈光一閃，想落便利店買支甜筒食下。
最後我係落咗去，但咩都冇買到。因為實在覺得有啲貴。
已經唔揀啲貴牌子，但最平都19蚊兩支..
明明上年夏天，仲係16蚊兩支...而16蚊兩支已經好貴(喺我心目中)。
我總係覺得甜筒咪5、6蚊，最多7蚊。
所以19蚊兩支，我就放棄。
近年香港，有好多升幅，我係未接受到。
包括有啲茶記一個碟頭飯都過50蚊，
地鐵站大形連鎖麵包舖嘅一個包，都接近10蚊，
想搵啲5、6蚊，個包已經接近係冇味。
我明白百物騰貴，來貨人工咩都係錢。
但對比返十年前我喺銅鑼灣食個碟頭飯28蚊、今日52蚊。
而香港人薪金喺呢10年，變化唔多，
即使係平均高咗，都絕非28 -> 52。
有時，我覺得自己遠離咗個社會。
又或者，係社會開始遠離咗我。
拎住10蚊入便利店，分分鐘連一支支裝飲品都買唔到。
唯一，一個令我稍為安樂嘅地方，係樓下嘅麵包舖。
我甚至唔知佢叫咩名，反正佢都好似冇招牌。
總之佢賣包，所以佢就叫「樓下嘅麵包舖」。
只有呢個地方，尚抵得住物價來襲。
裝潢老舊，但層次分明。
冇中央冷氣，但有把掛牆風扇，唔太凍，略帶溫暖。
麵包係師傳即刻做，而唔係每日喺廠整完再一車車運去全香港。
佢未必係最好食，但咬落去，真係啖啖包。
大形連鎖麪包舖嗰啲，咬落去只剩下空氣。
價錢係良心價，有腸有醬都係6蚊、
半打蛋撻十幾蚊可以落樓。
都係要強調，味道唔係最好，但感覺係最好。
你知道佢哋做嘅叫街坊生意。
咩叫街坊生意？
『你飽肚，佢搵到。』
佢唔係賺盡，搵啖飯食；佢都知你賺得唔多，所以收得唔貴。
呢種味道OK，收得平嘅店舖，
如果呢家畀人發現，可能就會變成網上嘅「XX隱世小店」。
但其實，喺十多年前，呢類店舖並唔隱世，反而周街都係。
真係諷刺。
離開呢間麪包舖，環顧一望，發覺好多「樓下嘅XX」都已經唔存在，
你知道好快，呢間麪包舖都唔會存在。
你開始明，唔係社會遠離咗自己。
只係你心目中嘅社會，早就不存在。
Ig:cheungson88
*會慢慢Up嘢上去
PS. 呢排寫咗叫《不存在的職業》嘅小系列故事，冇嘢做時可以望下：https://goo.gl/xh4bbt
