［台灣最猛的風景是人］是日行銷，凶宅更加要落力啲。七百蚊尺咋，勇士諗諗。
1. 台灣近嚟嘅熱話。當然係台幣啦。係喎，台灣嘢我都睇。台灣樓市交投都算旺—但同香港比冇得比，實情冇一度可以同香港比。咁但呢個盤，又遍遠（下面講），又凶宅，就要落啲心思先突出到自己咯。結果而家就出晒名。有啲計仔
2. 講返，凶宅當然要披露咯，之前twitter 有條廢老，係咁話咁樣係歧視（！），話唔應該要披露。我話係十分緊要嘅資料喎，大家都覺得有所謂，就算我自己住冇所謂，我都要諗再賣出去下手嗰個有所謂，或者租客有所謂。然後佢話佢自己正氣完全唔會理喎。我話屌啦，個世界圍撚住你轉咩，而家講社會大多數人嘛！你叫碟牛扒原來係屎你都照食唔會投訴，唔係我都要食架嘛！
3. 講返，南方澳在宜蘭。仲要係宜蘭縣唔係宜蘭市，蘇澳，鄉下嚟的。你去到真係日日睇海（而對我嚟講宜蘭已經係鄉下，「其實對我嚟講高雄都係鄉下」，「其實我覺得除左北北桃全個台灣都係鄉下」。不過呢啲好主觀，有啲人又會話扯台北咁撚嘈搬離香港就係唔想咁嘛，咁個人選擇啫）。
4. 350萬，我估仲有得講價（台灣人講價是常識），應該80萬港紙搞掂。香港你買車位都唔撚掂，買電單車位啦。但又to be fair，係咁好就有錢人一早搬去住啦。你問我就不了。
5. 問返台灣房地產專家（即係埃汾太），地12.4坪，建34.3坪，即係三層的。呢啲透天個實用率應好高，有九成。一坪等於35.6平方英尺（呢啲好基本啦，唔使問埃汾太都知），即係1200尺。80萬港紙，尺價七舊水。其實唔怕悶真係OK，可惜我好怕悶。我唔怕悶就唔會有呢個Page啦
6. 加埋仲要凶宅，業主一定要披露。睇返其他八卦報導，話業主老婆久病喎，趁呀屋主離開出海捉魚就燒咗炭。但你話我仆街都好，「佢一面之辭啫」，如果個老婆為佢好，會唔會在屋企燒炭？但無從對證了，除非問米。
7. 亦講到明做外勞宿舍好。有話外勞信教信耶穌信阿拉唔怕，假嘅。越南人不知幾迷信，不過係外勞你冇得揀咁解。係死過人又點？提供住宿冇話要唔係凶宅喎。而有蘇澳你住，好撚過香港啲友困個賓賓在廁所啦，邊得嚟咁多「淪落人」？真係我痴撚線你。你睇啲mom點對賓賓印印，你就知點解人地用月經幫你煮送。補血呀mom
8. 不過話呢間其實只係側邊啲樓嘅10%折讓，咁就唔抵啦（https://bit.ly/3cRH2Gb）。仲要台灣人咁迷信。正路話小凶應該七成大凶就六成喎。我以為有一半添。
9. 之前都貼過，凶宅研究。係！凶宅都有研究！仲上Economist．仲要我都有睇，仲要我有寫。你冇睇就你走寶
10. 回返帶，大學研究（！），香港啲「事故單位」（香港人的語言藝術，你見人地英文就咁叫haunted house），平均跌價兩成。好似比我想像中少。但當然都好睇係乜嘢「事故」啦。
11. 照計可以量化分析返，做返個regression，整一大堆乜嘢事故。例如斬成幾多件，有幾多個係未成年嘅仔女，有冇漏水（！）落樓下之類，整一大堆variable。唔好笑呀，好多教大學嘅就係咁呃飯食。
12. 都話咯，做過統計。應該睇到的，租樓嗰啲，好大incentive 在房東間屋燒炭。但自己物業嘅，如果只係厭世之類，唔係同老婆仔女深仇大恨嘅，就會揀去車入面（不過台灣呢個case就正正老公係業主，但老婆在屋入面死，原因不明）。我記得之前有幾單都係，明明有間屋但走去屋出面架車。九成就係自己業主仲有屋企人。正所謂遺愛人間。
13. 同埋其實都講過，隨住樓價越嚟越高，呢個「凶宅折讓」應該係越嚟越細。我話知你在太古城斬人一家十四口啲血噴到One Island East 啦，如果平三成？人人都爭住買。古語有云： 窮人唔怕鬼，因為人窮，慘過見鬼。
14. 仲有奇案兩單，一單早排朋友Jacky Luk講開（https://bit.ly/2Tn0WRp）：筆者記起多年前的一單地產新聞，說是有物業買家入稟控訴代理隱瞞有關單位是凶宅，其購入的單位原來是曾有人跳樓，而該代理經紀卻抗辯指當年住戶跳樓時仍未死亡，而是着地一刻才離世，由於死亡是在屋外「發生」，所以單位不算是凶宅
15. 一單上次都有講，有條友係去睇樓然後在人地間屋跳樓（https://bit.ly/2yls7F3），睇見都慘。我梗係講個業主！唔知仲以為有乜深仇大恨。但原來係三唔識七的，坡仔遊客，心血來潮話想買樓就去人地度跳。個業主真係慘過西。
16. 奉勸大家唔好做啲咁缺德嘅嘢—係跳就去仇人屋企跳。正所謂In Sicily, gangsters kill the kids and grandkids of their enemies. In America, we have Reverse Mortgages。但In Hong Kong, we have 去仇家屋企跳樓 – 不過搞清楚係佢自己名嘅。最撚好就係條友做銀行，士大夫plan九成按揭嗰啲。你一跳佢即時負資產，未來十年都畀上司渣住個春袋，乜仇都報晒。係呀，跳樓都要做due diligence，做人係好煩的，唔想煩咪死咗佢咯- wait……
------------------------------
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
