關於 小啤梨生產記錄 ，我們在網路上蒐集到這些相關的討論、資訊與評價

💛生產記錄part 2💛
-
#小啤梨生產記錄
-2020.06.15 凌晨-
呢個凌晨我起碼禁左三四次鐘，但每次都失望，比起琴日既一兩指先好得個小小⋯未落得產房。
姑娘話個肚硬耐左係岩岩先開始，生bb係咁架啦⋯
痛到訓唔到覺，每一分一秒都係好可怕既陣痛，完全係冇抖既時間，上一秒冇咁痛但下一秒又痛到飛起，可以講比起女人M痛誇張多百倍。
呢個時候我真係好後悔要生BB，想死咁濟，成晚流流長我到底要痛幾耐呀⋯
見我辛苦，姑娘每隔一陣就行入嚟望下我，教我呼吸順便比音樂我聽，仲叫我嘗試去小便或者玩下瑜伽波，但係我痛到床都落唔到仲點玩波喎😭
其實我仲要連手機都冇氣力禁，望住手機周不時彈WTS通知但都廢事禁，係我妹以為我生左先好辛苦拎起手機同佢講唔係呀⋯我仲未生得呀⋯⋯😭
琴晚到依加痛到牙刷唔到面洗唔到，廁所又去唔到，痛起上黎就不停扯自己頭髮抓自己想分心但完全冇用，個頭比我扯到成個顛婆咁，呢個程度既痛我比9分⋯（剩低一分係我未知仲可以幾痛😅）
成晚我不停扭黎扭去換姿勢，子宮不停收縮好似長期比人捏實咁，呢種痛係我做人咁耐經歷過最犀利既痛。
我可以好肯定咁講，冇其他痛及得上陣痛。
好辛苦咁捱過呢一晚，到早餐時間都係食唔落野，成個廢人攤死左係床上面。
等到朝早8:30醫生檢查，等完又等終於到我，醫生再幫我內診（已經對內診冇哂感覺）而呢一次終於比我等到好消息⋯
子宮頸開三度可以落產房人手穿水。
姑娘叫我打電話比吳生叫佢黎陪產，聽到生得佢就即刻叫的士入黎醫院。
落產房前要先量血壓，我量哂左右手都唔合格，可能太緊張加上去唔到小便。
廢事比吳生見到自己成個顛婆就扎返整齊個頭，有嬸嬸幫我推輪椅，落到去就見到吳生坐左係外面。
入到產房要除晒衫褲再著件袍，等左一陣就有人黎幫我人手穿水。
人手穿水都痛，但呢種痛對於陣痛真係小事，感覺到流左好多好暖既水出黎，啲姑娘話我好多羊水係咁講好犀利😅
本來係產前房開三度，穿水再度就即刻開到七度！以為要等多半日，點知原來可以咁快。
姑娘拎左笑氣同開音樂比我之後就叫吳生入黎，入到黎我叫佢搵野講下等我可以分心，可能佢都緊張所以冇咩野講😂
我拎住個笑氣不停用力吸，因為好驚又加上產房嘅冷氣有啲凍搞到隻手不停震，吳生見到就摸下我手背等我放鬆。
痛左大約廿分鐘左右，感覺到呀B要湧出黎，個感覺好似便秘左好耐要柯舊千年屎出黎咁。
拿拿林吳生比人叫左出去著防疫衣，姑娘再推個腳架比我再叫我雙手握住兩支棍，話當陣痛一黎就出力柯。
一開始我呼吸唔岩所以冇咩作用，佢哋就教我頭向低，下身用力唔好叫，不過真係好難唔叫出黎。
之後配合佢地教既呼吸法，呢一下push就見到小小呀B既頭髮，不過因為連唔到氣搞到個頭縮返入去。
繼續一感覺到陣痛就出力柯，好似係第三次出力時我感覺到盆骨好似兩邊扯開左咁，佢哋話見到好大個頭仔啦要繼續出力！
第四次用力終於得左「頭仔出黎啦！呼氣！」好快我見到佢地好似獅子王咁係我面前抬起左呀B。
當下陣痛既感覺我已經忘記哂，好開心又感動咁喊左出黎，經過左十個月，再經歷左好艱辛既陣痛，我地真係正式做爸爸媽媽啦。
呀B抹完身就放左落我心口到黎個初次肌膚接觸，佢伏係到好快就識搵奶食🤣姑娘幫佢轉pose佢唔肯仲叫左出聲🤣
真係好神奇呀，早一排仲係我肚入面既你依加伏左係我心口上面。
。
經歷完艱難嘅順產，之後就係另一個挑戰：餵哺母乳🤱🏻
等啤梨瞓晏覺嘅時候，再趁呢段時間寫寫分享😌🤣
————————————

🌟Follow 啤梨媽&啤梨仔 Instagram 👇🏻
https://www.instagram.com/invites/contact/?i=ki5r44cn6a8o&utm_content=hf6trgk

————————————

#Baby #育兒日記 #育兒生活 #新手媽媽 #新手爸媽

🌟補返篇生產記錄上嚟Facebook呢邊先🌟

#小啤梨生產記錄
-2020.06.14 凌晨-
天氣預報話今日會打風，早幾日仲同吳生講如果呀B撞正今日出世咁佢他朝必成大器🤣
不過都好彩冇打得成強風，點解呢？因為呀B係凌晨比左預告我地：佢準備出嚟同我哋見面了。
11號去產檢時護士話呀B頭仔仲未落到好低，呢個星期都未必會生到，就早一兩晚返娘家訓左兩晚，本來呀媽仲叫我訓多晚，但好彩我冇聽到。
夜晚差唔多11點等完吳生收工一齊返屋企，吳生竟然話攰要搭的士，平時都要坐兩個鐘小巴先返到屋企。
00:30左右，我同吳生攤係床上面各自篤手機時突然我feel到下面有一鼓暖流，我心諗⋯唔通穿咗水？
當下我好肯定呢啲一定唔係尿，但冇經驗既關係心大心細諗緊去唔去醫院，過一陣決定再等下順便再整理走佬袋。
大概1:00，再望下就確定係時候去醫院啦，我見紅了😱！
同左吳生講完後佢話：「唔係掛？生啦？」我話我未覺得痛呀，有排啦。
住得偏僻既關係，我地call左好耐的士，由我上的士至去到醫院都未覺得痛，我心諗呀B對我咁好，係咪可以直接見紅穿水就生得🤣
去到產房禁鐘，裡面姑娘係對講機問有咩幫到我，個時覺得直接講見紅好尷尬🌚😂（第一次生BB咩都唔知) 見我講唔出，吳生就即刻勁急話：「生得啦！」真係笑死我😂
姑娘再問左一輪野(有冇外遊、發燒之類）幫我探熱後就叫我入裡面簽名準備檢查，講解下啲生產過程點樣，而吳生冇得入去只可以係外面等消息。
入到去要換衫留小便、駁胎心機，仲比左支棍仔我，如果感覺到BB郁就禁一下。
但呀B真係玩嘢，我訓上張床後佢都冇點郁過，駁左好耐機(差唔多個幾鐘)都未落得床，等左好耐先禁得幾下交功課。
呢個時候醫生入嚟內診，之前上網查生既過程係點，而好多媽媽都話內診痛不欲生。
醫生前後拎左兩支鉗仔放入去檢查，我望住支鉗仔打左個突，有冇搞錯呢支係所謂鉗’仔’？😅
咁當然同網上面講既一樣痛到成身震晒出哂冷汗⋯旁邊姑娘係到打氣，不過醫生搞掂完都未得，到姑娘人手檢查，又係痛到我流晒眼淚。
完成我人生初次既可怕內診，醫生同姑娘都話BB仲好入，胎膜未穿，但見紅就留院觀察。
出返外面見到吳生坐左喺度，我地一齊上去產前房搞左啲手續後姑娘叫佢返屋企先，臨走前佢叫我早啲瞓，不過3-4點我攤係床上面玩手機，差唔多天光先恰著。
到清晨6:30左右開始感覺到子宮陰陰痛，係好普通M痛既感覺，10分最高我比2分，加上唔係網上面媽媽所講既規律性陣痛，痛既時間唔頻密就覺得係假宮縮（早一晚都有假宮縮）
但好快又唔係啦喎，痛一陣⋯唔痛⋯又再痛，好似黎料，即刻打開備忘錄記低時間睇下隔幾多分鐘痛一次(圖2)
7點醫院早餐時間，呢個時候痛既程度我比3分，可以食到野。
下午12點開始至下午2點左右既陣痛變得頻密左，縮到5-10分鐘一次，係可以忍受既痛。
差不多三點時吳生黎左醫院送飯比我，呢個時候陣痛既程度我比5分痛，行路要好慢先行得郁，個子宮係咁拿住痛好似比人捏住咁，痛到我都廢事用手機紀錄低。
到晚餐時間我已經痛到食唔落野⋯我對面床個孕婦都同我一樣食唔落，姑娘見到就入黎幫我地人手內診啦（比起陣痛，內診已經變到唔痛）
佢就宮頸開到四度，去完小便後就落得產房，好佩服佢可以去到廁所，我痛到床都落唔到⋯
我心諗我係咪都可以落得去卸貨啦，點知我內診後原來只係開得一兩指🌚要比時間BB，對面個位佢行到就開四度，我床都落唔到先開得一兩指？！
姑娘叫我一定要食野同去廁所，話隨時夜晚生冇力生，小便仲會阻住BB出世，但我已經痛到擺咩姿勢都好痛又訓唔到，完全痛到去小便既感覺都冇。
到夜晚醫院熄燈後地獄先真正開始。

————————————-
💛part2在下一個post💛
————————————-

🌟Follow 啤梨媽&啤梨仔 Instagram 👇🏻
https://www.instagram.com/invites/contact/?i=ki5r44cn6a8o&utm_content=hf6trgk

————————————

#Baby #育兒日記 #育兒生活 #新手媽媽 #新手爸媽