#在入睡前交換日記
0906《日常》
睇開嘅漫畫網站，有分類嘅制度，好似《少年犯之七人》、《Psycho Pass》哩啲抗爭類型嘅叫社會漫畫，《四葉妹妹》、《田中君總是如此傭懶》哩種形容每日都發生嘅趣事，叫日常漫畫，日常系就要行輕鬆路線，咁但係如果每日嘅日常都係抗爭呢？咁點樣分類？
現實就係冇得分類，我地冇辦法逃避社會，現實唔係漫畫，我地頂多只可以cosplay，將喺漫畫入面學到嘅嘢，放入內心，戰鬥亦冇可能靠武力，我地又冇必殺技，最後都係靠體力，喺日常入面作出種種不合作或超合作運動，而如果係日常，我地冇辦法唔保持輕鬆，係好難，睇住每日嘅新聞仲要笑得出，但哩場運動本來就唔容易，我地一早都有心理準備㗎啦，但係唔通我地每日都要用盡腎上腺去應動咩？做運動本身就係要控制好自己嘅節奏，呼吸、心跳，下下都衝，好快冇氣，幾難都要捱，笑住捱落去。
有時唔好輕易拋低一句「不計成本」，因為我地根本冇乜本，所以先更加要計，道理好簡單，愈窮咪愈嘥。講緊大部分人嘅本錢都唔係錢，係得一條命嘅時候，就更必須喺有限嘅生命入面嘥啲使，就算要抗爭，留住條命，用多幾轉，你去一轉就抱住要灑佢冷嘅心態嘅話，係好唔襟玩。分散投資，一條命，攤長嚟玩，哩啲就叫減低成本。
漫畫迷 檸
少年犯之七人 在 [問題] 為什摸"二舍六房的七人"討論度很低? - 看板C_Chat 的推薦與評價