《港鐵站地理》陳心遙
《信報》2018年8月22日《視線所及》專欄
人嘅認知容量好有限，如果用電腦做比喻，就係唔夠Ram。你冇可能同時開幾百個App而每個App都運行暢順，所以人會選擇性處理外界嘅資訊。選擇性處理，所以會有選擇性嘅知覺，用自己方便嘅系統去認知個世界。
細個時候，住喺近登打士街嘅地方，嗰陣學校要我寫屋企地址，我都係寫「旺角區」。直到大家都慣咗乘搭地鐵之後。開始有人質疑點解我個地址係旺角區，因為油麻地站行過去，近過旺角站好多，後來我同屋企人唔知幾時開始，將屋企地址修正做「油麻地區」。我唔知大家係點，我細個嘅時候就習慣咗呢一套，以地鐵站去理解香港每個地點嘅位置嘅系統，而忽略天生該有嘅方向感同距離感。身邊嘅朋友，屋企唔係住近地鐵站嘅，會比我更加熟悉香港各區嘅相對位置同方向，因為佢哋仲要靠其他交通工具去生活。唔知日日有司機接送嘅朋友嘅認知系統又係點嘅呢？
以前約朋友，喺地鐵站嘅銀行最方便；又有電話亭可以聯繫。除咗地鐵站，約喺大型百貨公司如崇光、永安；知名地標如鐘樓、皇后碼頭等等，都係熱門選擇。二三十年前，香港唔係一步一商場嘅，而家大小商場無處不在，幾乎壟斷市民外出生活嘅所有消費。今日，某一個商場等於每一區嘅核心地標，已經變成近乎常識嘅地理概念。感覺就好似天子分封諸侯，群雄各據一方咁樣。世界其他大城市都唔會好似香港咁樣。鐵路系統成熟如東京、首爾、台北；各區嘅核心地標一定都係官方機構、社區會堂、文化建築同大型公園，唔會係一座座鶴立雞群嘅商場。
可以預期「西九龍站」會係香港另一個新地標。「一國兩制」其中「一制」入面嘅一區，又有「一區兩制」，站入面有「一制」，站出面又有另「一制」。唔明唔緊要，大家個腦係有限Ram，你知道「西九龍」係有啲唔同嘅就好。
而家啲港鐵站愈嚟愈「長」。大家都知道近港鐵站個「出口」係個「優勢」嚟，樓價都可以嗌貴啲。原來由銅鑼灣列車月台行去時代廣場都未算遠；利東站列車月台行出去鴨脷洲嗰邊個「出口」先誇張，有接駁巴士過去都不為過。第一次去嗰度一定要預番些少步行時間。
有朝一日，為咗提升綜合競爭力，油麻地、旺角、尖沙咀三個港鐵站大都可以合併，叫「大旺區」，咁列車又可以長啲，行快啲，人又可以塞多啲。當然，我細個住嘅「旺角區」就成為一個歷史名詞，甚至根本就冇存在過。
#港鐵站地理 #港鐵 #信報 #陳心遙
