我返嚟喇🥰❤️
差唔多消失咗兩個月
神神祕祕...成日話去做嘢
但又唔出相唔拍片
都唔知做緊啲咩...
我2021年嘅年頭講過
今年要好似隻牛咁勤力
喺事業上要有突破
只係用咗四個月
我就行咗一大步喇😢（大大力抱抱自己）
仲記得上年11月見到《口罩小姐》宣傳片
第一下反應係...
好似好好玩！我要報！
然後第二下反應係...
會唔會比人笑
選美要比人評頭品足
亦怕自己冇呢個能力
輸咗會好瘀
但我再細心諗一下
咁想做一件事
如果因為人哋嘅諗法而唔去做
係好可惜亦好唔值得
最後我儲咗幾個星期勇氣
終於填Form報名
參加口罩小姐嘅初衷除咗覺得好玩
其實仲想克服面對壓力時容易出現嘅緊張情緒
雖然拍片經驗豐富又有舞台經驗
但其實我成日會緊張到講唔到想講嘅嘢
影響到應有嘅水準同表現
口罩小姐第一次面試嗰朝
緊張到肚屙咗幾次同埋胃痛咗全日
當日自彈自唱仲要由第一句開始走音到最尾一句
我意識到如果我唔改善呢個問題
係幕前嘅工作上好難再進一步
好高興嘅就係呢四個月嘅拍攝日子入面
我成功克服咗因為緊張而影響表現嘅問題
到底點解會克服到
其實係隊長、組員同埋工作人員對我嘅肯定
我嘅自信心一直都好飄忽
有時好有自信，有時又毫無信心
但係拍攝過程入面
佢哋成日都會讚我轉數快、講嘢有point同埋好勤力好有火
呢啲優點我以前唔會意識到
當佢哋每講一次
就好似幫我打咗枝自信針一樣
久而久之打咗咁多枝針後
我個心臟變得愈嚟愈強大
愈嚟愈相信自己做得到
愈相信自己做得到
心裡嗰團火就愈燒愈旺
直到噚晚總決賽
能夠喺選美舞台上好好表現自己
我係感到好好好滿足
一個好大嘅成就解鎖！
原來我可以自信地挺胸收腹咁行catwalk
（平時完全唔識行路，full rehearsal嗰陣都仲比人提唔好寒背，同埋唔好同手同腳行路）
即使面對評判同電視直播嘅壓力
仍然可以好投入咁做努力咗好耐嘅solo performance
同埋好冷靜咁係司儀同鏡頭面前淡定咁回答問題
呢一切我都係無法想像
竟然係短短幾個月就克服到呢大個issue
好感恩2021年開咗一個咁靚頭
除咗感謝自己嘅努力
更加感謝嘅係身邊每一個好錫我對我好好嘅朋友
今次呢個比賽
好多好多好多朋友義無反顧咁幫我
有實際支持亦有心靈輔導
缺少你哋任何一個
就冇今日嘅我
多謝你哋成就咗我
我成日好老套咁多謝前多謝後
唔該前唔該後
唔係我客氣或者見外
而係我由心而發好感激
因為知道唔係必然
亦好想表達比你哋知
唔想收埋唔講
感謝文聽日再出
多謝所有支持同欣賞我嘅親朋好友
全部放哂係心❤️我知道㗎！
#細細粒 #最後一屆口罩小姐選舉 #最後一屆口罩小姐 #細粒都可以做大事
