早幾日, 大囡瞓醒覺發現隻手有少少腫, 以為落公園玩被蛟咬, 不以為言. 點知晚上越來越痕, 幫佢搽咗少少cream 但唔見好有效. 佢瞓著時忍唔住係咁R, 終於第二朝起身, 隻手腫到好似德國咸豬手.
屋企人話似有蠄蟧賴尿, 我唔明屋企無端端邊度搵隻蠄蟧?? 不過當下沒空深究, 連個囡自己都話想去睇醫生, 就知道一定好唔舒服了 (好彩無發燒, 無其他部位紅腫, 無其他身體不適).
咁啱遇著復活節, 好多診所休息, 唯有先回家. 一早約了奶奶帶啲孫去佢屋企玩, 話咗俾佢知情況, 睇吓大家有咩舒緩方法.
去到酒樓, 嫲嫲首先幫阿囡手背敷上蘆薈啫喱 (蘆薈有助鎮靜, 舒緩敏感皮膚), 然後用枝迷你版治療器一路不停碌阿囡隻手. 阿囡應該覺得好舒服, 因為佢另外一隻手食嘢好滋味, 由得阿嫲碌. 碌咗一陣, 已經減咗少少紅腫, 起碼隻手無再發熱.
去到嫲嫲家, 除了繼續不停敷蘆薈啫喱同碌, 仲氹佢吃魚油 (有助舒緩發炎), 同埋……….. 兩大包最強母乳 (共16安)!! 平時死泵爛泵, 逐少逐少儲做冰奶, 現在簡直有養兵千日, 用在一時的感覺!
幾管齊下, 到第二日, 阿囡隻手已消了大部份, 到第三日, 已經好番.
好彩今次膽粗粗用較溫和和天然的方法都有效. 起碼唔駛小朋友細細個要吃消炎藥或打針.
不過每個情況不能一概而言, 唔肯定的話都係睇醫生最穩陣.
#蠄蟧賴尿 #邊個屋企會有蠄蟧??
#無名紅腫 #皮膚紅腫 #皮膚敏感
#蘆薈Gel #蘆薈啫喱 #魚油 #舒緩抗炎
#母乳最強 #母乳好過吃藥 #滴滴皆辛苦
#營養師 #Nutritionist #AnnieLee
