智駒肺腑之言
《判刑前信》
(註：因判刑後未知律政司會否上訴刑期，所以押後了出文。)
************
堅持、判刑前最後一封信
係獄中不時收到「解悶工廠」寄嘅網上新聞 (專寄俾政治犯)，前排睇到新聞信前面解悶工廠義工寫左「...一方面覺得這類衝擊性行動實在係無辦法之中的辦法 (突擊政總抗議逃犯條例)，反抗惡法係應有之義，但另一面又心疼行動者的人付出、背負了這麼多，但卻好像沒有得到關注、回報，我仍然相信: 不是因為見到希望才堅持下去，而是因為堅持了才見到希望，只是有時還是會禁不住想究竟仲要係絕望中堅持前行多久，才能看得希望？」係度我想同工廠嘅義工講，只要有人未放棄前行，對我黎講就係有希望，冇人再抗爭先係真正嘅絕望。
羅拔甘迺迪有句名言，「每當有一個人為了理想而堅持，成為了幫助很多其他人而行動起來，或者來驅走不公義時，他是送出了一波微小的希望漣漪，在與百萬個不同的力量點交叉碰撞後，難保這些漣漪不會掀起巨浪，甚至能推倒最強大的壓制之牆。」你地 (工廠義工) 嘅堅持 (不斷寄新聞) 傳到俾我，我都會堅持落去，出黎之後會追上路上前行嘅人，冇人堅持落去嘅話就算高牆 (雞蛋與高牆) 出現裂痕，都冇人可以擊破高牆。
係收押所，我發覺幾乎每間房都有「正能量書」(有啲房甚至有數本)，但我唔睇，對我黎講最有正能量嘅係歷史書，裡面屢次睇到勇敢嘅人係逆境中堅持努力，以弱勝強，反敗為勝，極權都會汲取歷史教訓進步，但新時代有嘅新事物新變化，我唔相信不得人心嘅強權唔會出現裂痕，就算佢地幾努力遮掩填補始終都會出現。
不過係嗰日出現之前，除左抗爭，溝通都好重要，唔好避忌同港豬、新移民，甚至係藍絲溝通。係收押所我每日大半日都要對住上述類型嘅犯人，我唔同佢地講政治，佢地都會主動問我，我就如實作答 (之前我監獄所寫嘅文章都有人犯人睇過，唔主動俾佢地睇都會有人𥄫到啲內容)。估唔到冇人反對我嘅立場同行為，可能我為人真誠，所做嘅野都係為大眾 (入獄嘅人多數為錢) ， 而家冇犯人會指責我。強國囚犯同我立場唔同，但佢都只係嘆息，「你份人唔適合搞政治，你地 (本土抗爭青年) 唔會成功」，唔會鬧我，我甚至有新移民犯支持我同我所做嘅事。我終於明白何謂「仁者無敵」。我係度冇敵人，甚至多朋友 (外國犯人都唔少) 。
我諗起以前有親中港豬藍絲朋友係選舉期間同我講話想投某反對派候選人，出乎我意料之內。佢話比起反對派，有啲建制派佢更討厭，同埋佢話始終要有人為民抗爭。唔係個個藍絲都咁開明，但就算對著兇惡嘅人都要敢於發聲影響佢 (俾佢理解你點解咁嘅立場) 或後駁佢，唔俾啲藍絲膠論同觀點傳染他人。馬丁路德金講過「我們這一代人終將感到悔恨，不僅僅因為壞人的可憎言行，更因為好人的可怕沉默」。頭先講左「仁者無敵」，我諗起劉曉波嘅遺言「我沒有敵人」，我以前唔認同，不過而家開始明白，佢唔係真係仁者就無敵 (只係唔主動製造敵人) ，仁者嘅敵人係「不仁不義」。要用真誠同愛顯自己為何抗爭，咁大家多溝通唔係要大家修補社會撕裂，而係希望他日再有大型運動 (甚至革命)，多一個人站係我地呢邊，就算唔認同我地，都理解我地，唔會企係對面，認同不公之事。
「推動抗爭者堅持奮鬥嘅係對不公嘅恨，同對香港嘅愛」，除左對抗不公，我希望大家發掘下香港嘅好。成日有犯同我講話我坐監好唔抵，「香港有咩好？值得你地犧牲咩」。我鍾意細個嗰陣時住屯門嘅清幽，屯門公園嗰時環境唔錯 (但而家被強國大媽歌聲霸佔左)、觀塘嘅小販特色 (而家市區重建，有啲小販檔攞唔返牌照綞營)，亦鍾意旺角 (大媽最盛行到臨殺街我因暴房罪被禁足旺角)，佔領嗰時我日日訓旺角，有「賓賓」(菲律賓人) 幫我冚被 (蓋被子)，估領初期嘅金鐘亦尤如烏托邦，人人自發互助。有人成日話非建制總係「唱衰香港」，同外國講香港衰 (一國兩制名不符實)，但其實我地可以唱好香港，講香港嘅好人好事，同外國人推廣香港嘅好去處，搭小輪賞維港，坐電車遊覽香港島景色，同埋其實香港郊外行山環境唔錯 (香港人都忽略)，地質公園地貌外國都少有，反而有啲官方推介旅遊景點唔太適合外國客 (如廟街，不過食物除外)。仲有香港人有時都唔記得，香港其實係美食天堂，我鍾意魚蛋、蛋撻、菠蘿油、雞尾包同絲襪奶茶，全部都係香港特色。(仲有維記豬膶麵都好食)
講起「唱好香港」，我發覺近年已經冇歌好似《獅子山下》咁代表一代香港人，抗爭歌都少左，前幾年有《試問誰還未發聲》、《雞蛋與羔羊》同《撐起雨傘》，同埋香港抗爭中冇外國嗰種激昂嘅歌，震憤人心，「今天我...」做唔到，早期本土派嘅rock歌《城邦會戰勝歸來》(民主會戰勝歸來) 勉強算激昂，但內容早已不合時宜 (本土派同城邦派早已決裂)，邊個可作返首《香港會戰勝歸來》？震憤抗爭絕望之人呢？我覺得香港同抗爭有需要歌去激厲我方，影響港人。
唔少年輕人對未來已經絕望，有冇人可以做一個「樹洞」，俾年輕人傾訴心事 (網上空間或真實地方也好)。係監獄我睇報紙報導半日之內有兩個後生仔自殺，我都有戰友自殺。我希望香港可以變做一個充滿愛與希望嘅地方，俾香港人重拾生命嘅熱情。
駒
四月一日
************
※如果各位想寫信為驅驅打氣，請郵寄信件至「九龍中央郵政局郵政信箱70320號（PO Box 70320, Kowloon Central Post Office)」，我們會盡快轉交給驅。
