「最近有代理介紹買一個平台特色單位，但個個朋友都話唔好，又話多垃圾，又話有空中飛人，究竟買唔買好？」一向也有投資平台特色單位的1%Anthony，為大家解答一下：
Q：怕唔怕上面好多垃圾掉落嚟？
A：很奇怪的現象，根據過往經驗，平台裝修越靚，垃圾越少！
首先，垃圾是一定有的啦！總會有人沒有公德心的，當然亦要視乎你的鄰居質素，例如一些舊區、舊樓、人口密度高，情況可能會差些少，要有心理準備，每星期都要打掃一下。同時，如果發現突然垃圾多了，可能是因為有新的鄰居搬入，建議盡快向管理處或物業管理公司投訴，最好有相片或影片做證據，正常情況下，管理處很快就會出通告，張貼在當眼地方，如大堂、電梯等，有一定的阻嚇作用，情況會即時改善。
至於為何裝修越靚，垃圾會越少呢？筆者沒有考究，可能因為如果似垃圾崗，就會吸引其他人掉垃圾，如果鬼火咁靚，即是有人住有人用，唔好意思掉垃圾吧！
Q：怕唔怕有人跳樓，咁啱跳落嚟變咗凶宅？
A：嚇鬼咩？當然這個風險是有的，但機會有多高呢？事實上香港凶宅數目並不多，上網搜尋大概只有一萬個紀綠，扣除公屋居屋，只有幾千個，相比全港百多萬個私人住宅單位，幾百個單位先有一個凶宅，仲要咁啱跳樓，咁啱跳中平台，可能萬中無一！當然，曾經發生過類似的悲劇，近年都有，但機會率實在不高。再加上，你的平台有多大？1000呎嗎？如果只有2、300呎，要有人跳，又要跳得中，其實也不容易，中咗只能慨歎唔好彩，但亦毋須杞人憂天。
Q：怕唔怕保安問題？好易爬入嚟喎！
A：要留意的，但不是想像中那麼不設防。這裡只是平台單位，不是地下，下面還有地舖，有時可能是一層，有時可能是兩、三層，有一高高度，要上到來平台，始終都要經過一番的攀爬，如果相比村屋地下單位，相對比較安全。但由於是低層而且有平台，如果相比同幢物業其他分層單位，確實比較容易可以去到，因此平時出入，鎖好門窗是必要的，擔心的話甚至可以安裝閉路電視。同時，由於平台單位很多時候會跟旁邊的單位相鄰，隔離左右的關係會較相熟，其中有個平台單位，一直以來都是親人自用，平時打邊爐都會叫埋隔離一齊食，不知幾開心，可以跟鄰舍打好關係，互相照應。
Q：問：怕唔怕去水問題？
A：無論是天台還是平台，很多時候特色單位都有這種情況，必須要有心理準備，要學習處理漏水、去水等問題。平台單位，漏水相對沒那麼嚴重，因為始終是低層，就算打風落雨，旁邊的高樓大廈都會檔去大部份風雨。至於去水問題，平台始終有機會積水，所以在裝修的時候要留意，地台要有一定的斜度，而且去水道要保持清潔，避免雜物瘀塞。筆者試過有個單位，那次遇上黑雨，租客突然來電說平台水浸，裝修師傅到場一看，原來是因為有些膠袋及垃圾，沖到去水位塞住，清走垃圾之後就沒事了，要有這些常識。
第一桶金（1％Anthony）
完整全文>>>https://goo.gl/1J6hT7
#平台單位 #空中飛人 #垃圾崗 #置業創富
