決定要做2020年月曆嘅時候，好不容易先搵到廠商，不過去到10月24日，幫忙穿針引線嘅朋友send咗個voice message畀我：
「月曆廠商話驚有政治立場，大陸唔會印。」
我：「因為721同831嗰兩格嘅設計？」
「唔止日子唔得，佢話所有相都好有政治立場，同埋啲tagline都係，講好多鬥爭嘅嘢，因為佢哋個廠喺大陸，驚呢啲過唔到審查，佢老細睇完話寧願唔接單，問我哋可唔可以轉晒大部分嘅相，怕太有含意，啲tagline亦都要改晒，你想推倒重來定係點？」
廠商仲提醒，香港大部分印刷公司嘅廠都係內地，呢種審查唔係得佢哋有。
明白嘅，只係感嘆香港已經變成咁，普通一個月曆都可以受到打壓。
輾轉間，我哋再聯絡咗幾個廠商，原來真係好多印刷公司都係同大陸合作，結果一間一間被拒絕，其中一間仲咁講：「幫你印呢個月曆，我廠都畀人封呀！」
時間一分一秒流逝，眼見好多人已經印完兼賣完，我呢個月曆仲係未搵到廠商，同你講未諗過放棄就係假嘅。
幸運地，喺好朋友左撲右撲幫忙之下，最後都搵到一間本地印刷公司，造價比起當日第一間其實係貴咗一倍，但我仍然覺得好抵比，因為喺香港印製，釘裝，唔使睇人面色，全部光明正大，咁已經值回票價啦！
有興趣嘅朋友，可以去以下連結購買
http://bit.ly/2YKfj3U
有三樣嘢想同大家講聲對唔住先
1）因為成個project超支，唔關廠事，我哋呢邊太執著一啲設計同紙質喇，所以今次付款方式冇提供到visa, master或paypal等途徑，用意係節省當中嘅手續費成本，搞到大家要去銀行bank in或過數而帶來不便，十分抱歉🙏🏻
2）購買嘅連結同時係《辦公室日報》最新website，我哋仲改善緊速度，如果load得耐唔好意思，我哋亦會開始加返晒舊文章上去，希望個website一樣得到你哋喜愛，已加咗唔少職場工具。
3）呢個月曆擺喺公司有機會得罪老細，請自行評估風險。
月曆售價係HKD 88，而運費係到付，部份內頁圖片同埋規格可以去website度睇 （ https://hkofficedaily.com )，如果website load得太慢，其他圖片都擺咗上辦公室日報IG。
希望你哋鍾意呢個月曆❤️我第一次畀自己100分。
