[方以文問兩句][ViuTV][詭探]
相信有觀眾明明睇完今集覺得悶，但係睇完個預告之後又覺得下集嚟料，又睇多集，睇睇吓，今個星期已經係結局周喇。今次我搵到「神剪」ViuTV宣傳部高級導演Kim So，講吓佢剪預告嘅心得。
---------------------------
問：有觀眾話你係神剪，剪到個預告勁好睇。好多次都係因為咁而睇下一集。你自己係用咩目標去剪預告呢？
答：首先多謝觀眾留意到預告，大家覺得好睇就係我哋宣傳部剪預告目標。希望大家睇預告會知啲唔知啲，再加觀眾自己無限幻想，引到大家好想知劇情，有個好奇心。剪嘅時候以不劇透重點為大前提，令觀眾有一種「心癮」聽日再睇。神剪唔敢認，只係盡力做好，多謝各位讚美。
有個小秘密想分享吓，其實廣管條例嘅關係，《詭探》題材涉及恐怖元素，預告好多時只可放喺深夜及凌晨時段。所以大家喺電視平台睇到《詭探》當晚預告，可算係限量絕版預告。中午時段只能睇到「潔淨版」預告。所以幸運嘅觀眾喺電視平台留意到嘅預告，我覺得係珍貴嘅。
---------------------------
問：你有冇參與埋劇集嘅剪接呀？
答：冇。節目同宣傳係分開製作，宣傳片係由ViuTV宣傳部製作。我哋係負責拍攝宣傳片同埋剪接預告片，提起觀眾興趣收睇節目。
---------------------------
問：有時預告同埋個真實劇情好似完全唔同咁。呢個做法係你嘅諗法？
答：剪接方向都係睇完之後諗下用咩角度去剪。剪接有趣嘅地方，係我只係將鏡頭同對白放埋一齊，觀眾自己會產生一個想法。有時你會估下集方怡有咩生命危險，有時又會估全哥嚟緊又出咩茅山術法寶，神婆做咩話俾人輪姦…...又或者嚟緊忠sir係咪會變奸.....好似玩緊一個小遊戲，全部都係要觀眾估。哈～
---------------------------
問：每集預告嘅內容係你自己度，定係有其他人（例如監製）一齊傾？
答：有時會自己度，有時又會搵吓宣傳高級撰稿員Terio Hui一齊諗。近來製作助理Leo Au都剪左幾集邪教單元，再同我一齊傾吓。我哋部門有好大自由度，都係俾我哋隨意發揮，間唔中監製或者宣傳部總裁會畀吓意見。
---------------------------
問：你有冇睇咗嗰集先剪預告呀？
（答案有微劇透）
答：通常都會睇完先開始剪，因為影片製作有一定流程、需要啲時間。有時宣傳部都係早觀眾1至2日睇，所以一收到都要盡快剪起。今個星期就結局篇，我都未睇到結局，嚟緊聽聞會有全哥對喪屍，同觀眾一樣好期待《詭探》結局會玩咩呢，哈～
---------------------------
問：你最滿意邊集嘅預告呢？
答：宣傳部都為咗《詭探》拍攝咗幾條都市傳說宣傳片，同製作咗兩條VR。我都喜歡。睇片呢度>>>
https://www.facebook.com/ViuTV.hk/videos/1818466011742145/
https://youtu.be/w5NaqxzKGRI
https://youtu.be/3b8zPZJCoM8
至於預告，我喜歡全哥一個入結界個場，因為當日搵到首歌，歌詞大意係don't look back，聽到即刻覺得同全哥好襯，background music加埋好有型，唔知觀眾又聽唔聽到呢？觀眾留意到呢啲小小嘅心機，我會有啲開心。睇片呢度>>>
https://www.facebook.com/ViuTV.hk/videos/1831301300458616/
---------------------------
「神剪」Kim So仲話多謝大家欣賞到各部門嘅努力，話只要觀眾支持香港電視劇製作，先能夠用有限嘅資源拍攝下去。仲話同大家一樣期待香港整個電視行業，會製作更多不同類型屬於香港的劇集畀大家睇。
我都好希望有好電視睇，希望每一環、每一part都做好啲，咁我哋呢班觀眾就有福喇。
#方以文問兩句 #ViuTV #詭探 #預告神剪
廣管條例 在 《廣告刊登政策》基本檢查清單 - Facebook 的推薦與評價
廣告內容 · 使用錯誤文法或標點符號。 · 包含色情內容、裸露或性行為暗示。 · 提及或暗示用戶的個人特徵，包括但不限於種族、民族、宗教、信仰及性傾向。 · 歧視或鼓吹歧視行為 ... ... <看更多>