【Kongner編輯室】
瘋子愷：林鄭落區或成打飛機現場實錄？
林鄭月娥繼上星期閃電突襲老人院之後，日前又秘密忽然進擊幼兒園，好似唔見得光咁鬼鬼祟祟。老實講，本人完全睇唔透究竟佢咁做係想帶啲咩訊息出嚟。想話俾人知你好有愛心？咁你又搞人哋啲仔女？所以成件事到最後就令人覺得堂堂特首落區，只係為咗做公關騷俾佢啲支持者睇，做條冤崩爛臭日久失修嘅陰暗跑道幫佢地起機。
不過，相信林太都知道，齋係做呢啲門面工夫係幫唔到佢減壓，所以佢都決定「行動升級」，話下個禮拜會「真・落區」開對話平台，重講到明話預左有人會動員等佢。聽落咁有信心，似乎都係以聽民意為名，嘗試以一敵眾為實喎。而各界聽到林太呢個舉動之後都有唔同反應，包括學界同民主派都表明會杯葛呢個對話平台。相信大家對此事嘅背景資料都唔陌生架啦，詳細嘅新聞大家可以自己搵返，以下就講下本人嘅睇法。
首先，呢個對話平台係要報名嘅，而又有消息指報名方式居然包括網上報名喎！大家重記唔記得之前政府決定派4000蚊果陣，政務司司長傀儡長官張建宗曾經走過出來話要搞網上申請系統係需時18個月，但今次如果真係有網上報名抽籤嘅話，佢又咁快準備好嘅？當然不排除政府有吹水成分，會唔會報名系統搞到好似NBA2K20咁中晒Bugs咁就要等佢開放咗舊嘢出嚟俾大家先知喇。
其次，其實林太已經喺唔同場合度講到明對話平台嘅目的係希望做到「收集意見、制定政策、改善民生」呢三步曲，所以本人估計政府搞呢壇野嘅重心係在於民生政策上面。呢層就反映出特首嘅「落區聽民意」本身已經有個前設，就係唔會同你傾核心嘅政治問題，更加唔使諗住佢會答應五大訴求。簡單啲嚟講，對話平台其實就係一個逃避政治問題，嘗試分散市民注意力嘅手段，所以本人認為政府今次真係唔怕你有唔同政見人士出席，因為當你同佢講政治，佢就準備同你講地講錢，而呢樣嘢某程度上亦都證明咗特區政府喺處理修例所引起嘅後續風波呢樣嘢上面已經去到無路可走嘅地步，之前我哋喺直播節目《深宵角落頭》都講過，喺修例風波呢件事上面特首明顯係無話事權，所以既然無辦法解決問題就唯有當睇唔到，分散下大家注意力就算。
當政府以為打民生牌係一條易行嘅路，但佢哋自身就忽略咗佢哋現屆政府喺制定民生政策上一向都係弱項嚟，再加上本身所謂聽民意呢樣野對於現屆政府嘅管治能力嚟講根本又係另一條死路嚟，而且即使係西方民主國家喺處理民生政策問題上面，都難以保證所有政策係經過一連串收集以及分析民意爾後再行定立。因為普羅大眾都知道同政府傾就當然係「任嗌㗎喎」㗎啦，所以香港特區政府咁多年嚟都好醒咁會答你：「但是我拒絕！」咁就可以唔使計咁多數，做咁多野喇。咁既然係咁，今次林鄭係咪真係想洗心革面搞民生呢？咁就緊係唔係啦，而且重似乎係有跡可尋添喎。
根據今日財政司司長囤地劏房陳茂波接受黨媒《環球時報》訪問透露，政府會考慮引用《土地收回條例》嚟收地。而喺呢個訪問入面，囤地劏房陳茂波亦都透露特首嚟緊嘅施政報告會喺土地房屋政策上面推出更具體嘅方案。咁派錢呢？當然就係不了啦，呢個係本人代佢答嘅。從上面囤地劏房波嘅言論就可以睇得出，其實林鄭已經一早預備好晒所有籌碼，準備好晒先落區見到市民。而當啲市民同佢講地講錢嘅時候，林鄭就會答果啲已經準備好哂嘅「標準答案」。問題就嚟喇，既然乜鬼都已經度哂諗哂決定哂，咁林鄭落區諮詢啲乜春呢？唔通一個連專家學者意見都當係耳邊風嘅政府，會喺聽完你啲星斗蟻民意見之後返去重寫份施政報告？吓？你會唔會記住你自己食過幾多塊麵包啊？WRYYYYYYYYYY！
因此本人認為呢一系列嘅所謂「對話平台」根本就只係喺度做騷打飛機，但問題未必有如部分人所憂慮咁，「對話平台」會變成建制動員會，齊來同聲打飛機，而係一系列早有預謀搞出嚟敷衍市民嘅大型假諮詢論壇，繼續林鄭一貫剛愎不仁嘅管治作風，意見接收態度照舊。咁你就會明白點解政府會咁強調唔同階層、政治立場同背景嘅人都可以參與，而且重一下子提供過百個名額比市民報名，嘩計落每人發言時間有無10秒都成問題。因為諗深一層你就會明白，林鄭一開始根本就無打算透過對話平台同市民喺政治問題上纏鬥，亦都無打算聽市民意見去制定惠民措施土地政策。出嚟坐下就話自己做咗野，到最後結果都係一樣：妄建對話平台傾，結果飛機打不停。
