[轉載]法庭感動系列
原文出處:https://m.facebook.com/story.php?story_fbid=1423719787766041&id=587771754694186
十六名於8月31日銅鑼灣被捕嘅人士被控暴動今日提堂,罷工嘅兩位店長去咗西九龍裁判法院旁聽,想同大家分享兩個庭外全場鼓掌嘅moment。
------
👏🏻情境一
控方提出其中一個保釋條件係晚上10點開始嘅宵禁令,幾位辯方代表律師都要求延後至午夜12點開始。裁判官問控方意見,控方指宵禁令係為咗確保公眾安全,裁判官話案發時間係晚上8點,咁點解宵禁令係同時間有關,聽唔到控方答咗啲咩,最後裁判官宣布直接刪去宵禁令一項,庭外全場鼓掌👏🏻
------
👏🏻情境二
其中一位係18歲學生,控方反對保釋,理由係被告有投擲汽油彈嘅激烈行為。辯方指被告只係企喺幾名示威者當中,投擲汽油彈指控並非針對被告。如果無得保釋,起碼要還押一年半載。裁判官問控方投擲汽油彈指控係咪針對被告?控方errrrrr咗一吓,此時庭外所有人一齊跟住errrrrr。裁判官追問控方係咪想喺無針對性指控情況下,將被告還押至案件完結,都係聽唔到控方答咩,最後裁判官指現階段指控籠統,如果唔俾保釋係對被告不公,所以批准保釋。庭外全部人再次掌聲雷動👏🏻
-------
以上內容可能有誤,如有錯漏請指出,感謝。
-------
後記
去法庭聽審聲援其實非常有用,亦非常安全,鼓勵大家一有機會就去,咁實質有咩可以做?
打氣
每一堂 (唔知係咪咁叫) 完結,被告家屬行出嚟見到幾百個人拍手打氣,其實心理上好有幫助,有同無聲援真係會差好遠。
擔遮
批准保釋後,被告同家屬會去辦保釋手續,現場有過百人擔遮,保護一班未被定罪嘅被告同家屬,護送佢地上車,免於被影相起底。
義載
有一位被告同家屬無預早安排車接送,或者因為經濟問題,唔肯搭的士,堅持要行出去搭地鐵。有車嘅朋友之後請考慮義載,保護佢地。
香港人好有愛,現場有唔少moment都有人感動到喊,希望大家可以一直關注,聲援所有面對濫捕嘅人。
*補充
庭內公眾席座位有限,其實庭外係有電視直播睇,所以唔需要擔心太多人入唔到去,越多人去聲援越好。同埋注意開庭後請保持安靜,唔好影相同錄影,感謝各位有心人!希望更多人可以知道聲援嘅作用!
.
#感動到我眼濕濕
#香港人加由
#張相見過有出處但搵唔返如知道請告知
Search