關於 強 積 金 轉年金 好處 ，我們在網路上蒐集到這些相關的討論、資訊與評價

【龔成問答信箱】（Q22361-Q22380）

Q22361：

龔sir你好呀呢排上緊你進階班，有幾條問題想問

1. 記得你講過話如果非控股權益條數太大，就直接用盈利條數去計純利率，咁大概幾多為之大呀? 如果非控股權益佔盈利10%算唔算大?

2. 如果一間公司旗下淨係有聯營或者合營公司，冇任何附屬公司，咁係咪盈利=股東應佔溢利? 冇非控股權益呢條數?

3. 假設旗下有聯營公司，如果用盈利-聯營公司應佔溢利去計純利率，理論上純利率數字係咪會更加準確?

4. 最近試下分析2138，近年逐漸以醫療業務為核心，係全港最大非醫院醫療機構，亦都不斷有收購動作，以擴展專科範疇。本身醫療行業係有前景嘅，

市民消費力越黎越大，營業額有平穩上升，本質應該唔差嘅。但睇佢財務數據唔算太理想，近年純利率有下跌趨勢，我留意到註冊醫生同僱員開支比例不斷上升，佔成本好重。

但係轉個角度睇，近年香港環境係幾差，目前企業仍然以香港業務為核心，始終會影響業績。而管理層對前景有信心，就算面對大環境影響仍保持擴展動作，醫生團隊不斷擴大，

所以拉低左純利率。長遠將營運模式複製到內地，大環境利好情況下，都有唔錯增長力

我分析成點呀，有冇其他我未睇到嘅因素? 呢度都幾大段野非常感激

龔成老師︰

1) 我地要估這個調整，主要係因為當集團對附屬公司持股，較接近50%時，即附屬公司盈利中，有不少比重非有集團所有，令計算出來的純利率出現偏差。

所以，我地有時係會唔扣"非控股權益"，直接用盈利(而非股東應佔溢利)去除營業額，去計算純利率。

但我地唔需要一見到"非控股權益"有數字，就去做這個調整。因為有時個數字好細，當你調整後，發現純利率其實無明顯變化。

所以，你預"非控股權益"大於"盈利"10%，我地才會對純利率進行調整，令佢數字更能反映真實情況。

2) 係，因為聯/營公司只會將所佔利潤入帳，而非好似附屬公司咁，就算持股<100%，都會100%先入帳。

因此，若企業只係有聯/營公司，非控股權益係會零。

3) 係，因為你"營業額"中並無計入這些聯營公司收入數字，若不扣除的話，純利率會被高估。

4) 香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

你分析中都說到一些重點，佢員工成本係有上漲，而該部份佔成本比重都唔細。由於集團近年加快內地發展，係員工和醫生方面開支增加，都係正常。

但係數據中，你會睇到佢賺錢能力，因成本增加而出現倒退。但由於集團加大發展，成本增加係正常。

重點係這些成本，長線能否轉化成更高收益效率，就要再觀察。暫時睇佢業務發展不差，長遠有增長力，不過業務中短期會有少少波動。

現價算略貴，由於都有不確定性，故投資時要控制注碼。

------------------------------------------------

Q22362：

龔成 你好。我30歲嫁啦。但都係儲得10萬。點先可以令到啲錢滾大啲。但我完全無投資經驗。我連MPF都係揀最保守嗰啲

可以幫幫我嘛，thanks

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你現時無投資知識和經驗，對企業估值，點去定平貴未必會太了解。所以，我建議你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股。

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有10萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於MPF，配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

------------------------------------------------

Q22363：

你好呀 請問可以指點一下嗎?
1919 平均價$17.9 入咗
1022 平均價$0.91 入咗
833 $10 入咗
請問未來應該點部署??
麻煩晒 感激不盡

龔成老師：

飛魚科技（1022）較弱，華訊（0833）就一般，中遠海控（1919）算是有質素。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價略貴，回1、2成會合理翻d。

飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。

華訊（0833）主要從事生產及銷售電子產品、塑料模具、塑料及其他電子產品元件、買賣生物柴油產品及提供煤氣爐頭、以及提供節能業務解決方案。

業務不過不先，生意都有增長，但盈利有點波動，之前有虧損。整體的企業質素算是中等。

現時股價合理，但由於規模細，加上企業優質並不是很強，投資價值唔算高。如投資，小注好了。

------------------------------------------------

Q22364：

我有睇呀老師
但我手上的股票都從高位下跌了不少，不知應該怎做

270、364、388、700、823、1316、1833、2013、2800、3690、9988

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

區塊鏈集團（0364）停牌，暫時只有等，但睇翻佢過往財務數據，年年虧損，不宜投資。

微盟集團（2013）風險會高少少，不能持有太多

而美團（3690）則較波動，要注意風險。

至於其他，問題不大，但就較集中在科網類股，成為你最大核心風險。

------------------------------------------------

Q22365：

龔Sir你好！多謝你的意見！最近我終於入了維他奶($25.1)和騰訊($534)，重基礎分析我覺得這兩間是有質素的公司，我認為襲警事件和監管事件長遠都不會影響 企業的核心賺錢能力，所以決定入貨！

學你話齋長揸有質素的企業享受長時間覆式成長的威力！ 另外想請教你石藥集團(1093) 和福壽園(1448)是否石藥集團較優質一點？

龔成老師：

對，騰訊（0700）、維他奶（0345）都可長線的，最重要是睇翻企業長遠的發展。

石藥（1093）有質素的股票，佢係國內主要醫藥製造商之一。成藥產主要在中國出售，包括抗生素、心腦血管用藥、糠尿病用藥、精神病用藥、抗腫瘤用藥及中醫用藥。

原料藥包括粉狀抗生素、維生素Ｃ及咖啡因，大部分於海外市場銷售。

佢的財務數據不差，有增長力，不過，行業本質有風險，加上近年的政策風險，都令佢股價甚為波動。

這股可投資，長線持有，現價合理區中上位，唔好太心急去一次過投資，宜慢慢投資，長線持有。

福壽園（1448）有質素有發展力。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，太約$7.5是合理區頂的水平。但不能太一次過投資太多太進取，以分注小注投資是一個策略。

管理層的野心大，投資後不要升少少就賣，要耐心持有，等長期更大的收成。

其實兩隻都有質素，可能福壽園略好。

------------------------------------------------

Q22366：

阿sir，我預計下月會再跌市，請問想撈貨，應幾時入市？

龔成老師：

無得預計的，巴菲特等投資大市都不會預期股市走勢，不要認為自己勁過佢地。我地只知股市會波動，因此當有些股在合理區，已經可以分注買入，當然同時要留現金。

------------------------------------------------

Q22367：

你好老師，老師 想請教下

有關3067 17.231入跌左19％應該點處理呢？
有關6862 34.6入跌左30％應該點處理呢？

龔成老師：

安碩恒生科技（3067），有長線投資價值，你耐心持有就得，你買入價在合理區頂至略貴。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中上部，你可持有，如果佔組合比例少，可慢慢分注投資。

至於海底撈（6862），這股就要小心股價上落大，如果持貨多可能減。

從業務長遠本質分析，佢又是不差的，長遠仍會正面，不過中短期會弱。

第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。

加上這股之前貴，相信中短期股價仍一般。

不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。

在中國有好多分店，以及外國都有。

有規模，有品牌，整體正面。相信長遠仍有發展的。

不過，這股市場之前比佢好高估值，就算近期回落，最多只能稱為合理區頂，一定未平。如果有貨可長線，但太多貨要減，股價始終波動。

------------------------------------------------

Q22368：

老師你好 我睇左你個page好耐下 想請教你買股票嘅問題 28歲 我係2019年開始買股票嘅 係隨便買 一出糧錢就好似shopping咁買股票

感受平平地就買 我覺得我好似有啲問題同好危險 因為我唔知幾錢叫平 總之平過我上次買我就覺得平 買股票又無plan 你可唔可以幫我睇下我啲組合有無問題，我蝕緊錢：

700 2手 $629
9988 4手 $232
175 3手 $22
1810 4手 $26
7226 6手 $6
66 1手 $37
17 0.5手 $34

我無儲開錢 啲錢係曬股票度算唔算儲錢？

龔成老師︰

我地做財富增值，其實就係將只會貶值現金，換成長線有增長力的優質資產的一個動作。優質資產可以係物業，可以係優質股、生意等。所以，你買的股票只要有質素，就等同儲緊錢。

但我地唔係完全唔留現金，因為我地要進行日常交易、同時要留有部份，以備不時之需，和當有大跌市時去入貨。

而我地去決定是否投資一隻股票時，你要知道佢到底係做乜、點賺錢、有無質素、行業發展前景係點、財務有無問題等等，才決定值不值得投資。

之後，我地再去用上述資訊，去估算出佢平貴程度，才去制定入市策略。

今天買入價，比上次買入為低，唔一定係"平"，可以係2次都係買貴左。而且佢股價下跌，你一定了解翻，會唔會係一些長線因素影響，令佢投資價值有變。

以你28歲年紀，應以增值為主。你現時持有股票，都有質素，可持有。而且都好好彩，大體上買入價都合理。

但有一隻要留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

以你現時狀況，你投資經驗唔算多，你可以每月用一半儲蓄去做月供，另一半儲起等大跌市這個模式，去慢慢儲貨，相信會較穏當。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

------------------------------------------------

Q22369：

你好，有啲問題想請教你下的。我有50萬儲蓄 想問有咩比較 穩陣嘅投資？

定係買啲派息基金 個個月收3千幾蚊息 用簡單啲呢？thanks

龔成老師︰

以你每月派$3000計，派息基金的派息率(7.2%)都算吸引，但你要確認到底派息金額是否保證，而且產品本身，有無"賺息蝕價"的可能性。

如果你想投資一些較穏陣股票，可以用以下優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，如果你係較年青，我會建議用平穏增長股，去做增值。若你較退休之年，穏定現金流對你相對重要，你資金就應集中在收息股類。

你可以因應自己人生階段，去進行選擇。

平穩增值股，例如指數基金、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只係合理水平，入市要分注，同時要留有3-5成現金，去等大跌市出現，才用來加大力度掃貨。

------------------------------------------------

Q22370：

龔成老師，你好。認識了你一個月，第一次發問。本人32歲，已婚有兩名子女。沒有股票投資知識。

有一層已供完的自住樓，另有一層放租，租金12k，貸款400萬，供30年。現金200萬，沒有持有股票。

本身有個目標就係希望50歲退休，到時每個月可有50K被動收入。可能受屋企人熏陶，一直諗住用買樓收租方式去實現目標。即系退休時要擁有4個已經供完，月租12k-13k的單位就可以了。

但睇咗老師嘅專頁後，發覺有啲師兄都係訂咗呢個被動收入50K為財務自由目標。而老師分析只要有1000萬流動資金，做到每年6%回報，其實已經可以做到我個目標。

對比之下好似簡單過買多3層樓收租，所以如果好似我咁樣嘅個案，應該點樣部署投資組合。

P.S題外話，長遠來講自己覺得退休有四層樓收租另一個好處，係當中兩層更可以等子女成家立室時送贈。

謝謝解答

龔成老師︰

若你希望50歲退休時，每月有5萬蚊現金流，以股息率6%計，的確係需要1000萬本金。但只係一個參考數值，總點唔係放係1000萬，而係如何創造出每月5萬現金流。

其實我地退休後，獲得現金流係有好多方法，物業(收租)、收息股、優質債券、年金，定息產品等等。(除了物業，其他都係退休後，唔係而家就買)

無話邊一種係特別好，因為我地重點係要創造一個平衡組合，希望萬一個別投資項目出問題，都唔會嚴重影響到我地全個退休計劃，所以資金會平衡分配係這些項目上。

所以，收租物業都應該成為你財富組合，其中的一員。只要唔係全個組合，大部份比例都被物業佔據，咁就可以。

你現時已持有2間物業，餘下資金和每月儲蓄，應先投資在有增長力優質股，去累積退休所需資金。

你32歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

但由於潛力股有一定風險，你可以先集中投資平穏增長股，到你有一定投資經驗，才慢慢加入潛力股類。

現時大市只是合理區，你現有200萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你現投資$200萬，18年後大約會增值至1100萬，再加上你本身收租物業現金流，相信這樣安排，很大機會達至你的財務目標。

------------------------------------------------

Q22371：

龔成老師你好。本人34歲，穩定收入，月入4萬7千。有100萬現金，每月可蓄1萬多。請問如買邊隻股票較合適？偏向想長線高回報個種。

謝謝老師。

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時34歲去計，可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

潛力股係增長力上，會相對較大，但風險同樣地，都係會較高。如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成。你可以視乎你投資經驗多寡、了解這些股票程度和風險取態去決定。

大市現處於合理水平，那100萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22372：

你好丫龔成，我睇左你個page一年，想問問你，本人28歲，儲蓄300萬現金，50萬股票，但股票全部都蝕錢，因早期聽人講買落走唔到，

現有額外流動300萬現金，共600萬，想同時買2個單位，你覺得可以嗎？有咩地區可買？月收入十萬，現租11000單位

龔成老師︰

我先講物業部份，如果係自住樓，地區主要係適合你長線生活需要，咁就可以。

如果係投資樓，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

現時整體樓市唔算平，租金回報率唔算太高，用物業做投資增值，值博率不及股市。

但從平衡配置角度，你現時買1個單位投資，我覺得都可以。但2個的話，就會太偏重係物業類，唔係咁理想。

而股票方面，我地投資股票，其實就即係投資一間企業。你一定要知道佢業務、質素、行業發展、財務狀況等，唔好只係聽日講，就走去買。

你要睇翻這些股票有無長線投資價值，如果有，中短期波動唔洗太在意，照持有係無問題。但若無質素，就算現時是賺是蝕，都應該要減持，甚至完全沽出。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你28歲，應以增值為主，建議你用「平穏增長股」 + 「潛力股」作組合，去創造一個增值平台。

除了現有資金，你可以用每月5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有300萬資金可投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22373：

本人34歲。供強積金後，月入$27000。每月儲$16000。預計出年儲蓄有100萬。想問獲100萬後投資溫哥華大概港元300萬樓宇好嗎？

另外，現在持有20萬投資建行，港交所，龍源電力，匯豐股票組合。另外想加30萬儲蓄投資股票，以藥明生物，招商銀行，騰訊股票組合， 好嗎？

龔成老師︰

我對溫哥華物業市場，無特別研究。你可以睇翻佢租金回報率，同物業本身升值潛力作決定。

大前題，你必需係認識這項目，「不認識就不投資」。如果你真的已了解當地的物業市場、租務市場、法例、經濟發展，就可以考慮。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你34歲年紀，應先做好增值部份。建行(0939)和匯控(0005)只係收息股，增長力好弱，不宜持有太多。

而且，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你現時組合有3隻銀行股，好大機會會超標，要注意。

其餘股票，都係適合你。但藥明生物(2269)不確定性較大，投資時要控制注碼。

我見你不少股票，都係潛力股類，佢地增長潛力大，但風險都唔細。建議你未來投資時，加入以下平穏增長股，去令成個股票組合更平衡。

另外，除了用現有資金投資外，你可以用每月一半儲蓄，去進行月供股票，去提升組合增長力。餘下一半儲蓄就留起，去等大跌市機會。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

------------------------------------------------

Q22374：

可唔可以分析下美股 Faraday Future

龔成老師︰

Faraday Future Intelligent Electric Inc. (FFIE)是一間智能電動汽車發展的美國初創科技公司。

我自已無研究過此股，見集團剛與特殊目的收購公司(SPAC) Property Solutions Acquisition Corp.合併。

市場預期會獲得一筆資金，用於未來發展，都算係一個正面訊號。而且集團聲稱2022年第一季，就可以交付首款電動車。比起還只在研發階段的企業，會好少少。

但始終佢業務都算係好初期階段，不確定性會好高，就算你投資， 也不建議太大注。

------------------------------------------------

Q22375：

我高位，$3.32入左1769

星期五出左政策，我现在，应该点做。。。。谢谢你

龔成老師︰

思考樂教育（1769）面對政策風險，賺錢能力減，你宜減持。

本質上，不是劣質，佢主要透過結構性合約於中國提供課後教育服務，包括以「升學」品牌提供學業備考課程，及以「樂學」品牌提供初階小學素質教育課程。

學業備考課程主要針對提高學生的學業表現，以及備考初中入學考試、中考和高考，面向一年級至十二年級的學生。

學業備考課程囊括小學、初中和高中的多門學科，並以小班制形式開展，每班通常不超過２０名學生，一般每周開課一次或兩次，每節課時長介乎１﹒５小時至３小時。每節課由檢查作業、講課時間、課堂考核、練習及小測討論組成。

過往業務有增長，長遠仍有發展力，不過由於規模不大，獨特性未算好強，因此未算好高質。

近期中央政策出台，主要係針對性禁止一些課後教育。集團正正就是從是這類企業，故影響較大。由於成個行業不確定性大，故不建議持有太多。

如果你現時持貨，只係佔你組合一個好細比重，你可以守住先，再觀察。但佔較多重，必需要沽出部份，去平衡風險。

------------------------------------------------

Q22376：

成哥，最近覺得副業生意難做，正職又就嚟完約會失業，股票又輸錢，覺得好難受，點算好

龔成老師：

你要從長遠角度去想，如果你本身有儲蓄，無太大生活壓力，可試下加大力度投入副業，當然這是有危有機。

如果你生活壓力大，就盡快找翻正職先，最好是長工，等你安心翻，至於副業的生意，你其實預左做生意是不易的，最後成功者，是一些有強大心理質素的人。

至於股票，集中睇長遠企業價值，不要睇短期股價，成功投資者心理質素都好強的。

------------------------------------------------

Q22377：

老師你好！我想問。我有216萬股票、21萬基金、53萬現金、83萬mpf

41歲想買樓，但新工只係做左3個月，計埋bonus 3萬/月

我可以點做會較好？自己一個供 用幾多錢做首期較好？係咪要選樓齡少過20年較好 但好多我可負擔的樓齡都過30年？是否等做夠1年先買？

以我可負擔價錢，那一區較適合我？
謝謝

龔成老師︰

你有半年的穩定入息證明，已經可以去做按揭，如果你擔心工作有不確定，就做夠一年先去買樓。其實你現時有一定的流動資產，首期方面應該處理到，最緊要你計好供款佔入息比率，來推算能買多少金額樓價的樓。建議你睇睇《5年買樓4部曲》。

我地投資物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

你要再要審視其升值潛力，未來地區上、交通上、生活等等的配套發展，才去下一個結論，咁會較好。

其實樓齡，都係其中一個要考慮的因素。樓齡當然越少越好，但唔代表30年以上的樓，就全無價值。由其一些藍籌屋苑，30年都仲好值錢。

但你要留意，30年以上樓宇有機會被要求做樓宇大維修，這是一個唔細的潛在成本，你買物業時，都要加入這個考慮因素。

由於這間係你自住樓，除了以上因素外，更重要係佢能否配合你長線生活所需，講緊係4,5年，係未來10-20年。如果可以，而你又有信心長線"供得起"，就可以考慮入市。

現時借貸息口低，我建議你盡量提高按揭成數，令自己有較多資金可以空出來，作投資之用。

當然，如果你做高按揭成數，會令你月供太吃力，你比多少少首期，都係可以，你要自己去做個平衡。

------------------------------------------------

Q22378：

龔sir,希望長編不騷擾你。我老公已搵到補習工作，現做緊剛開的暑期班，只1～3人一班，一星期有三/四堂。希望九月有新的中四以上的數學班，

佢會容易點，因為一直教中四至六班，現教低年級現多點預備及了解課程。

佢自己已向保險公司借了16.5萬，一年要$12000利息，問他的嫂借了5萬，我在股票攞出5萬，剛好還晒咭數。但現屋企已經無流動錢，要放緊點股票來給他5萬及屋企什使用錢。

股票與利息總共只有約90萬，但是包括我爸放在的幾萬。總90萬減去還錢的5萬，三個月供樓錢，爸放下錢及屋企使用錢。我想就放了1211(現只有一手)及小量其他細股好嗎？

如全部平均放怕剩下是太散、細的股票，這想法好嗎？

現股票有，有提議我先放那種類？

27 1000/入價43.5
66 558 公司送
388 300/入245
700 300/入333
1177 2000/入6.9

1211 500/入183.25
1810 1400/入14.82
2382 300/入140.6
2800 2000/入27.2

2845 50/入121.8
3088 2800/入11.6
3690 300/入110.6
9988 500/入195.6

現在他part-time可能對屋企洗用有幫助，我仍找緊part-time，希望我也有工作會好點。我想申請工時 “不” 提曾做腦腫瘤手術，找工作機會會好點。

希望sir 比點提示。

龔成老師︰

這些股票都有長線投資價值，如果你放，我會優先選擇一些比重較多的股票，建議你盡可能每隻都留有最少1手。

另外，就是一些潛力股，因為佢地雖然增長潛力高，但同時間波動性都較大。以你年紀，不宜持有太多。

所以，我會建議優先沽出"部份"港交所(0388)、舜宇光學（2382）、阿里（9988）、騰訊（0700）、小米(1810)、美團(3690)會較好。

至於你向保險公司借貸(相信你是指，借取儲蓄保單內價值)，這部份息率都算高，其實對你都係不利。你可以睇下銀行，有無其他貸款方法，個息率會少D，咁會較好。

雖然你從儲蓄保單借取現金價值，就算還唔到，最多只會係斷單。但從資產運用角度，這些都是利息支出，都是在蠶食緊你財富。所以長線計，都係找較低利息率的貸款會較好。

至於工作，其實以我所知，很多工作都唔會特別問你這些問題，故相信對你找工作，影響唔算話好大。

但你都要因應自己身體狀況，找工作時不要勉強，任何情況都好，都以自身健康行先。

------------------------------------------------

Q22379：

龔老師，早安！本人持有以下股票一段頗長日子，但股價一直積弱：

511 電視廣播 7000 @$8.60
3918 金界 8000 @$9.50
270 粵海 8000 @ $14.00

應否止損？還請抽空賜教！

特別是金界，是否企業質素轉壞？感謝老師抽空指導

龔成老師︰

電視廣播(0511)已經過了全盛時期，投資價值好一般，長線換至其他優質股較好。

粵海(0270)有投資價值，中短期波動唔洗太在意，暫時睇唔倒佢企業質素，有明顯較壞，你照持有就可以了。

金界控股（3918）都有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

此股長線本質，無變差，依然有長線投資價值。但由於佢身處市場新興，股價會較為波動，而你又係退休人士，這類潛力股，其實都唔係太適合你，因為風險太高。

你可以當佢有明顯反彈，就換碼至一些收息股，去為自己創造現金流，支援退休生活開支，這樣會較適合。

------------------------------------------------

Q22380：

本想將一百萬股票值如何滾訣，可惜事與願違

今日再看到恆大被凍結資產這些負面消息，忍痛放曬136，三十萬埋單，第一次蝕六位數字股票，真是一個好好的教訓，不應該重注和要止蝕！

再次感謝龔成老師一直以來的回覆

龔成老師︰

恒騰網絡（0136）始終係有危有機類別，很多價值建構在"未來"2個字。當大環境變差，大市波動，或者係好似現時咁母企出問題。

好容易就會出現較大回調，因此這類企業，投資係可以，但緊記要控制好注碼，來平衡這些風險。

其實你本身係好集中恒騰網絡（0136），現時沽出，再將資金平衡分配一些合適的優質股，反而長線係好事，係百利而無一害。

雖然短期你會見到虧損，但只要你認真去配置這筆資金，長線一定可以賺回來。

若你係年青至中年人士，以下優質股都適合你，你可以參考下。緊記做好組合平衡性，同一行業不能高於組合30%，同一股不能高於組合15%。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。