「喂，聶瞳，我係阿Fred，記唔記得我呀？」
「記得，我唔係識好多人叫Fred，最近點呀？」
「想搵你幫我公司請人，得唔得閒傾下？」
阿Fred係我其中一個求職者，兩年前失業，搵極都搵唔返同類型長工，結果做咗4個月老散，當時我介紹佢去一個客度見工，阿Fred早一日話我知佢特登去剪頭髮，諗住精精神神interview。
可惜，佢最後面試失敗。
我feel到阿Fred意志消沉，但手上真係冇合適嘅職位，期間唯有多啲鼓勵佢，分享下見工心得，然後大家又冇聯絡超過年半，原來佢已經搵到另一份穩定工作，今年仲升埋職，所以有資格幫公司物色agency請人。
唔知點解講起阿Fred，我會諗起一篇文章講水循環，意思係指水呢樣嘢既冇起點，亦冇終點，循環中不斷移動或改變存在模式，會喺氣態、固態同埋液態三個狀態中不斷轉變，同人嘅際遇好相似，兩年前阿Fred覺得自己係零，今日已經轉換咗軌跡同形態，我同佢之間嘅關係亦主客對調，所有嘢都係一個循環。
係咪覺得我講嘢好有深度？啲藝術氣息好似噴泉咁湧晒出嚟？冇計啦，打呢篇稿之前經過太古坊，得悉魏綺珊 Jo Ngai帶領嘅The Nonsensemakers (糊塗戲班)將會喺ArtisTree解構實驗劇場《Emoto》，劇目靈感源自《水知道答案》，公開排練免費入場，仲有特色輕食提供，lunch time時段可以吃一口藝術，諗嘢嘅層次都高咗。
http://www.taikooplace.com/…/artis…/open-rehearsal-2018.aspx
