考一考大家。
如果你有一個朋友，從未睇過《花姐Error遊》同《ERROR自肥企画》
你會點樣介紹佢哋睇？
我試過問朋友，得到嘅答案係：
「睇啦！好好笑啊！」
「佢哋會食屎同食蟲啊！」
「四條友好搞笑…」
「真係要睇！Mike導痴x線！」
要認真介紹其他人入坑，係一件好難嘅事。
因為兩個節目都無一個非常特定嘅主題，亦無特定內容。
基本上你打開電視，都唔會預測到佢今集會做乜。
你話《Error遊》係旅遊節目？好多地方都輕輕帶過，又唔啱賞花季節，睇日出又遲到…
咁係咪睇佢哋挑戰正常人做唔到嘅極限呢？其實又唔係…
保錡喊到豬頭咁唔敢笨豬跳，花姐輕鬆縱身一躍。
最後只係夠膽玩滑翔傘，連作為觀眾嘅我都覺得感動。
《Error自肥》更加痴線，完全估唔到Mike導想做乜，到底要Error自肥定自虐。
但同時唔知點解…
當你睇咗第一集，會好似中毒咁繼續睇落去。
而《Error自肥》最後一集，好多人都期待會出現咩爆炸式嘅痴線嘢，係咪會炸咗Viutv廠？！
結果，Mike導靜靜地請Error食蛋撻薯片，無整蠱，無爆炸，純粹總結返十幾集用嘅budget，而最後一節更加仿效EVA嘅結局，討論咗一大問題。
見到網上評語一致覺得好高質，好大膽創新。
但有幾多人真係認真思考Mike導想帶出咩訊息畀觀眾，你領悟咗乜嘢？
不過與其話帶出訊息，倒不如話引領大家深思更加貼切。
Error四子有以下呢一段對話：
Dee：呢度係邊度？節目係咪已經完咗？
肥仔：係娛樂完成，但係播映時段未終結嘅世界。
193：係熄電視之後嘅世界。
保錡：呢個世界曾經存在，但一日有互聯網，佢都唔會再嚟臨。
呢個時候，Dee拎起手機，
有把聲講：『只要你而家一拎起電話，呢個電視播出嘅所有嘢，就會了無意義，係咪要咁做？』
呢段自白式對話，令我諗起《娛樂至死》呢本書。希特拉都曾經講過：「控制年輕人的最好辦法，就是給他們足夠的娛樂八卦。」
雖然《娛樂至死》出版於1985年，內容講嘅係「電視」將一切變得娛樂化，令人民失去思考同判斷能力。
喺電視出現之前，提供資訊、知識或娛樂嘅有報章雜誌、收音機、漫畫、書、電影…
但電視嘅出現，將所有人類嘅專注力放喺電視上。現今都市人可能未必想像得到，其實「網絡」嘅出現，正正就係《娛樂至死》當年嘅「電視」。
你每日會花幾多時間喺網絡上？Youtube、討論區、社交平台…網絡世界幾乎可以畀你接觸到所有資訊娛樂同知識。
而為咗喺包羅萬有嘅網絡世界突圍而出，大家都會將所有嘢「娛樂化」同「碎片化」。
Dee話駕駛Error拍節目，係驚搵唔到自己。
保錡回答：「努力迎合期望，唔會填滿你嘅空虛。」
當193介紹完Error成員。
Dee話：「呢幾個人睇落有啲陌生，就算我喺入面都有咁嘅感覺。」
肥仔回答：「呢啲片段，係片段嘅存在，缺乏前文後理。」
其實亦好似網絡世界碎片化一樣，當網絡世界擁有太多資訊，社交平台每秒都有更新，youtube嘅片好似睇極都睇唔晒，大家唔再有專注力去睇或思考。
為咗吸引大家注意力，唯有將所有嘢碎片化同娛樂化。追隨KOL講政治，好多人連睇套電影都唔捨得花時間，轉移去睇啲簡短解說「五分鐘睇晒《哈利波特》」。
當然，娛樂都可以好有深度，例如英雄電影都有《Watchmen》同Marvel系列嘅分別，即使有時Marvel英雄都有好多深入主題，例如《幻視與汪達》嘅「忒修斯之船」哲學探討，但又有幾多觀眾去瞭解。
當追完套劇集，熄咗電話，就拎起手機去同其他人討論劇情。
就好似一開始阿Dee想拎起手機，之後亦都話自己其實唔一定要駕駛Error，做網絡紅人都可以娛樂大家㗎， 我有養貓、我識跳舞、我可以拍搞笑短片…根本唔需要Error同電視。
之後，Dee反駁肥仔，媒體每日都有報導重要嘅事。
193話：「所有嘅資訊後唔能夠令你作出現實反應，又或者唔容許你作出現實反應…
肥仔：都係娛樂。
當你坐喺Office、地鐵、屋企…望住呢一堆碎片化，缺乏前文後理嘅「資訊」同「知識」，但你又唔作出反思…
咁亦即係193所講：「了無意義，片段化，泛濫、無用嘅麻醉藥。」
當所有資訊碎片化，所有人都唔再有專注力去思考，或接收重大意念。
最後，Error探討「電視」呢個命題。
肥仔話本來娛樂係電視嘅存在目的，但因為網絡出現，電視變成對抗零碎娛樂嘅武器。
阿Dee反問，拍段咁嘅嘢係咪無budget同搞gag？
如果大家唔去深入思考，肥仔亦回答：咁剛才嘅解說，對觀眾嚟講就係搞gag同爆budget。
亦即係一堆廢話…
《娛樂至死》書中所講，當大家沉醉喺只只得娛樂嘅世界，亦唔識去思考點解自己淨係追求娛樂…其實比起文革式愛國洗腦，更加可怕。
可能你會話：「喂！我返工已經好辛苦，想娛樂吓自己都要被你屌啊？！」
唔係話唔可以娛樂，但人唔可以一昧追求娛樂，放棄思考同學習。
的確，學習同思考嘅過程係好痛苦，但學習所得到嘅喜悅，遠比只追求娛樂更大滿足感。
我唔介意用媒體用娛樂去包裝資訊，正如我呢個Post用《Error自肥》做引入，而唔係單純講《娛樂至死》呢本書。
但希望大家吸取娛樂同時，唔好放棄吸取知識，如果未搵到答案，咁就再試一次，唔好停止嘗試！唔好逃避！
其實要做到靜靜思考非常簡單，下次去廁所屙屎，唔好帶手機，帶本書或就咁行入廁所，畀自己大腦好好思考一下。
（戴頭盔：我自己都唔確保100%睇得明，睇唔明咪思考吓、討論吓囉。）
如果你對《娛樂至死》呢本書有興趣
我會喺Patreon更詳盡，深入淺出地講解～
訂閱Patreon：
https://bit.ly/2JPFX8x
忒修斯電影 在 印度電影交流- 忒修斯的船Ship of Theseus (2012)... | Facebook 的推薦與評價
2022年2月13日 — 忒修斯的船Ship of Theseus (2012) <<忒修斯的船的問題>>，一世紀時的希臘作家普魯塔克提出了這個問題：如果忒修斯的船上的木頭被逐漸替換， ... ... <看更多>