生肖爭奪戰（上）
一個月黑風高嘅晚上，我收到一個驚人嘅消息。
人類推出「十二生肖」，計劃搵十二種動物，作為年份嘅代表，世世代代流傳落去。
十二生肖計劃現正接受申請，各種動物都可以遞交申請，由人類審核。
我作為老鼠族嘅族長，思緒萬千。
為咗集思廣益，作出正確嘅決策，令老鼠族走向繁榮，我好快就召開老鼠大會，同大家商量對策。
愛好文學，最鍾意咬人類書籍嘅文長老雙眼發光：「人類嘅文化源遠流長，如果我哋成為十二生肖之一，就可以將鼠族嘅名聲，世世代代流傳落去。」
父母都被人類打死嘅狂鼠，對此不屑一顧：「呸，我哋又唔係人類嘅朋友，佢哋仲喊打喊殺，點解我哋仲要呢啲名聲？」
兩邊嘅講法都有道理，不過，我諗到一個更重要嘅問題：「人類對鼠族有敵意，就算我哋遞交申請，人類都唔會接納我哋。」
文長老嘆氣：「咁又係，話晒呢件事嘅決定權，都喺人類手中。」
我召來鼠探子，問有咩動物申請做生肖。
據鼠探子回報，牛、兔、馬、羊、雞、狗同豬族，都第一時間交咗申請。
我點點頭：「呢幾個部族同人類關係密切，第一時間交申請都係正常。」
鼠探子繼續講：「至於豺狼虎豹、馬騮、蛇之類嘅部族，都仲猶豫緊。」
呢啲都係野生動物，同人類唔算好Close，既想得到「十二生肖」嘅名望，但又有少少仇怨，唔知點抉擇好。
講到呢度，我突然諗起一個部族：「咁貓呢？」
呢句話一出，所有老鼠嘅面色都變晒。
人類的確唔鍾意老鼠，但受速度同體型所限，真正落手殺老鼠嘅人類，其實唔多。
好似狂鼠咁，父母都被人類所殺嘅老鼠，數量極少。
而且，我哋嘅食物，主要都係人類嘅剩菜残羹，所以鼠族對人類算係恩怨各半，愛恨交纏。
我哋真正嘅仇人，係貓族！
貓族會捉老鼠嚟食，哪怕食飽咗嘅貓，見到老鼠，都會捉嚟玩弄折磨，實在係喪心病狂。
而且，貓族仲同人類制定協議，貓幫人類捉老鼠，人類為貓提供食物。
不過，貓天性狂妄，同狗截然不同，貓族從來唔承認係人類嘅寵物或手下。
貓族認為，貓係人類嘅合作伙伴，雙方平等互利，甚至有啲驕傲嘅貓，覺得自己嘅地位應該喺人類之上。
鼠探子答：「貓族仲未遞交申請。」
我覺得奇怪：「貓同人類關係良好，至少有合作，又無咩仇怨，點解佢哋唔申請做生肖？」
呢個問題，鼠探子都答唔到。
要作出正確嘅決策，一定要有可靠嘅情報。
於是，我派出探子，去打探貓族點解唔遞交申請。
犧牲咗幾個探子後，我哋終於得到完整嘅情報。
原來，人類推出「十二生肖計劃」後，貓族都召開過大會商量。
但係，貓族自視甚高，一向都睇唔起，對人類千依百順嘅豬、牛、羊、狗之類嘅部族。
貓族知道家畜都交晒申請，覺得貓唔可以好似家畜咁「送上門」、「唔矜持」。
與此同時，貓族又想得到「十二生肖」嘅名頭。
於是，貓族計計數，人類要搵十二種動物，
目前得七種動物交咗申請，其他野生動物都仲觀望緊。
貓族自問，同人類嘅關係，總比野生動物密切。
就算唔交申請，人類湊唔夠數，總要將貓加落十二生肖度。
所以，貓族決定，暫時唔遞交申請，等人類自己送上門。
我聽完呢個消息，都覺得不可思議。
咁樣「矜持」法，即係明明鍾意對方，又唔接受人哋嘅表白，仲要「考驗」吓對方咁。
明明想要，又話自己唔想，啲貓真係難相處。
諗到呢度，我心生一計。
我本來以為，以貓同人嘅關係，貓一定會交申請，人類亦一定會將貓納入十二生肖。
但依加，貓族自矜身份，呢件事係唔係有操作嘅空間？
我將呢件事話畀其他老鼠知，佢哋羣情洶湧：「啲貓串串貢，不如我哋做吓手腳，令貓竹籃打水一場空？」
反正老鼠都唔會入十二生肖，如果可以趁機報復貓族，絕對係一件利國利鼠嘅好事。
鼠族訂下目標，我哋要令貓無得入十二生肖！
講就容易，到底應該點做？
我哋商量咗好耐，最後決定分兩個方向去做。
首先，派長老出使豺狼虎豹、馬騮、蛇等部族，勸佢哋申請成為生肖，等人類有更多嘅候選動物可以選擇。
否則，人類湊唔夠十二生肖，好可能會拎親近嘅貓族嚟湊數。
另一方面，我哋全族都要深居簡出，節衣縮食。
貓同人類最重要嘅合作，就係貓會捉老鼠。
依加貓族唔遞交申請，人類應該都覺得奇怪，話唔定心裡都有啲不滿。
如果我哋老鼠好少出沒，貓都會好少捉到老鼠。
人類會唔會覺得，貓對人類不滿，所以先既唔遞交申請，又唔捉老鼠？
跟住落嚟嘅日子，我哋過得非常辛苦。
為咗離間人同貓嘅關係，我哋只可以食存糧，好少出去搵食，每日都要節衣縮食。
而長老出使野生動物部族，只說服到老虎、馬騮同蛇三個部族。
加埋七種交咗申請嘅家畜，總共得十種動物，仲未夠十二生肖。
下集：http://bit.do/e3mj3
將專頁設定為「搶先看」/ "See first"，最新故仔馬上睇！
我男朋友係人狼：https://goo.gl/rMAfUm
我家有隻小狐仙：https://goo.gl/83QYrP
#短故 #短篇 #小說 #陳美濤 #廣東話 #粵語 #tomatochan #生肖爭奪戰
