【長假梗係用黎煲劇】
有冇人睇緊呢套Netflix 新劇？尋晚一晚煲咗八集，不過主要原因唔係話呢套劇好好追，而係因為佢好多人物，同埋有兩個時空跳黎跳去（兩個時空，就算係同一角色都係由兩位演員飾演），最麻煩佢係講德文(要記晒啲角色中字譯名），所以我驚如果分開好幾日黎睇，每次睇都會唔記得邊個打邊個。
套劇其實有啲似近兩年大熱（兼多多十少少overrated) 嘅《怪奇物語》Stranger Things，都係中產小鎮少年失蹤+ 神秘部門重大陰謀格局，仲要兩套劇都有玩返八十年代。但即使題材似，又係出自同一間公司Netflix，不過發展落去係有啲區別。Dark 冇少年歷險元素，更加唔係奇幻打怪獸，取而代之係玩時空、玩角色嘅過去現在（雖然唔係真係咁多描寫）。
我仲差三集，唔知會唔會爛尾，但暫時頭半都算睇得過嘅。
P.S. 今年都唔係睇咗好多劇，最鍾意係Mindhunter。
