［吳生很清楚炒股好過收租］突發！實在令我O咗嘴
TL；DR：收租好難做，好彩有炒美股幫補下，套現40億港紙！（原來七十幾億，最初寫錯）
TL；DR2：九龍倉做咁多年生意識咁多人有咁多內幕，都係走去買Facebook Amazon，仲係買幾十億！買到要出公告，而你聽埋啲濕鳩朋友嘅內幕貼士炒細價股。你照下鏡，你似傻仔定包玉剛似傻仔？
1. 介紹返，其實四大家族（或五大六大，隨你），業務眾多，各自有自己嘅Treasury 同炒房，十分合理。亦都可以兼任埋自己家族（非上市公司）嘅投資。
2. 李嘉誠有成Team人，仲識買人造肉買Zoom．新鴻基又係一大個部門，我去過見工添，唔止一次添，都冇請我，明顯我唔夠班。不過請咗我以前愛徒，咁當然係佢青出於藍，唔係我教導有方。恒基四叔當年直頭亞洲股神添
3. 九倉一樣有哥連頓證券，之前已有人寫過（https://bit.ly/2zsfCbn）
4. 實情呢，好多證券行都唔多賺錢，但你發現唔少其實都待價而沽。因為大公司（唔一定地產），自己有間證券行做私家雞（sorry，或者私家鴨），做好多嘢方便好多。詳情就唔太講多，咁當然有啲合法，有啲灰色啲咁啦
5. 咁但，今次呢單，絶對冇灰色
6. 其實上市公司買賣／炒／投資其他股票，出公告，唔算太少見。但講真多數細公司多。例如耀才成日都炒阿里巴巴（https://bit.ly/2XqMwRM），或者「抽水大王」官永義（https://bit.ly/3gn2sNB）炒下啲內銀呀平保咁
7. 點解呢啲要公佈？其實只係因為上市條例嗰啲乜乜比率有關。總唔會買幾支水都要出公告，咁就睇返佔資產呀乜鬼嘢各樣比例（https://bit.ly/2LTN11l），詳情可以去上市條例自己慢慢睇。
8. 咁所以，平時咪啲細公司會出—民企之父張化橋話齋，啲中小企呢，分分鐘主席食多隻鮑魚就出盈警架啦
9. 今次九倉出，就真係夠晒震憾了。因為個額好大。平時以九倉嘅規模，炒乜都唔使公佈，今次因為真係太大！
10. 當然啦，都同大家講返，其實九倉系之前重組過。大家最熟悉嘅 海港城，時代廣場，荷里活廣場（鑽石山，唔係美國），仲有中環連卡佛大廈（其實而家個名冇個連字），會德豐大廈，美利酒店（以前美利樓）—呢堆嘢，通通通都唔係在隻4號仔入面！
11. 去咗邊？全部去晒1997（好冧把），Wharf REIT，九龍倉置業．仲有隻海港企業（51），同天星小輪
12. 咁4號仔剩返乜？仲有好多東西嘅，香港賣樓啦（冇乜，主要山頂），大陸商場寫字樓啦啦，大陸賣樓啦，仲有香港大陸酒店（Marco Polo， Niccolo），貨櫃碼頭啦之類。
13. 邊舊大，就梗係1997大。你見1997高位跌咗一半，但都仲850億市值。4號仔呢？一半啦
14. 而今次出公告係4號仔，除咗因為細過1997，亦因為涉及金額太大。
15. 原來係沽咗20萬股Amazon，同埋兩球半Facebook．拿，Amazon差不多2000蚊美金一股架下，Facebook 都200美金一股。
16. 計埋，cash in 咗5億美金！40億港紙！唔小嘢。4號仔呢兩年都係講緊幾十億純利咋 （原來七十幾億，最初寫錯）
17. 至於係咪又關「國安法」甚至中美冷戰事？就諗多咗。舊年8月開始沽啦。比較好嘅解釋，就正係題目呢句，收租不如炒股。過去一年收租極淒慘，但反而美股越升越有
18. 係喎，有冇話你知，Facebook 同 Amazon，剛剛創新高？我正諗住寫。留意係歷史新高，唔係肺炎後新高，早就升穿埋之前高位。你諗下啲友講過幾多次Facebook已死？劍橋護老院事直頭話霸權終結添。And？
19. 當然啦，好似沽咗好多股票。但佔Amazon股本，0.04%．Facebook？0.09%．即係，你係香港首富（其實都唔係），但人地係全球首富！你公司係香港龍頭（其實都唔係），但人地係全世界龍頭！萬幾億美金市值。朱生話齋，買起你坐海港城用嚟打乒乓波都仲得（https://bit.ly/2ywnN65）！
20. 至於賺幾錢？Amazon賺咗15億港紙，Facebook賺咗4億。夾埋20億港紙。都話4號仔呢兩年都係幾十億純利咋下
21. 不過，實際上係對個盈利，係冇影響嘅！會計處理嘅嘢，但直頭去咗個book value 度，所以都係賺咗嘅，亦幫到現金流
22. 沽嘅價？ Amazon平均沽價係1,975美金，Facebook沽價係195美金。Amazon最新大約2,400美金，Facebook 230美金。其實都係近高位了，應該好多都係近期先沽。
23. 最後有乜啟示？好簡單，九倉之類，識埋咁多人，聽埋咁多嘢，做生意咁多年。都係去買Facebook Amazon，仲係幾十億咁買。而你走去聽內幕，信啲微信女有貼士。咁你不妨照下鏡，睇下你似傻仔，定包玉剛似傻仔（＊）？
（＊）包玉剛當然死咗好耐，但，佢嘅眼光咪就係揀咗吳光正。咁你話佢係傻仔定你係？而我最鍾意玩啲小朋友，就係叫佢地解下，點解包玉剛要轉生意畀個姓吳嘅人，而唔係自己姓包嘅。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
