【到底《#浪跡天地》可以有幾好睇 ？】 #到底可以有幾好睇系列
#長文慎入
當《浪跡天地》已經推到係年度神作，拎硬最佳電影、最佳導演時，真心個人就覺得有少少誇張，套戲係好睇，又未好到去「最佳」果隻，反而係睇共鳴嘅戲，我自己就好鍾意。
或者呢段短評我想有少少唔同方式咁寫，分享自己經歷。
《浪跡天地》喺歐美可以爆好評唔出奇，相信好多人都經歷過／經歷緊，但對悲到震嘅亞洲人嚟講，大家唔會覺得有咩共鳴，尤其悲到極點嘅香港人，在場反應有人覺得搵戲嚟做、到底有冇可能發生，就算覺得好睇，都會話趙婷為咗美國市場刻意咁拍法，更有人話套戲好左膠。
大家井底之蛙，請唔好覺得世界冇可能咁發生。
事實上，我開 有故事的旅人 （澳洲首都不是悉尼） 呢個Page，「有故事的旅人」唔單止係指我，都係指我喺旅途上遇到嘅有故事的旅人，而喺呢啲人入面，最有故事嘅人，往往都係呢班「Nomad」，都係我想講佢哋嘅故事。
無論你喺Hostel喺Campsite喺Caravan park，總會遇到好多呢啲無所事事嘅人，喺香港人眼中，佢哋都係廢青／廢中／廢老，最初我都以為佢哋係咁「廢」，甚至都傳統香港人上身，對佢哋好抗拒，總覺得佢哋唔知想點。當然，當中係有唔少真係無所事事、撩事鬥非，好多都心地善良，就好似戲入面班Nomad咁。我喺Caravan Park就曾經遇到一個好似女主角咁，朝朝煮咖啡俾我飲嘅伯伯，初時我都覺得佢唔知想點，但其實佢冇唔知想點，係純粹想開心Share、骨子裡都係個好友善嘅鄰居，都喺我最孤獨最寂寞嘅時候，陪伴我度過唔少日子。
喺戲入面，女主角長期過住Nomad生活，我遇過好多人，都同樣長期過住咁樣生活，但一定活得比你同我滿足。喺香港，你CV gap一個月已經俾人話你不務正業、gap三個月基本上已經冇乜公司理你、gap足一年，係死罪，你從此玩完。我喺澳洲酒店工作時，帶我果個嬸嬸今年六十幾歲，由二十幾歲開始，從未有過一份正式嘅工、一個穩定嘅家，佢同佢老公就係揸住架露營車，喺澳洲同紐西蘭四圍咁搵嘢做，從冇停過落嚟。對於香港人嚟講，或者會好Proud of自己一畢業就同一間公司做足十年嘢，但對佢哋嚟講，居無定所生活先至俾佢見識到世界。果時每一日同佢拍檔，都可以聽到好多好得意故事、唔同生活小智慧，可能收入唔多，就活得好滿足好快樂。喺香港人眼中，呢班人「廢」足一世，但佢哋所得到嘅快樂，「成功人士」一生都得唔到。
戲入面可能美化咗少少呢種Nomad生活（冇講好L多蚊、落大雨你就仆街、「冬涼夏暖」等等），但有時諗返我經歷過呢種生活，識到咁多呢啲人，正正係「唔知做乜」，先至係最難忘。一班人圍住火爐吹水、夜晚用有限資源整餐嘢食，望住抬頭滿天星放空、成班人邊度有工就去邊度、冇工就喺Caravan Park等工，你果陣諗落覺得好無聊，依家諗返不知幾回味。
既然叫得Nomad（佢哋都係叫自己Nomad，唔係套戲作出嚟），就註定係緣來緣去，今日唔知聽日事。我好鍾意套戲不斷重申，大家唔會講再見，只會講「See you down the road」成日都話，笑著面對別離，係我哋窮一生要學會，而又學唔識嘅事。我哋深知轉身一別可能就係永別，但我哋總會深信有朝一日，喺世界某個角落再度重遇。其後，你可能真係會喺世界某個角落重聚，往往喺你無家可歸果陣，幫到你一把。
喺資本主義社會入面，正常人會同你講，年青要努力打工、要儲錢，老咗有積蓄就自自然然可以環遊世界，咪傻啦，就好似女主角突然爆咗咁，叫你買樓然後欠下一生都還唔到嘅債，為乜？戲入面女主角遇到一個Nomad鄰居，自知大限將至，辛辛苦苦一生都從冇見識過呢個世界，結果咁就一世，遇上絕症。套戲去到呢個moment，冇任何煽情畫面，就係一段獨白，講佢路上遇到嘅美好事物，好多好細微嘅事已經一生難忘。
正好似《靈魂奇遇記》果幕人生美好小事物咁，只有對白同簡單對白，你腦海畫面已經逐格流動，眼淚係咁流落嚟。喺傳統香港人眼中，可能我係一個廢到無倫嘅垃圾，已經唔會再有咩前途可言，但我曾經有過呢啲咁美好嘅生活、咁難忘嘅回憶，其實都已經好好喇。疫情加埋社運後，大概我哋都深知世事無常，世界唔會有咩係永恆，不如好好活在當下。一個唔好彩有咩事，至少你都擁有呢啲回憶。當你曾經長期經歷過呢種生活，自然知道點樣好好珍惜大自然每個Magical moment，你嘅人生唔應該係喺公司電腦面前打打打就一世，而係應該有咁嘅記憶，而呢套戲最呈現到嘅係，解釋到香港人最悲哀嘅思維：你成日周圍去，一定好有錢啦。其實，可以用得比你更少錢，甚至，根本冇錢。
的確，你可以話套戲毫無內容可言，但我會覺得係「睇共鳴」嘅戲，而套戲都拍得出果種好貼地嘅寫實感，經歷過、有共鳴，堅係會感動到毛骨悚然，咩回憶都返曬嚟。點樣面對生命無常、點樣排解一個人嘅寂寞、點樣運用自己生活智慧等等... 將呢班人故事寫得咁平實，而唔係求其搵個人故事拍成一套長片，或者正正係套戲想呈現，一班人交雜嘅眾生相。我哋唔會知道對方好仔細背景、一生人嘅故事，就係喺果一刻燃亮到嘅火花，先至係最值得講嘅故事。
相信，趙婷唔係自己親身經歷過，就係做咗好詳盡資料搜集，唔係好難拍到咁細膩嘅戲出嚟。
真心，戴頭盔先，《浪跡天地》唔係人人接受到，亦講真未必好到去「最佳電影」級數，但我好鍾意。
Dedicated to the ones who had to depart, see you down the road.
多謝趙婷，將大家嘅故事拍出嚟，仲要拍得出果種感覺。
‼️電影網店全新貨品已上架，低至$5起，快啲嚟搶購啦：https://bit.ly/3qLPkpk
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【MeWe請Follow】mewe.com/p/travelerwithmovie
【IG請follow】www.instagram.com/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
悉尼一日遊 在 【Anne姐遊澳之旅】悉尼Day 1 一日逛兩大市集 ... - YouTube 的推薦與評價
【Anne姐遊澳之旅】 悉尼 Day 1 一日 逛兩大市集介紹 悉尼 美食+大橋景色打卡熱點推介. 45K views · 3 years ago ...more ... ... <看更多>