愛情還魂記（上）
我嘅初戀女友叫夭夭，佢話呢個名係「桃之夭夭」咁解。
但自從我同佢分手後，我就覺得，佢應該叫妖妖，妖怪個「妖」。
點解我哋會分手？我都講唔清楚，愛情好多時都係一塌糊塗，特別係初戀，難免死得不明不白。
總之突然有一日，我覺得自己好似無咁鍾意佢，好似唔多夾，跟住就分咗手。
問題在於分手後，夭夭到處唱我，話我點樣佔佢便宜、浪費佢幾年青春，令佢嘅情緒崩潰，世界一片黑暗......
乜嘢叫浪費青春啫？唔通佢無識到我，就會年年十八歲？
總之，世人總係同情弱者，見佢一個女仔，喊得咁慘，大家都當咗我係負心漢。
唔止咁，夭夭唔知點解，總係掌握到我嘅行蹤。
我去咩活動，識一班新朋友，佢總係可以準確無誤咁出現，令氣氛非常尷尬。
我想追新嘅女仔，啱啱開始曖昧，夭夭就會聯絡到個女仔，講到我好似陳世美咁，令對方避之則吉。
你話佢係唔係妖怪？
直到我識到小純，小純無在意「陳世美傳聞」，認真去了解我嘅為人，我哋好快就一齊咗。
夭夭無放過我，佢開始轉講法，話我早就搭上小純，貪新忘舊先拋棄佢；當然鬧埋小純無恥賤格，搞人男友......
估唔到，小純面對鋪天蓋地嘅質疑，都無退縮，肯同我一齊面對。
我好感動，好愛小純，我相信天崩地裂都唔會拆散我哋......直至夭夭殺咗小純。
嗰日，我同小純出街，夭夭突然出現，氣勢洶洶咁指責小純。
身為現代人，面對衝突會點做？梗係拎手機出嚟影，準備擺上網公審佢啦。
我同小純都拎住手機，點知夭夭拎出嚟嘅，係刀。
小純中咗幾刀，我先反應過嚟，想阻止夭夭。
夭夭大叫：「我真係好鍾意你㗎！」然後一刀捅向自己條頸。
前度同現任同歸於盡，我都唔明，我只係想正正常常拍吓拖啫，點解會搞出兩條人命？
件事搞到咁大，細節被查得一清二楚，原來夭夭喺我手機度裝咗監控軟件，輕易掌握我嘅行蹤，同我想追嘅女仔。
我個人又怕麻煩，部手機用咗幾年都無換，所以就......不過依加諗嚟都無用，人都死晒。
我放唔低，既懷念，又愧疚，幾乎每一晚，我都夢見小純嘅音容笑貌。
幾個月後，我遇到一個滿頭白髮嘅老道士。
佢大聲叫：「後生仔，要唔要幫你算一卦啊？」
我以為，又係嗰啲呃錢算命佬，正諗住快步離開。
點知老道士講：「你相貌堂堂，財運唔差，偏偏情路坎坷......見盡血光！」
我腳步一頓，唔，聽吓佢講咩都好。
估唔到，呢個老道士算卦極準，唔止我嘅事，連我同小純嘅祕密都算到。
雖然佢收費好貴，但我家境唔差，自己又賺到錢，如果錢可以解決到我嘅心頭鬱結，我怕咩畀錢呢？
老道士問：「人死不能復生，你想要嘅係何物呢？」
雖然不能復活，但如果可以令小純投胎......都係唔好，投胎佢仲係BB，我要等多廿年。
於是我問：「可唔可以令小純投胎......去一個成年女人身上？」
「你講嘅係借屍還魂。」
老道士沉吟咗一陣：「都有法術可以施展，不過收費比較高。」
我畀咗一筆錢落訂，叫老道士施法，其實我都係半信半疑，但我無其他選擇。
人死不能復生，我想同小純重逢，只可以靠呢啲神怪嘢。
無幾耐，Shirley出現喺我面前。
初時我以為係一個陌生嘅靚女，無意中望多兩眼，
點知佢淚如雨下，然後撲上嚟攬住我，講咗好多我同小純嘅事。
我勁開心，小純唔止借屍還魂成功，仲還魂成一個更靚嘅靚女，上天真係待我不薄。
我發咗個訊息畀老道士，讚佢法術無雙，順手清埋條尾數。
小純......依加係Shirley，同以前一樣咁大方，唔會管住我，而且比以前更靚，更了解我心意。
失而復得嘅喜悅，掩蓋咗所有嘢。
無幾耐，我哋就結咗婚。
我以為，呢件事咁就完咗，算係大團圓結局。
但係結婚後，我開始覺得有啲唔妥，我發現Shirley偷偷食魚，以前小純最憎食魚。
可能大家會話，換咗副身體，口味改變都合理。
但既然咁合理、咁小事，點解Shirley要瞞住我食魚呢？
懷疑一旦開始，破綻就愈嚟愈多。
我再去搵老道士，講晒我嘅懷疑，問佢嘅借屍還魂術，會唔會出咗咩差錯。
老道士好緊張，問晒我Shirley嘅行為舉止、時辰八字、電話號碼。
我忍唔住問：「時辰八字我明啊，但點解要電話號碼？」
「你平時講電話號碼多，定講你嘅時辰八字多？電話號碼因為經常使用，所以聚集咗人嘅靈氣......」老道士講咗一大輪，不過我都唔明㗎啦。
過咗一排，老道士話佢施術查證咗，Shirley的確係小純，
但借屍還魂嗰陣，造成靈魂破損，所以有啲嘢會唔記得，又有時行為舉止會奇怪啲。
咁都講得過去，始終呢啲神怪嘢我一竅不通，但我硬係有直覺，覺得Shirley有啲唔妥。
呢次，我決定唔靠超自然力量，我請咗個私家偵探去查Shirley。
結果，私家偵探影到嘅相，令我目瞪口呆。
Shirley去咗夭夭屋企，同夭夭嘅父母言談甚歡，仲請佢哋飲茶。
如果Shirley係小純，應該對殺佢嘅夭夭恨之入骨，就算重生後放下仇恨，都無理由去孝敬夭夭嘅父母掛。
唯一嘅解釋係，Shirley其實係夭夭還魂，佢Hack過我部手機，睇晒我同小純嘅訊息，所以講到咁多我同小純嘅事。
下集：http://bit.do/fjrt8
將專頁設定為「搶先看」/ "See first"，最新故仔馬上睇！
拯救咗地球，之後呢？：https://goo.gl/EVhESA
宿世蚊緣：http://bit.do/eSbbZ
#短故 #短篇 #小說 #陳美濤 #廣東話 #粵語 #tomatochan #愛情還魂記
