［誰都會散 怎知一拍便會散 怪我自己作反 明明我不應再揀］ 而家一出事就乜都要爆晒出嚟。我諗起沙士時有位兄台在灣仔星港酒店（*）畀人隔離咗，佢話去借洗手間喎。反正我信了
1. 有朋友話：男友剪剪下頭髮拎戒指💍出嚟求婚，所以夜晚變咗未婚夫。地豆魷魚🦑花生🥜粥（**）咩。至於午餐仲簡單，食唔飽再食唔得咩。有話咁都諗得出實係大滾友，其實相反。真正一腳踏幾船先冇咁得閒諗呢啲。
2. 又，原本係想用容祖兒另一首，《好事多為》，更貼切。「原本這分鐘 我應該在試婚紗 但這刻跟你正 抱擁於酒吧」。但呢啲歌鐵粉先識。唔好亂用
3. 亦有諗過用陳奕迅嘅《阿牛》「不甘心 尤其這新婚 就像玩犧牲 想過搶新娘 我差點講真」
4. 但都係《一拍兩散》係團結大多數，最大公因數（即係，「最多人識」，咁多術語）
5. 阿叔唱K嘅年代，好留意女仔唱呢隻歌。但凡去到最後一段，「自廢了承諾是否太～斗～膽」要深呼吸，再唱「～何～苦再自命悽慘」嘅，多數都有嘢。唔係自己一腳踏兩船，都係試過或唔介意的。萬試萬靈準過測謊機。
6. 23:50 補充：原來係韓妹！空姐！我冇補充了。有人話呢啲叫stereotype，我話係經驗。
（*）記得星港因為港大年代叫紅van落。唔記得沙士嗰時叫「維景」未。而家間嘢好似又改咗名叫「睿景」。師傅教落，成日改名嘅嘢實有問題。你見啲藝人都係。有冇見半島酒店要改名？不過反例係唱《愛情傻戀La La La》李美林同埋唱《多得他》嘅Shirley Wong。馬後炮Shirley Wong紅得起都好合理，我老豆日聽夜聽。但李美林紅得起真係畀你估一百次都估唔到，繼De Beers將透明炭扯上愛情見證後，另一史上最成功行銷。
（**）有冇三十歲以下識呢個gag的？
