我係蘋果員工，我想講幾句…
係呢一刻，我同一班同事都仍然堅守緊崗位。有無糧出，已經擔心唔到咁多，或者應該話，做得記者，都唔係為咗錢，人工低過譚仔啊姐已經係行業常態。最緊要係星期六最後一張紙，仲可以如期出街。
做蘋果記者，開心、有空間做故仔，當然都有代價。好多同事都被列入黑記名單，雖然成日講笑咁講係honour，但老實講，個人資料被公開，邊個會唔驚？唔擔心自己，都會擔心屋企人。被人玩電話嘅次數多到，連scam call app都block唔曬。
好多同事都好想好想繼續堅持，「我真係好想返工」呢啲咁痴線嘅句子終於輪到我哋講。但最後連個可以耕耘嘅地方都無埋。
做傳媒，尤其做新聞，內容永遠求新求變，就係唔想被時代淘汰，但最後竟然被政權掩埋。
我只係做咗短短幾年，無緣見證蘋果最輝煌、資源最充裕嘅年代。但就算近年新聞自由空間逐漸收窄，上司們都仍然會盡量比好多空間、資源我哋做好每一隻故仔。
不過當連「自由」都變得敏感，總會有代價，總會有人要受。800人失業大軍加上疫情，搵工已經好難好難，唔少機構仲要覺得我哋「反叛」，唔會請，前路到底會係點？捱到幾耐？仲做唔做記者？我都唔知…
成日都話做記者最緊要係個故仔出到街，自己要低調。從見證歷史、紀錄歷史，到今時今日成為行家們筆下的主角，我哋能夠成為其中一份子，感到與有榮焉。
香港人珍重，有緣再會。
#感激幫我哋頂住嘅老細們
#感激在此遇見的人和事
#多謝陪蘋果走過的香港人
#係呢到學到嘅嘢係會跟一世
#不過同其他香港人一樣我哋都怕失業
#蘋果日報
#香港人珍重
