生仔要考牌（上）
「孩子摔倒了，哪種情況下要儘快就醫？
A.孩子一直大哭 B.孩子摔倒後沒有聲音，不哭 C.早晨摔倒，下午開始嘔吐」
我知道正確答案係B同C，但我毫不猶豫咁圈咗A。
呢個年代，生仔要考牌，夫妻雙方考試合格，得到育兒牌照後，先可以合法生仔。
如果未婚懷孕，或者未考牌就有咗，生出嚟嘅小朋友會被強制送去孤兒院，畀其他考試合格，而又冇生育能力嘅夫妻領養。
我每年都嚟考呢個生仔資格試，今年已經係第三次。
我前兩年都唔合格，當然，今年都唔會合格。
唔係因為我好蠢，而係因為，我根本唔鍾意小朋友，完全唔想生仔。
但我老婆就覺得，人生一定要生仔，唔生仔嘅人生就唔完滿。
古語有云，夫妻有爭執，老公讓老婆。
喺老婆強烈嘅意願下，我嘅意見被徹底無視。
於是，老婆開始苦讀《母親育兒寶典》，仲逼我讀《父親育兒寶典》。
我都唔想讀，但老婆日日都拎《父親育兒寶典》嘅內容嚟考我，我一旦答唔到，就鬧到我狗血淋頭。
我唯有苦讀寶典，仲辛苦過當年考公開試。
不過，老婆可以逼我讀書，唔可以逼我考得好。
夫妻雙方係分開考場嘅，要考得好就難，要考得差，真係話都冇咁易。
我故意填錯某啲答案，好容易就搞到自己次次都唔合格。
出咗成績，就乸埋口面向老婆懺悔，話自己一考試就緊張，一緊張就唔記得晒啲知識，下次會更加努力……
坦白講，我幾鍾意「生仔要考牌」嘅制度。
如果唔係有呢個制度，我早就俾老婆逼住生仔啦，根本冇得走精面。
我以為，呢件事會一直持續落去，我會年年考試，年年唔合格，一直到我哋嘅生育年齡結束。
點知第三次放榜後，老婆同我講，佢決定生仔。
我提醒佢：「吓，我哋未考到牌喎。」
「係你未考到，三年前我已經拎到『母親育兒牌照』。」老婆更正。
我嚇咗一跳：「你想搵第個生？」
老婆翻白眼：「你係咪傻㗎？就算男女雙方都有牌，非婚生子女一樣當無牌計算，仲不如同你生？」
我再問：「咁你想點？」
「照生！」老婆咬牙切齒咁答。
吓，生出嚟都係被強制送去孤兒院，根本冇得自己養大個仔，佢大個咗都唔會同我哋有感情，咁有咩意義？
「我諗過㗎啦，我已經三十幾歲，呢幾年再唔生就高齡產婦，分分鐘生唔出。」
老婆愈講愈激動：「我啲朋友個個都生咗仔，日日喺網上曬仔女可愛相。佢哋望住我嘅眼神，好似我係廢物咁，生唔到蛋嘅母雞啊！」
我正想安慰老婆：「你又唔係雞……」
老婆打斷我嘅說話：「總之，我依加生咗出嚟，佢係俾人哋領養咗。但等佢長大我都可以認番佢，話唔定佢會理解我嘅苦衷。」
「佢可能唔理解，同埋都冇一齊生活過，有感情都有限。」我必須提醒佢。
「咁……我都有個機會，我真係好想有自己嘅仔女！」老婆講到眼都紅埋。
下集：https://bit.ly/2XcOXYi
將專頁設定為「搶先看」/ "See first"，最新故仔馬上睇！
我阿爸禁錮咗個女仔：https://goo.gl/vFjyV3
穿越神鵰：http://bit.do/eM9EF
#短故 #短篇 #小說 #陳美濤 #廣東話 #粵語 #tomatochan #生仔要考牌
