每隻狗狗都有佢嘅死穴，
有啲會護食，
有啲一遇到其他狗錫自己主人就會呷醋，
有啲聽到消防車救護車聲就會共鳴，
有啲一剪指甲就會發癲，
滴眼藥水嚟講，小秋係算乖嘅。
佢只係響擠肛門腺或者剪指甲果度麻煩少少啫。
呢排小秋唔知係咪大個女咗，
對波波興趣大減，
但就鍾意玩臭布，
製作過程好簡單，
雞蛋就6隻，糖呢就2茶匙……
其實就係將一個原本好地地嘅布公仔秒殺扯爛，
穿腸破肚，
叼晒入面啲棉花出嚟，
吐到周圍都係，
真係成屋周圍都係，
因為真係天女散花掉極都有，
所以要講3次，
我真係冇諗到一舊公仔入面會有無限咁多棉花變出嚟，
當佢終於抽乾晒個布公仔，
將好地地一隻長頸鹿變成乾屍，
就開始佢織織復織織嘅織女生涯，
每日匿埋一邊用牙仔係咁「咪」塊爛布，
將佢抽絲剝繭，還原返做線，
係咁「咪」係咁「咪」，
「咪」到攰就挨住攬實瞓，
瞓醒又係咁「咪」，
最後變成一劈又似塵拂又似海哲皮嘅物體……
我試過偷偷聞吓塊臭布，
頂你個掣吖，
哇，果種千年口水味勁到呢，
真係強過哥羅芳，
臭過格勒底，
我諗住收埋洗乾淨，
點知條女一瞓醒發覺冇咗塊臭布就發癲哀鳴，
亂跑亂跳，
同《家有囍事》老爺奶奶突然冇電視睇一樣絕望，
直頭世界末日咁，
咁就冇辦法唯有畀返佢啦，
但聞住臭布瞓嘅後果，
就係眼仔污糟發炎，
搞到要滴眼藥水，
佢滴果陣有零食其實唔掙扎嘅，
只係滴咗落去之後，
佢會好用力瞇實隻眼，
你會見到滴藥水好似清晨葉尖嘅露珠咁凝響眼蓋上，
你要好用力好用力，用雙手撐返開佢對眼，
滴眼藥水先會bingo成功入落佢眼仔入面，
每次見佢出盡九牛二犬之力瞇實眼仔都好想笑，
你呢啲怪力究竟邊度嚟？
最好笑係明明瞇埋晒眼，
但都照食到零食先至犀利喎，
平時又唔見你鼻仔咁靈敏，
成日眼大睇過龍發雞盲，
滴完我原本想偷偷掉鬼咗佢塊臭布，
但忽然又諗起，
我細細個都有塊粉紅色被仔好鍾意，
成日都要攣住，
上面有晒我啲口水味，
出門返學前仲要又錫又聞先肯離開，
返到屋企食飯做功課都會攬到實一實，
點知有日放學返嚟，
竟然畀嚟探我嘅太婆話污糟發晒霉幫我掉鬼咗，
果吓我嬲到衝口而出大鬧佢一句老虔婆，
換嚟我老母九秒九手刀衝出嚟嘅一巴掌，
一嘢震斷晒我所有經脈……
我冇估到咁多年後竟然歷史重演，
我個囡竟然有我遺傳，
如果我掉鬼咗佢塊臭布，
我咪變咗佢眼中嘅老虔婆？
算啦算啦，
我冇佢有都當補完返我當年遺憾架啦，
乖乖你好返我再畀返你玩同你一齊聞啦好嗎～
#攣住臭布堅係好瞓啲架你地唔明架啦 #呢啲係安全感嚟架 #成功阻止童年陰影誕生
成功阻止童年陰影誕生 在 王貽興- 每隻狗狗都有佢嘅死穴， 有啲會護食 的推薦與評價
滴眼藥水先會bingo成功入落佢眼仔入面， 每次見佢出盡九牛二犬之力瞇實眼仔都好想笑 ... 攣住臭布堅係好瞓啲架你地唔明架啦 #呢啲係安全感嚟架 #成功阻止童年陰影誕生. ... <看更多>