［屋企中層的告白］
#多謝大家inbox及留言問候在心中 #我家暫時都安好 #請將物資分俾有需要朋友 #感動 #香港人你哋可唔可以唔好咁痴線咁有愛
屋企搓手液得返半支，為咗呢三支嘢，由今朝十點幾行到家陣。
屋企有長期病患嘅老人家，見悶就心思思去街。由於佢哋講極唔明，既唔識點包好口罩重用；搓手液你叫佢慳住用咩，佢就半滴都唔用，想留返俾你。唯有自己就貧民式地用，老人家就叫佢哋放心用；如果唔能夠見到佢，替佢放好，只有叫老人家口罩用一次就掉。
長輩有啲唔係同住嘅，當然無得𥄫實；行得走得嘅，仲可以趁你去咗廁所：「落街買啲嘢~」就「了」咗去。你又吹佢唔漲。老人家精靈又catch me if you can，但佢呆你又驚。況且好多時佢哋要落街，不過見疫情嚴重，想買啲新鮮餸俾大家食，大家有營養同健康啲。個個都係將心比己，明白但又勞氣。當然理解自己屈係屋企太耐都癲啦，何況唔識上網打機睇Netflix，又無得home office嘅老人家。佢哋肯三幾日先落次街，堅係俾足面你。
而我哋呢班上又要顧大，下又要理細嘅屋企中層，既要返工又要上網撲口罩，工餘仲要學整搓手液、口罩、渠務，甚至點分辨不同病徵都要研究；自己無細路仲好啲，眼見班家長朋友：「學校網上教學，在家就老豆/老母學」，自己學埋教小朋友，OMG！真係分身都唔掂。我哋呢班夾在中間的二三十，講堅真係人都癲。
老母一句：就無晒廁紙，正所謂你唔痾K都要俾屋企人抆屎，就又撲落街搵。即使最後好慶幸撲到物資，個人心力真係好攰。有時仲要搵極都無添。
仲未計我哋其實仲要返工架喎，大佬。home office後，辦公室搬咗嚟屋企，好似free咗，但屋企嘅家人（不論大細）真係當你放假架，乜乜物物要take action梗係多，如果有小朋友要陪佢玩仲頭痕。老細打嚟又驚細路嘈，而令老細覺得你無心工作。（好在自己未有小朋友，朋友分享啫）當然仲未計老細覺得你24小時已經係office嘅on call啦！如果老細要你返公司咩？仲驚，我點知隔離個同事新年有無湖北親戚去過拜年架？！
加上日日見到個仆街政府嘅無腦施政而動嘅肝火，真係少啲意志都人都癲。
點都好啦，撲來撲去，都係想一家人齊齊整整，平安健康。香港政府係咁仆街架啦，依家只有我哋自己自強互助，互相頂住。有時我會好阿Q咁諗，我哋識上網買物資，又識周街走周圍搵，仲有消費力嘅人，其實已經好幸運。係攰，但都只可以怨個仆街政府無能。比上不足比下有餘，唯有自強自救。
香港人，我哋要撐住唔好死。大家仲要睇住林鄭同埋高官黑警報應來到的一天。
仍期待同手足喺煲底除口罩相見的一刻。
#呻下啫唔係谷住好瘋癲
#大家夠就用好啦留返啲俾其他人
#星期六以為可以抖下咩屋企得返幾卷廁紙
#痾屎KOL近排唔鼓勵痾屎正常出入就好
![[5-minutes Korea]](https://img.mediatagtw.com/api/image/webp?source=https%3A%2F%2Fyt3.ggpht.com%2Fytc%2FAAUvwni2EzqMc_hCScSw091-xyxlkp3iyC-G-f6Lujb7RQ%3Ds800-c-k-c0x00ffffff-no-rj)
