黃到發金，又見希望
呢一年時間都用喺自我修行，聽好少歌，更莫講係聽香港歌（自己母語，一聽就好難專心睇書或者寫文），如果唔係捧一年一度嘅叱咤場，就真係會錯過好作品。之前友人話，精進道理唔係唔明，但係咪所有崗位都有得做，會唔會有啲實在對爭取國體作用不大，我答，香港提早進入唔屬於香港嘅現代，照計香港人應該喺以前就做完嘅事，延遲進行，崗位難免有輕重之分，但尋晚睇完叱咤，關於分工，我又好似有個更好嘅答案。
原來，香港的確唔缺乏好歌，因為時代催促大家快速成長，而有心有力嘅音樂人都未有失準失場，只係我後知後覺。香港人嘅勇氣可嘉，香港人嘅靈魂相依，全部都有人努力用佢地最擅長嘅方式留存記錄，只係大家忙於應付眼前抗爭，未必有時間細味每一首歌嘅力量。音樂鼓動人心，鑽入回憶深處，即使音樂人尚未付出最寶貴嘅生命，但佢地流露嘅傷痛，絕對係同無辜遇害同壯烈犧牲嘅同胞家屬朋友緊密扣連——如果唔係今年發生咁多事，音樂人亦未必會如此認識自己，甚至激發出咁多靈感，而一眾DJ盡量喺能力範圍發揮創意，做出如此good show，洗脫小圈子選舉惡名，亦必定係民族情感所驅使。
今晚係我第一次聽林二汶嘅〈最後的信仰〉，聽完叱咤片段，就去youtube搵黎重聽。聽完嘅感想，非常直接，就係旋律好聽，歌手嘅演繹簡單而深刻，演唱溫柔而堅定，以及林夕從來唔會令人失望，身為香港文壇第一人，果然當之無愧。談論音樂，我非常外行，天分亦唔高，但我始終相信，任何藝術都可以共連，因為藝術只係人表達自己如何理解世界嘅方式，感動人心，靠嘅永遠都係藝術背後嘅信念。呢首歌由歌名到歌詞都係明顯同香港民族所經歷嘅悲痛有關，由失去摯友嘅林二汶傳達，教人處理悲傷，自然更具說服力。
香港歌之情情塔塔，長期為人所詬病，但原來時代動盪不安，香港人一樣可以繼續有情，而情感更加可以瞬間拉開到民族高度，甚至為共同體療傷止痛。林夕所填嘅歌詞，完全係鼓勵大家堅持落去嘅至理，情理俱備，用字準確，就算唔跟旋律，都真係好難寫得出咁精雕細琢而又渾然天成嘅文句。「燈會破滅／心可撕裂／愛難以肢解」，所講嘅自然係肉身消亡，心痛亦隨之，但愛係無法輕易挑撥然後分化；「冰會酷熱／糖可苦澀／懶跟它變態」所講嘅則係六月飛霜，世界變質，但人心永遠堅守正道，變態二字運用雙關，簡直高章到望塵莫及。香港人有人性，無論對方「對現實／怎麼踩」，都唔會動搖互助互愛精神，但正因為同胞所受之痛苦巨大，人性所受之踐踏太猛，大家亦因為感同身受而無法管理情緒，陷入低潮。好在，「明白血肉會崩壞／骨氣沒法被活埋／來日想打妖怪／先要做人去／首先祝你心理愉快」為持久戰提出指引，林夕提醒，原來對抗到底，保持心理健康係先於一切，而所謂變成怪物而可以戰勝怪物之語，更係無稽之談，空講無益。
日本超人電影裡面，妖怪變大，超人都會跟住變大，但超人係從來唔會以妖怪姿態出現，亦唔會暗算對方。有時，超人會不敵對手，陷於苦戰，心口能量燈係咁閃，但劇情發展落去，超人都係得道多助，或者靠一股正氣，重新振作，最後擊敗妖怪。由此可知，超人保衛地球，從來唔係單靠過人戰鬥力，因為超人本來都只係人，而正因為係人，佢至有奮戰嘅心，因而生出強大意志。超人唔係孤島，亦毋須獨自面對妖怪，全因佢一直都知道自己戰鬥嘅目的。「軟弱無力全是堅忍的證據」，就如同超人打到需要休息，之所以頂唔住，就係因為當初開始想頂住，而香港民族面對每日新聞消息，之所以每次都過唔到，亦係因為我地就係永遠都唔會過得到。真正嘅堅強，唔係漠視人命傷亡，擺出一副看透世事、自以為超然嘅態度，而係一直受到觸動，一直心痛落淚，但都繼續選擇正義，繼續拒絕屈服，底線始終寸步不退。「靈魂內有信仰／搶不去」，既係戰到最後都要保持嘅信仰，更係社會共同體存在嘅始源，ideas are bulletproof，只因精神世界之豐富從來都比現實世界之富有壯麗而偉大。
「抬頭尚有天空／敲不碎／埋頭尚有智慧／思想／他人難偷取」，意思顯淺不過，亦係「這種搶匪也許／比你畏懼」嘅原因。華夏食人族係恐怖共同體，因為無法與人建立互信，亦甚少同人有心靈交流，佢地嘅社會所追求嘅不朽，只有煉丹煉成嘅長生不老，生命嘅意義，唔存在於佢地嘅認知。而香港民族有勇有謀，有情有義，正係「可以戰敗／不可收買／信人會失敗／從來未信／犧牲尊嚴／竟可跳出魔界」，故此大家根本就唔係以同一種思維去面對世界，分歧之大，如同兩種物種。香港民族心有所向，心有所屬，「信最後善良留在世界」，所以「無論鐵路會崩壞／方向未會被活埋」，呢種辨認正途嘅能力，係精神世界得以開發至會有嘅超能力，自然唔係妖怪之低層次所能理解。最勇悍嘅反擊自衛，只會出現於守護自己嘅小共同體以至社會共同體之時，故此「痛恨無能為力／也沒有不對」，因為大家都知道軟弱只係暫時，血海深仇必有報復之日，只有幼稚而短視到以為自己手中有槍有棍就等於強者嘅鎮壓機器，至會誤以為一剎那嘅強勢可以長久。
過往每次同外國朋友介紹香港音樂，我多數都係播陳奕迅畀佢地聽，然後佢地即使未必明白，都會話把聲的確好有感情，唱得好有故事感，諸如此類。今晚過後，因為時代精神嘅展現，我嘅介紹選擇一下子增加，例如明星偶像，我就會拎MIRROR出黎。喺畀人睇死嘅情況之下，香港竟然繼續造星，而且一年過後，佢地真係更勝從前——歌精舞勁或者比唔上K-pop組合，但至少已經有別於歌藝十年如一日嘅Twins。更何況，K-pop組合限制極大，呈現出嘅完美形象都係經過過多計算，而MIRROR則係由各有各缺點開始，由觀眾見證之下一步步成長，雖然青澀仍然未減，但絕對有血有肉，某程度上反映出香港人嘅精神面貌。順帶一提，今年有首哲理歌好紅，loop咗好耐，故事主角思前想後，最終發現「才明白愛情／是我和自己的競賽」。觸類可以旁通，其實處世之道又何嘗唔係同理，反覆試錯，正正就係成長嘅過程，亦係結果。
可能而家都係有好多人未形容到香港精神到底係乜，或者覺得音樂都係唔及部分人識得歷史政治咁直接咁犀利，唔會對於「叱咤金獎從來都係好難攞」一說有共鳴。然而，上下一心盡力促成一個黃到發金嘅年度頒獎典禮，於我而言，已經彰顯出金獎嘅意義。許廷鏗雖然唔係拎金，但佢嘅脫胎換骨，有眼皆知。新嘅album我有去聽，出走無綫，佢嘅個性比以往鮮明好多，可見人嘅進步，時機未必一樣，但一直有認真生活，蛻變係必定會發生，三十歲都可以再次出發。方皓玟呢類一向會講人話嘅更加係毋須多講，為大眾唱出心聲，滿腔憤怒，但都只係發自「用愛緊抱自由 ／願覺醒再無內鬥」之心，足證「明日縱使跌低／寧願抗爭到底」同「願世間都珍惜信望／能相愛」並非二元對立，而能戰方能和，正係香港民族逐漸意識到嘅真理。音樂人未必可以當兵打仗，亦未必可以具備歷史感去掌握宏大格局，但同一民族，各有崗位可以精進，勉強分出你我高低，根本多餘。「明日大時代每秒換季／能否都珍惜一世」，全因信念無懼時代變遷，而始終相信自己會有「寬廣的未來」，全因言之有物，有靈魂可以體現，Rubberband憑歌寄意，正係擅於以音樂同世界溝通嘅人，做得最好嘅事。
自由即獨立，有愛即民族。流行音樂同時係獨立音樂，檯面音樂都如同地下音樂，只因音樂人從來無法自外於世界，而音樂亦從來唔應該同商品一樣志在賺錢。個體思想，大眾意志，過去未有交匯之時，其實亦只因時機未到。未來香港民族將要步入黑暗時代，但香港人呢個身分一定會繼續發光。香港人過去一年所累積嘅諗法同情感，真實而完整，值得珍而重之，因為呢啲音樂將會喺大家因為戰鬥失利而灰心喪志嘅時候，再次提醒大家要繼續堅守良知，如同最初。
https://www.youtube.com/watch?v=drGcTwtVKeY
我心中尚未崩壞的部分歌詞意思 在 我心中尚未崩壞的地方的影片 第1集 - YouTube 線上影音下載 的推薦與評價
Mayday五月天[溫柔]OfficialMusicVideo,「5月天諾亞方舟3D」電影特輯-眾星推薦篇::現正熱映中!!!,Mayday五月天[如煙]HDMV官方完整版,五月天夜訪吸血鬼OfficialMVHQ ... ... <看更多>