【點嚟喎啲時間你問】
今朝跑步之前有讀者inbox我，話貽興你咩都搭到嘴，好hit既戲你又有時間睇，好僻既戲你又有睇，仲睇咁多書咁多漫畫，平時又要寫嘢又要做電視又要返電台，仲要做運動又盛，都未計你每晚要放狗喎，你啲時間究竟點嚟架?
點嚟?哈哈，咪好似M嚟咁，話嚟就嚟囉。點嚟……
唔通我啲時間同人唔同，曉掉番轉嚟咩。Benjiman Button呀我?
大家一日都係得24小時，大家一樣迫車食飯返工都係梗咗咁多粒鐘，其他人唔係唔洗返工得閒過你，只係其他人識得善用時間，而你通常都係捱時間hea時間，等時間過，返工等放工，夜晚等天光，虛度光陰咁解啫。
你攰，我其實攰過你。
你唔夠瞓，我比你更唔夠瞓，其實。
我連車都冇揸，日日都係同大家一樣等車迫地鐵，咪又係揸到時間做到自己想做既嘢?
所以，講到尾，都唔關時間事，係關你自己事。
你自己知自己事。
係關決心事。關人忍事。
關你個人忍唔忍到既事。你忍唔忍受得到自己每日都求求其其同尋日同大前日冇分別，冇進步冇建樹，冇儲到嘢，冇為一啲新知識或者簡單美好既事而覺得呢日與別不同，咁你就唔好再搵藉口賴囉。
講到尾，個核心問題其實係你做人有冇食蕉，Sorry，係目標，冇目標就食蕉，當你有目標，有好想持續去玩去學既興趣，你就有熱情去過日子，會榨盡工餘既每滴時間去做你想做既事，跳舞又好，寫作又好，學日文又好，拍嘢又好，幾廿歲人先嚟學功夫都好，你就唔會浪費珍貴既時間無無聊聊又虛度，你唔會忍受垃圾電視台既垃圾節目，你亦唔會再畀自己攤響屋企眼光光重覆掃facebook玩手機唔知究竟仲可以做咩……
世界太大，太多有趣好玩有意思既嘢要follow要認識，我唔係比其他人多時間用，我只係知道咩叫等價交換，大部分人用嚟hea既時間，我用嚟睇多套戲睇多本書，我唔social唔蒲唔hea，我知道唔應酬唔蒲既代價係我會識少好多人，少咗好多工作或者向上爬既雞會，但我覺得值得，我清楚自己人生想要啲咩，所以依家換嚟既就係比其他人睇多幾本書同戲，但成就同人脈比其他人爭啲囉……(其實可能唔止一啲囉，頂)
每個人每日既時間都一樣，量不能變但質可以變，有人連運動都hea做，睇戲又hea睇，無聊想搵拖拍，拍到拖又覺得無聊，睇戲時想返屋企瞓，響屋企瞓又想出街睇戲，同朋友一齊想自己一個，自己一個果時又恨有friend陪，呢個就唔係時間既問題，係你自己心態既問題囉～
我今年已經三十幾歲，上半世已經為生活嘥咗比平常人更多既時間，我冇童年更冇青少年時期更加冇青春冇朋友，冇享受過學校生活，人人話讀大學好hea好好玩我一星期八九份補習星期六日全日仲要返兒童中心搵學費，凌晨先返到屋企捱住眼瞓寫《無城有愛》，入電視台果幾年又用咗好多時間拍咗好多唔想拍既嘢，錯失咗好多重要既人同重要既事，所以我比任何人都知道，剩番唔多既時間，我想點用，我有咩想做，而且，有咩唔想再做。
我冇咩特別，我做到既，你都做到。你做唔到，只係因你默許自己繼續做唔到。你係搞成依家咁既你既幫凶，同時，都係元凶。
與其再周圍問人佢啲時間點嚟，不如問番自己，你啲時間你既熱情你既人生，即係你洶湧澎湃果啲M，點解一直冇嚟。
講完。
#時間唔撚人 #你的時間如何你的外表也必如何
#過去十八歲沒吔蕉不過有時間 #我愛花香不愛花我愛M巾不愛M #KINSOLE清尚眼鏡
