（諗過另一條題「港人移民潮VS 中資接貨潮」角力戰🤔🤔🤔）
以前同朋友食飯見面，寒暄時最多都係問「最近點呀？」「忙唔忙呀？」。你又點會諗到，一個陳同佳一頂帽，令香港人生活有翻天覆地嘅改變，連寒暄吹水開場白，都變成「你會唔會移民呀？」「走去邊？」
最近開始有金融界朋友陸續同我講「我決定走了～我拒絕動搖～」（知係邊隻歌嗎？），舉家移民去。
「咁你過到去做咩呀？去當地搵工？」
「唔使呀！我香港公司請返我做parttime？」
「吓？但你份工要見人、要開會架喎？」
「係呀。不過經過呢個疫情，公司開始發現，原來啲人唔使喺公司都做到嘢，係唔使死。有半日working hour重疊，咁我咪work from home。」
「咁你老婆呢？」
「佢都一樣呀，佢間公司又一樣畀喎。」
香港有一班人，本來都會因為怕咗中國而想走；結果都係因為中國，武漢肺炎席捲全球，全球兩星期內極速開work from home實驗室，結果成功咗！亦變相令到呢班香港人，有機會繼續打住香港工，同時呼吸自由空氣。所以你明白，點解Zoom（ZM）咁多負面新聞，都仲可以日日破頂，升到近240蚊美金。
好多人聽到有移民潮，就好容易「李香琴Mode」，落以下結論，「有人移民，即係香港有走資啦，死啦死啦，香港冇啦，港元冇啦，世界末日啦！」不過，大家見上星期港匯強到日日觸強方兌換保證，換句話說，就算有資已走，但同時都有人入，而且係全面進場，講嘅唔單止係中概股。
早兩日同Office agent朋友寒暄，今次唔使問「你會唔會移民呀？」因為知佢一定唔走，我就問，「最近生意點呀？」話說早兩個月見佢，個樣頹到你根本唔好意思問佢有冇生意，但今個星期，又出奇地容光煥發，白淨咗毛孔又細咗添！
「呢期OK喎！啲客返落嚟，啲大陸客好心急咁喺香港開公司。本來年頭都已經多咗架啦，中間隔咗個疫情，而家開始又租返office啦，速度仲快過之前。」
經過上年運動，今年5月後發生嘅所有事，都反映中國要加快全面「收回」香港，目前淨額上計，走資是假，但換血是真，而且速度只會有增無減；未來香港金融市場，以至香港樓市是向上定向下，就要睇到底係走嘅快，定係接嘅快。
你話大陸對香港移民潮，有冇壓力呢？有嘅。如果唔係，就唔會有記者朋友好灰咁同我講：公司唔畀我報移民盤新聞啊……
by千頌C@堆填區
