絕世好媽（上）
如果你問我，我嘅家庭幸唔幸福，我會答，都唔錯丫。
父母冇惡習，我同五個兄弟姐妹偶爾會嘈交，但都冇咩嚴重嘅矛盾。
不過，一直以嚟，我其實有個遺憾。
屋企嘅兄弟姐妹實在太多啦，阿媽照顧我哋嘅起居飲食，已經用晒佢嘅時間，所以佢分畀我嘅關愛唔係好多。
每日我哋嘅交流，就係「食飯啦」、「瞓覺啦」，唔會有得促膝長談，有時佢仲會望住我，叫錯咗我家姐個名。
我同自己講，每個家庭都係咁㗎啦，即使冇咁多仔女，父母都有自己嘅事業同人生，冇可能將所有注意力擺晒喺我身上。
直至我哋搬咗家，我認識咗新嘅鄰居，佢叫小吉。
我先意識到，覺得自己有幾幸福，有時係源於比較。
小吉唔幸福，小吉係一個好可憐嘅女仔，佢有肌肉萎縮症、白血病，仲有幾種慢性病，個腦都有問題，只有七歲智商。
但令我羨慕嘅係，小吉有一個好錫佢嘅阿媽，夏姨。
據講，夏姨生咗小吉之後，佢老公嫌棄有病嘅小吉，想放棄小吉。
夏姨當然唔制，於是，佢老公就拋棄佢哋兩母女。
從此，夏姨獨力撫養百病纏身嘅小吉，小吉行唔到路，夏姨就幫佢推輪椅；小吉咬唔到嘢，夏姨就用鼻胃管餵營養補充品畀佢食。
夏姨慈愛嘅目光，永遠停留喺小吉身上，無論小吉講幾傻嘅說話，夏姨都會耐心傾聽。
見到小吉咁慘，我慶幸自己有健康嘅身體，但我都好羨慕小吉得到嘅母愛。
喺呢種慶幸夾雜羨慕嘅心情下，我同小吉做咗好朋友。
放工返到屋企，我就會隔住圍欄，同小吉傾計，當然夏姨都會陪住佢。
夏姨對我好友善，佢話小吉識到朋友，佢都好開心。
夏姨真係我見過最好嘅阿媽，後來，電視台搞咗個「絕世好媽選舉」，夏姨有被提名。
我毫不奮猶豫就投咗夏姨一票，我仲幫佢拉票，到處叫鄰里投夏姨一票。
事實證明，我嘅舉動係多餘嘅。
原來夏姨喺呢一區好出名，人人都知道佢係最好嘅母親，個個都會投票畀佢。
今日，夏姨有事出咗去，小吉一個人同我傾計。
小吉神神秘秘咁同我講：「莉姐姐，我鍾意咗個男仔。」
我嚇咗一跳，我同其他女仔相處，的確會傾呢種話題，但莉莉嘅心智只得七歲啊，仲係一個小朋友。
「佢叫阿強，係上網識嘅，佢都好鍾意我。」小吉面都紅埋。
我明白啦，小吉因病而返唔到學，日日喺屋企，只可以上網同人傾計。
呢個阿強就利用小吉嘅寂寞，欺騙心智障礙嘅少女，簡直係人渣！
小吉繼續講：「我同阿強講過我嘅病，阿強話唔介意，佢會好好照顧我，仲約我出嚟見面。」
我問：「你有冇同夏姨講過？」
「我唔敢講，等我見咗阿強先啦。」小吉答：「三日後，阿媽會出去半日，我約咗阿強。莉姐姐，你可唔可以幫我推輪椅？」
我本來想拒絕，但轉念一想，如果我拒絕，小吉只會搵其他方法去見阿強，更加危險。
倒不如我去保護小吉，等小吉睇清楚嗰個阿強係咩貨色。
當日，我帶埋我兩個阿哥一齊去，佢哋都練過功夫，又高又大隻，必要時可以武力制伏阿強。
兩個阿哥匿喺遠處，我推住輪椅，帶小吉去見阿強。
阿強長相平庸，但小吉一見到佢就好開心，我都唔好意思做電燈膽，退後咗兩步，遠遠觀察。
兩個人愈講愈親熱，阿強居然要錫小吉。
我點可以畀小吉蝕底，我即刻衝出嚟阻止：「喂，你做乜嘢？」
下集：https://bit.ly/370HMsg
將專頁設定為「搶先看」/ "See first"，最新故仔馬上睇！
注定戴綠帽：https://goo.gl/R6k7UK
我愛逼地鐵：http://bit.do/eSsFC
#短故 #短篇 #小說 #陳美濤 #廣東話 #粵語 #tomatochan #絕世好媽
